Pika (NSS) - ဇန်နဝါရီ ၂၅ 

တရုတ်နိုင်ငံ အလယ်ပိုင်း Jiangxi ပြည်နယ်ရှိ စတိုးဆိုင်တစ်ဆိုင်တွင် ဇန်နဝါရီလ(၂၄)ရက်က မီးလောင်မှုဖြစ်ပွားခဲ့ရာ အနည်းဆုံးလူ(၃၉)ဦးသေဆုံးခဲ့ပြီး၊ အခြားလူ(၉)ဦး ထိခိုက်ဒဏ်ရာရရှိခဲ့ကြောင်း နိုင်ငံပိုင်မီဒီယာများက ဖော်ပြခဲ့သည်။

CCTV သတင်းဌာနက "ဇန်နဝါရီလ(၂၄)ရက် ညနေ(၃)နာရီ (၂၄)မိနစ်မှာ  Jiangxi ပြည်နယ် Xinyu မြို့မှာရှိတဲ့ မြေညီထပ်စတိုးဆိုင်တစ်ခုမှာ မီးလောင်ကျွမ်းမှုဖြစ်ပွားခဲ့ပါတယ်။ လက်ရှိအချိန်အထိတော့ အနည်းဆုံး လူ(၃၉)ဦး သေဆုံးခဲ့ပြီး အခြားလူ(၉)ဦး ထိခိုက်ဒဏ်ရာရရှိခဲ့ပါတယ်။ ပြီးတော့ အခြားလူအများအပြားက ပိတ်မိနေတုန်းပါပဲ" ဟု ဖော်ပြခဲ့သည်။

မီးလောင်ကျွမ်းမှု ဘာကြောင့်ဖြစ်ပွားရသည်ဆိုသည့်အချက် နှင့် လူမည်မျှ အန္တရာယ်ရှိနေဆဲဖြစ်သည်ဆိုသည့် အချက်တို့ကို လက်ရှိအချိန်အထိ သတင်းထုတ်ပြန်ခြင်းမျိုး မရှိသေးကြောင်း သိရသည်။ မီးလောင်ကျွမ်းမှုဖြစ်ပွား ပြီးနောက် ထုတ်ပြန်ချက်တစ်ခုတွင် နိုင်ငံအတွင်းဖြစ်ပွားနေသော လူအသေအပျောက်များသည့် မတော်တဆမှုများ ကို တားဆီးရန် တရုတ်သမ္မတရှီကျင့်ဖျင်က တိုက်တွန်းခဲ့ကြောင်း သိရသည်။ 

"ပြည်သူတွေရဲ့အသက်အိုးအိမ်စည်းစိမ်တွေ လုံခြုံရေးနဲ့ လူမှုဘဝတည်ငြိမ်ရေးတို့ကို အာမခံဖို့အတွက် မကြာခဏ ဖြစ်ပွားနေတဲ့ လူအသေအပျောက်များတဲ့မတော်တဆမှုတွေကိုတားဆီးဖို့ သမ္မတရှီကျင့်ဖျင်က တိုက်တွန်းခဲ့ပါ တယ်" ဟု CCTV က ရေးသားဖော်ပြခဲ့သည်။

CCTV သတင်းဌာန၏ အွန်လိုင်းပေါ်တွင်တင်ထားသော ဗီဒီယိုဖိုင်ထဲတွင် မီးသတ်ကားများနှင့် အရေးပေါ်တုံ့ပြန်ရေး ယာဉ်အများအပြားသည် အခင်းဖြစ်ပွားရာနေရာတွင် ရောက်ရှိနေသည်ကိုလည်း တွေ့မြင်ခဲ့ရသည်။ ထုတ်ပြန်ချက် တစ်ခုတွင် "လက်ရှိအချိန်မှာတော့ အခင်းဖြစ်ပွားရာနေရာမှာ ရှာဖွေရေးနဲ့ကယ်ဆယ်ရေးလုပ်ငန်းတွေကို ဆက်လက်လုပ်ဆောင်နေပါတယ်။ မီးလောင်မှုဖြစ်ပွားရတဲ့အကြောင်းအရင်းတွေကို ဆက်လက်စုံစမ်းစစ်ဆေးနေ ဆဲဖြစ်ပါတယ်" ဟု ရေးသားထားသည်။

တရုတ်နိုင်ငံတွင် ဘေးကင်းရေးစံနှုန်းများ နည်းပါးမှု နှင့် စည်းကမ်းလိုက်နာမှုမရှိခြင်းတို့ကြောင့် မီးလောင်ကျွမ်းမှု နှင့် လူအသေအပျောက်များသော မတော်တဆမှုများ မကြာခဏဖြစ်ပွားလေ့ရှိကြောင်း သိရသည်။