ဂျန်ဇက် (NSS) - ဇန်နဝါရီ ၃၁ 

မြန်မာနိုင်ငံသည် ၂ဝ၂၃ ခုနှစ်အတွင်း ကမ္ဘာ့နိုင်ငံများအနက် အကျင့်ပျက်လာဘ်စားမှုဆိုင်ရာအညွှန်းကိန်း (CPI) ကမ္ဘာအဆင့်သတ်မှတ်ချက်တွင်အဆင့် ၁၆၂ နေရာ၌ အာဖန်ဂန်နစ္စတန်နိုင်ငံ၊ ဆူဒန်နိုင်ငံ၊ ဘူရမ်ဒီနိုင်ငံ၊ ချက်ဒ်၊ တာဂျစ်ကစ္စတန်၊ ကိုမိုရိုစ့်နိုင်ငံ၊ ကွန်ဂိုနိုင်ငံတို့နှင့် အတူရပ်လျက်ရှိနေကြောင်း သိရသည်။ 

Transparency International အဖွဲ့သည် ဇန်နဝါရီ ၃ဝ ရက်တွင် ၂ဝ၂၃ ခုနှစ်အတွက် အကျင့်ပျက်လာဘ်စားမှု ဆိုင်ရာအညွှန်းကိန်း (CPI) ကမ္ဘာ့အဆင့်သတ်မှတ်ချက်ကို ဖော်ပြခဲ့ပြီး  နိုင်ငံပေါင်း ၁၈ဝ ကို အမှတ်ပေးကာ ကမ္ဘာ့အဆင့်သတ်မှတ်ခဲ့ခြင်းဖြစ်သည်။ မြန်မာနိုင်ငံသည် ၂ဝ၂၃ ခုနှစ်အတွက် အကျင့်ပျက်လာဘ်စားမှုဆိုင်ရာ အညွှန်းကိန်း (CPI) တွင် ရမှတ် ၂ဝ သာရရှိခဲ့ပြီး ၂ဝ၂၂ ခုနှစ်နှင့်နှိုင်းယှဉ်လျှင် ၃ မှတ် လျော့နည်းခဲ့ကြောင်း သိရသည်။

မြန်မာနိုင်ငံသည် အာဆီယံဒေသအတွင်းနိုင်ငံများအနက် ရမှတ်အနည်းဆုံးဖြစ်နေပြီး အကျင့်ပျက်လာဘ်စားမှု အများဆုံးနိုင်ငံအဖြစ် သတ်မှတ်ခံခဲ့ရကြောင်း သိရသည်။ ၂ဝ၂၃ ခုနှစ်အတွက် အကျင့်ပျက်လာဘ်စားမှုဆိုင်ရာ အညွှန်းကိန်း (CPI) ကမ္ဘာ့အဆင့်သတ်မှတ်ချက် ထိပ်ဆုံးနိုင်ငံများစာရင်းတွင် ဒိန်းမတ်၊ ဖင်လန်၊ နယူးဇီလန်နိုင်ငံ တို့ ရပ်တည်နေပြီး အဆင့်သတ်မှတ်ချက် အောက်ဆုံးနိုင်ငံများစာရင်းတွင် တောင်ဆူဒန်၊ ဆိုမာလီယာ၊ ဗင်နီဇွဲလား၊ ဆီးရီးယားနိုင်ငံတို့ ရပ်တည်နေကြောင်း သိရသည်။ အာဆီယံဒေသအတွင်းနိုင်ငံများအနက် စင်ကာပူ၊ မလေးရှား တို့က ထိပ်ဆုံးတွင်ရှိနေပြီး မြန်မာ၊ လာအိုနိုင်ငံတို့က အောက်ဆုံးတွင် ရပ်တည်နေကြောင်း သိရသည်။