မျိုးကြီး (NSS) - ဇန်နဝါရီ ၁၉

ဘက်မလိုက်လှုပ်ရှားမှုအဖွဲ့အနေဖြင့် ဖွံ့ဖြိုးဆဲနိုင်ငံများ၏ ဘုံအကျိုးစီးပွားအတွက် အရေးပါသောအဖွဲ့အဖြစ် ဆက်လက်ရပ်တည်သွားရန် လိုအပ်ကြောင်း နိုင်ငံခြားရေးဝန်ကြီး ဦးသန်းဆွေက တိုက်တွန်းပြောကြားသည်။

ယူဂန်ဒါနိုင်ငံ၊ ကမ်ပါလာမြို့၌ ဇန်နဝါရီလ ၁၇ ရက်တွင် ကျင်းပသည့် ဘက်မလိုက်လှုပ်ရှားမှုအဖွဲ့၏ နိုင်ငံခြား ရေးဝန်ကြီးများ အစည်းအဝေးတွင် ၎င်းက အထက်ပါကဲ့သို့ တိုက်တွန်းခဲ့ခြင်းဖြစ်သည်။

အဆိုပါအစည်းအဝေး၌ နစက၏ နိုင်ငံခြားရေးဝန်ကြီးဦးသန်းဆွေက မိန့်ခွန်းပြောကြားရာတွင် လက်ရှိ ကမ္ဘာကြီးသည် အပြည်ပြည်ဆိုင်ရာလုံခြုံရေးကိစ္စရပ်များအပါ အဝင် ဘက်ပေါင်းစုံ၌ စိန်ခေါ်မှုများနှင့် ရင်ဆိုင်တွေ့ကြုံနေရလျက်ရှိသည်ဟု ထည့်သွင်းပြောကြားခဲ့သည်။

ထို့ပြင် ဘက်မလိုက်လှုပ်ရှားမှုအဖွဲ့အနေဖြင့် ဖွဲ့ဖြိုးဆဲနိုင်ငံများအားလုံး၏ ဘုံအကျိုးစီးပွားအတွက် အရေးပါသောအဖွဲ့ကြီးအဖြစ် ဆက်လက်ရပ်တည်သွားရန်လိုအပ်ကြောင်းလည်း ဝန်ကြီးဦးသန်းဆွေက တိုက်တွန်းခဲ့သည်။

မြန်မာနိုင်ငံသည် ဘက်မလိုက်လှုပ်ရှားမှုအဖွဲ့၏ မူဝါဒများကို လိုက်နာလျက်ရှိပြီး ငြိမ်းချမ်းရေး၊ သာယာဝ ပြောရေး၊ တရားမျှတမှု၊ တန်းတူညီတူရှိမှုနှင့် ဖွံ့ဖြိုးတိုးတက်ရေးတို့ကို အခြားသောဘက်မလိုက်လှုပ်ရှားမှုအဖွဲ့ဝင်နိုင်ငံများဖြင့် လက်တွဲဆောင်ရွက်သွားမည်ဟုလည်း ၎င်းက ထပ်မံပြောကြားသည်။

အဆိုပါဘက်မလိုက်လှုပ်ရှားမှုအဖွဲ့၏ နိုင်ငံခြားရေးဝန်ကြီးများအစည်းအဝေးတွင် ကုလသမဂ္ဂလုံခြုံရေးကောင်စီ ပြုပြင်ပြောင်းလဲရေးနှင့် ဆင်းရဲနွမ်းပါးမှုလျှော့ ချရေးဆိုင်ရာကိစ္စရပ်များကိုလည်း အဖွဲ့ဝင်နိုင်ငံများက ထည့်သွင်းဆွေးနွေးခဲ့ကြောင်း သိရသည်။

ဘက်မလိုက်လှုပ်ရှားအဖွဲ့ကို ဖွံ့ဖြိုးဆဲနိုင်ငံများ၏ အကျိုးစီးပွားမြှင့်တင်ရေးအတွက် ၁၉၆၁ ခုနှစ်တွင် စတင်ဖွဲ့စည်းထူထောင်ခဲ့ခြင်းဖြစ်ကြောင်း သိရသည်။

မြန်မာနိုင်ငံသည် ၎င်းအဖွဲ့အား စတင်ထူထောင်ချိန်တွင် အဖွဲ့ဝင်နိုင်ငံတစ်နိုင်ငံအဖြစ် ပါဝင်ခဲ့ကြောင်းသိရပြီး လက်ရှိတွင် ယင်းအဖွဲ့၌ အဖွဲ့ဝင်နိုင်ငံပေါင်း (၁၂၀)ရှိကြောင်း သိရသည်။