ဂျန်ဇက် (NSS) - ဖေဖော်ဝါရီ ၇ 

အီရတ်နိုင်ငံရှိ အမေရိကန်ဦးဆောင်သော ညွန့်ပေါင်းတပ်ဖွဲ့၏ အနာဂတ်အတွက် နှစ်နိုင်ငံလုံးသည် ဆွေးနွေးပွဲများကို ပြန်လည်လုပ်ဆောင်ရန်လိုအပ်ကြောင်း အီရတ်နိုင်ငံခြားရေးဝန်ကြီး ဖူဟတ်ဒ်ဟူစိန်က ပြောကြားခဲ့သည်။

အီရတ်နိုင်ငံခြားရေးဝန်ကြီးဖူဟတ်ဒ်ဟူစိန်သည် အမေရိကန်နိုင်ငံခြားရေးဝန်ကြီးအန်တိုနီဘလင်ကန် နှင့် ဖုန်းခေါ်ဆိုမှုအတွင်း ယခုကဲ့သို့ ထုတ်ဖော်ပြောဆိုခဲ့ခြင်းဖြစ်ကြောင်း သိရသည်။ 

အီရတ် နှင့် အမေရိကန်နိုင်ငံကြား ဆွေးနွေးပွဲများကို ဇန်နဝါရီလတွင် စတင်ခဲ့သော်လည်း (၂၄)နာရီ မပြည့်မီအချိန်အတွင်း ဂျော်ဒန်နိုင်ငံရှိ အမေရိကန်တပ်ဖွဲ့ဝင်များ တိုက်ခိုက်ခံရကာ တပ်ဖွဲ့ဝင်သုံးဦး သေဆုံးခဲ့ပြီးနောက် ဆွေးနွေးပွဲများကို ရပ်ဆိုင်းထားခဲ့ခြင်းဖြစ်ကြောင်း သိရသည်။ အဆိုပါတိုက်ခိုက်မှုကို ဆီးရီးယား နှင့် အီရတ်တို့ရှိ အီရန်ကျောထောက်နောက်ခံပြုစစ်သွေးကြွအဖွဲ့များက လုပ်ဆောင်ခဲ့ခြင်းဖြစ်ကြောင်း အမေရိကန်အစိုးရက ပြောခဲ့သည်။

ထို့နောက် အမေရိကန်စစ်တပ်သည် ဂျော်ဒန်နိုင်ငံတွင်ဖြစ်ပွားခဲ့သော တိုက်ခိုက်မှုကို လက်တုံ့ပြန်သည့်အနေဖြင့် ဖေဖော်ဝါရီလ(၂)ရက်တွင် အီရတ်နှင့်ဆီးရီးယားတို့ရှိ အီရန်စစ်တပ်အပြင် ၎င်းတို့နှင့်ဆက်နွယ်နေသော စစ်သွေးကြွအဖွဲ့များ၏ ပစ်မှတ်(၈၅)ခုကျော်ကို လေကြောင်းမှ တိုက်ခိုက်မှုများ လုပ်ဆောင်ခဲ့ကြောင်း သိရသည်။

အီရတ်နိုင်ငံခြားရေးဝန်ကြီးဖူဟတ်ဒ်ဟူစိန်က "အီရတ်နိုင်ငံဟာ ပြိုင်ဘက်နိုင်ငံတွေကြားဖြစ်ပွားနေတဲ့ ပြဿနာတွေကို ဖြေရှင်းဖို့အတွက် နေရာတစ်ခုမဟုတ်ပါဘူး" ဟု ပြောခဲ့သည်။

အီရတ်နိုင်ငံတွင် အမေရိကန်တပ်ဖွဲ့ဝင်(၂၅ဝဝ)ရှိပြီး ISIS အကြမ်းဖက်အဖွဲ့ ပြန်လည်ထကြွလာမှုကို တားဆီးရန်အတွက် ဒေသတွင်းတပ်ဖွဲ့များကို အကြံများနှင့် အကူအညီများပေးခြင်းတို့ကို လုပ်ဆောင်နေကြောင်း သိရသည်။ 

ဥရောပနိုင်ငံအများစုမှ ရာနှင့်ချီသော တပ်ဖွဲ့ဝင်များသည်လည်း မဟာမိတ်ညွန့်ပေါင်းအဖွဲ့တွင် တစ်စိတ် တစ်ပိုင်းအဖြစ် ပါဝင်ကြောင်းလည်း သိရသည်။ အီရတ်အစိုးရသည် လေ့ကျင့်ရေးနှင့် စက်ပစ္စည်းကိရိယာ တို့တွင် စစ်ရေးပူးပေါင်းဆောင်ရွက်မှု အပါအဝင် ညွန့်ပေါင်းအဖွဲ့ဝင်နိုင်ငံများ နှင့် အပြန်အလှန် ဆက်ဆံရေးများ ထူထောင်ရန် စိတ်အားထက်သန်နေကြောင်းလည်း သိရသည်။

ထို့အပြင် အီရတ်ဘဏ် အများအပြားအပေါ် ချမှတ်ထားသော ပိတ်ဆို့အရေးယူမှုများကို ပြန်လည်သုံးသပ် ရန် အမေရိကန်နိုင်ငံခြားရေးဝန်ကြီးဌာနကို ဖူဟတ်ဒ်ဟူစိန်က တောင်းဆိုခဲ့ကြောင်းလည်း သိရသည်။ 

ပြီးခဲ့သည့်နှစ် ဇူလိုင်လတွင် အမေရိကန်အစိုးရသည် အမေရိကန်ဒေါ်လာ တရားမဝင်သုံးစွဲခြင်းကို နှိမ်နှင်းမှုတစ်စိတ်တစ်ပိုင်းအဖြစ် အီရတ်ဘဏ်(၁၄)ခုကို ဒေါ်လာလွှဲပြောင်းမှုပြုလုပ်ခြင်းမှ တားမြစ်ခဲ့ ကြောင်းလည်း သိရသည်။