Pika (NSS) - ဇန်နဝါရီ ၂၅ 

ယီမင်အခြေစိုက် ဟူသီလက်နက်ကိုင်အဖွဲ့သည် ဇန်နဝါရီလ(၂၄)ရက်တွင် ပင်လယ်နီအတွင်းရှိ အမေရိကန် အလံတင်ကုန်တင်သင်္ဘောနှစ်စီးကို ဒုံးကျည်များဖြင့် ပစ်ခတ်တိုက်ခိုက်ခဲ့ကြောင်း အမေရိကန်အစိုးရက  ပြော ကြားခဲ့သည်။ 

သို့သော်လည်း ဟူသီလက်နက်ကိုင်အဖွဲ့ပစ်လွှတ်လိုက်သော ဒုံးကျည်(၃)စင်းအနက် နှစ်စင်းကို ကြားဖြတ် ဟန့်တားနိုင်ခဲ့ပြီး တစ်စင်းမှာ ပစ်မှတ်ကို ထိမှန်ခြင်းမျိုးမရှိခဲ့ကြောင်း အမေရိကန်အစိုးရက ထပ်မံပြောကြားခဲ့ သည်။ 

ပြီးခဲ့သည့်သီတင်းပတ်များအတွင်း အမေရိကန်နှင့် ဗြိတိန်တပ်ဖွဲ့တို့သည် ဟူသီလက်နက်ကိုင်အဖွဲ့၏ ကုန်တင် သင်္ဘောများအား ပစ်မှတ်ထားတိုက်ခိုက်နိုင်စွမ်းကို လျော့ကျစေရန်အတွက် ပူးပေါင်းတိုက်ခိုက်မှုများကို နှစ်ကြိမ် လုပ်ဆောင်ခဲ့ကြောင်းလည်း သိရသည်။ ထို့အပြင် အမေရိကန်တပ်ဖွဲ့များသည် ကုန်တင်သင်္ဘောများကို ပစ်မှတ် ထားတိုက်ခိုက်ရန်အတွက် ပြင်ဆင်ထားသော ဟူသီလက်နက်ကိုင်အဖွဲ့၏ ဒုံးကျည်များကို လေကြောင်းမှ တိုက်ခိုက်မှုများလုပ်ဆောင်ကာ ဖျက်ဆီးပစ်ခဲ့ကြောင်းလည်း သိရသည်။

သို့သော်လည်း ပင်လယ်နီအတွင်းရှိ ကုန်တင်သင်္ဘောများကို တိုက်ခိုက်မှုများအား ဆက်လက်လုပ်ဆောင်သွားမည် ဖြစ်ကြောင်း ဟူသီလက်နက်ကိုင်အဖွဲ့က ကတိပြုခဲ့သည်။ 

"ဟူသီလက်နက်ကိုင်အဖွဲ့ဟာ ပင်လယ်နီတောင်ပိုင်းမှာရှိတဲ့ ကုန်တင်သင်္ဘောနှစ်စီးကို ဒုံးကျည်တွေနဲ့ ပစ်ခတ် တိုက်ခိုက်ခဲ့ပါတယ်။ အမေရိကန်ရေတပ်ဖျက်သင်္ဘောဟာ ဒုံးကျည်နှစ်စင်းကို ကြားဖြတ်ဟန့်တားကာ ပစ်ချနိုင်ခဲ့ ပြီး အခြားဒုံးကျည်တစ်စင်းကတော့ ပစ်မှတ်ကို ထိမှန်ခဲ့ခြင်းမျိုး မရှိပါဘူး။ ဟူသီလက်နက်ကိုင်အဖွဲ့ဟာ ဒီတိုက်ခိုက်မှုတွေကို ဆက်လက်လုပ်ဆောင်နိုင်ဖွယ်ရှိနေတယ်ဆိုတာ ရှင်းရှင်းလင်းလင်းသိသာပါတယ်။ ပြီးတော့ ကုန်တင်သင်္ဘောတွေကို ကာကွယ်ဖို့ ကျွန်တော်တို့လုပ်ရမယ့်အရာတွေကို ဆက်လက်လုပ်ဆောင်သွားမှာပါ" ဟု အမေရိကန်အမျိုးသားလုံခြုံရေးကောင်စီပြောရေးဆိုခွင့်ရှိသူဂျွန်ကာဘိုင်က ပြောဆိုခဲ့သည်။

အမေရိကန်ဗဟိုကွပ်ကဲမှုဌာနချုပ် CENTCOM က "ဟူသီလက်နက်ကိုင်အဖွဲ့ရဲ့တိုက်ခိုက်မှုအတွင်း သင်္ဘောနဲ့ အမှုထမ်းတွေ ထိခိုက်ဒဏ်ရာရရှိ/ပျက်စီးတာတွေနဲ့ပတ်သက်တဲ့အစီရင်ခံစာတွေ မရှိသေးပါဘူး" ဟု ထုတ်ပြန် ပြောခဲ့သည်။

ဟူသီလက်နက်ကိုင်အဖွဲ့သည် ပင်လယ်နီအတွင်းရှိ ကုန်တင်သင်္ဘောများကို တိုက်ခိုက်မှုများအား ပြီးခဲ့သည့်နှစ် နိုဝင်ဘာလတွင် စတင်လုပ်ဆောင်ခဲ့ခြင်းဖြစ်ကြောင်း သိရသည်။ အစ္စရေး-ဟားမက်စစ်ပွဲ စတင်ဖြစ်ပွားပြီးနောက် ဂါဇာကမ်းမြောင်ဒေသရှိပါလက်စတိုင်းလူမျိုးများကိုထောက်ခံသည့်အနေဖြင့် အစ္စရေးနှင့်ဆက်နွယ်နေသော သင်္ဘောများကို ပစ်မှတ်ထားတိုက်ခိုက်ခဲ့ခြင်းဖြစ်ကြောင်း ဟူသီလက်နက်ကိုင်အဖွဲ့က ပြောခဲ့သည်။