Pika (NSS) - ဖေဖော်ဝါရီ ၉ 

အမေရိကန်တပ်ဖွဲ့များသည် ယီမင်အခြေစိုက်ဟူသီလက်နက်ကိုင်အဖွဲ့၏ ဒုံးကျည်စနစ်များကို တိုက်ခိုက်မှု အများအပြားလုပ်ဆောင်ခဲ့ကြောင်း အမေရိကန်စစ်တပ်က ဖေဖော်ဝါရီလ(၈)ရက်တွင် အတည်ပြုပြောကြားခဲ့သည်။

အမေရိကန်ရေတပ် နှင့် အခြားကုန်တင်သင်္ဘောများကို ခြိမ်းခြောက်နေသည့် တိုက်ခိုက်မှုများကိုလုပ်ဆောင်ရန် ဟူသီလက်နက်ကိုင်အဖွဲ့က ပြင်ဆင်နေချိန်တွင် ယခုကဲ့သို့တိုက်ခိုက်မှုများကို လုပ်ဆောင်ခဲ့ခြင်းဖြစ်ကြောင်း အမေရိကန်စစ်တပ်က ပြောကြားခဲ့သည်။

အမေရိကန်ဗဟိုကွပ်ကဲမှုဌာနချုပ် CENTCOM က "အမေရိကန်တပ်ဖွဲ့တွေဟာ ဖေဖော်ဝါရီလ(၈)ရက် အစောပိုင်းမှာ ပင်လယ်နီအတွင်းမှာရှိတဲ့သင်္ဘောတွေကို တိုက်ခိုက်မှုတွေ လုပ်ဆောင်ဖို့ ပြင်ဆင်ထားတဲ့ ဟူသီ လက်နက်ကိုင်အဖွဲ့ရဲ့ သင်္ဘောဖျက်ဒုံးကျည်(၇)စင်းနဲ့ ဒရုန်း(၄)စင်းတို့ကို တိုက်ခိုက်မှု(၇)ကြိမ် ပြုလုပ်ခဲ့ပါတယ်။ အဲဒီဒုံးကျည်တွေနဲ့ ဒရုန်းတွေကို ဟူသီလက်နက်ကိုင်အဖွဲ့ထိန်းချုပ်ထားတဲ့နယ်မြေတွေမှာ ဖော်ထုတ်နိုင်ခဲ့တာဖြစ် ပြီး ဒေသတွင်းက အမေရိကန်ရေတပ်သင်္ဘောနဲ့ ကုန်တင်သင်္ဘောတွေအပေါ် ကျရောက်တော့မယ့် ခြိမ်းခြောက်မှု တွေကို တားဆီးနိုင်ခဲ့ပါတယ်" ဟု ပြောခဲ့သည်။

ဖေဖော်ဝါရီလ(၇)ရက် နှောင်းပိုင်းတွင်လည်း ယီမင်အခြေစိုက်ဟူသီလက်နက်ကိုင်အဖွဲ့ကို တိုက်ခိုက်မှုများ လုပ်ဆောင်ခဲ့ကြောင်း အမေရိကန်စစ်တပ်က သတင်းထုတ်ပြန်ခဲ့ပြီးနောက် အဆိုပါတိုက်ခိုက်မှု ထပ်မံထွက်ပေါ် လာခြင်းဖြစ်သည်။ CENTCOM က "ဒီတိုက်ခိုက်မှုတွေဟာ ရေကြောင်း လွတ်လပ်စွာသွားလာခွင့်နဲ့ နိုင်ငံတကာ ရေပိုင်နက်တွေကို လုံခြုံအောင် ကာကွယ်ပေးပါလိမ့်မယ်။ ပြီးတော့ ဒေသတွင်းက အမေရိကန်ရေတပ် သင်္ဘောတွေနဲ့ အခြားကုန်တင်သင်္ဘောတွေကိုလည်း ပိုမိုလုံခြုံစေပါလိမ့်မယ်" ဟု သတင်းထုတ်ပြန်ထားသည်။

အစ္စရေး-ဟားမက်စစ်ပွဲ စတင်ဖြစ်ပွားပြီးနောက် ဂါဇာကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံသည့်အနေဖြင့် အစ္စရေးနှင့်ဆက်နွယ်နေသောသင်္ဘောများကို တိုက်ခိုက်မှုများ လုပ်ဆောင်နေခြင်းဖြစ် ကြောင်း ဟူသီလက်နက်ကိုင်အဖွဲ့က ပြောကြားခဲ့သည်။ ထို့အပြင် ဟူသီလက်နက်ကိုင်အဖွဲ့သည် ပင်လယ်နီ အတွင်း သွားလာနေသောသင်္ဘောများကို ပြီးခဲ့သည့်နှစ် နိုဝင်ဘာလတည်းက တိုက်ခိုက်မှုများ စတင်လုပ်ဆောင်ခဲ့ခြင်းဖြစ်ကြောင်းလည်း သိရသည်။