ယွန်း (NSS) - ဇန်နဝါရီ ၁၁

ပြည်တွင်း၌ ကိုဗစ်-‌၁၉ ရောဂါ ဗီဇပြောင်းမျိုးကွဲသစ်(၃)မျိုး ထပ်မံတွေ့ရှိခဲ့ကြောင်း ကျန်းမာရေးဝန်ကြီးဌာနမှ ယမန်နေ့ (ဇန်နဝါရီလ ၁၀ ရက်)တွင် ထုတ်ပြန်ထားသည်။

ကျန်းမာရေးဝန်ကြီးဌာနအောက်ရှိ ဆေးသုတေသနဦးစီးဌာနသည် အမျိုးသားကျန်းမာရေးဓာတ်ခွဲမှုဆိုင်ရာဌာနမှ ပေးပို့သော ကိုဗစ်-၁၉ ရောဂါ ဓာတ်ခွဲအတည်ပြုလူနာများ၏ ဓာတ်ခွဲနမူနာ(၁၈)ခုကို ပြီးခဲ့သည့် ဒီဇင်ဘာလ(၂၈)ရက်မှစ၍ မျိုးဗီဇတစ်ခုလုံးစစ်ဆေးမှု(Whole Genome Sequencing)ကို ဆောင်ရွက်ခဲ့ကြသည်။

ထိုသို့ ဆောင်ရွက်ခဲ့ရာ ဓာတ်ခွဲနမူနာ(၁၆)ခုတွင် ကိုဗစ်-၁၉ ရောဂါဗီဇပြောင်းမျိုးကွဲများတွေ့ရှိခဲ့ပြီး စင်ကာပူနိုင်ငံမှ ပြန် လည်ရောက်ရှိသူများမှ ဓာတ်ခွဲနမူနာ(၃)ခုနှင့် ပြည်တွင်းကူးစက်မှုများမှ ဓာတ်ခွဲနမူနာ(၁၃)ခုတို့တွင် တွေ့ရှိခဲ့ခြင်းဖြစ် ကြောင်း သိရသည်။

အဆိုပါ ကိုဗစ်-၁၉ ရောဂါ ဗီဇပြောင်းမျိုးကွဲများသည် SARS-CoV-2 Omicron Variant များဖြစ်ပြီး စင်ကာပူနိုင်ငံမှ ပြန်လည်ရောက်ရှိလာသူ(၃)ဦးတွင် Omicron HV.1၊ JN.1 နှင့် EG.5.1.8 variants တို့ကိုလည်းကောင်း၊ ပြည်တွင်းကူးစက်ဖြစ်ပွားသူ (၁၃) ဦးတွင် Omicron JN.1 (၁၁) ဦးနှင့် XBB.1.16.17 (၂)ဦးတို့ကိုလည်းကောင်း အသီးသီးတွေ့ရှိခဲ့ကြောင်း ကျန်းမာရေးဝန် ကြီးဌာနက အသိပေးထားသည်။

“နိုင်ငံတကာမှာ မျိုးစိတ်ကွဲတွေထွက်လာပြီဆိုရင် ကျွန်တော်တို့ဆီကိုလည်း အနှေးနဲ့အမြန်ရောက်လာတတ်ပါတယ်။ အခုတွေ့တာတွေကလည်း နိုင်ငံတကာမှာတော့ တွေ့ပြီးသားပဲ။ မြန်မာနိုင်ငံကိုခုမှရောက်လာတဲ့သဘောပေါ့။ မျိုးစိတ်သစ်ရဲ့ သဘောကတော့ ကူးစက်မှုနှုန်းပိုမြန်တယ်။ ကူးစက်ခံရတဲ့သူကလည်း ကာကွယ်ဆေးထိုးမထားတာမျိုးတွေ၊ အသက်ကြီးတဲ့သူတွေ၊ ရောဂါအခံရှိတဲ့သူတွေဆိုရင် ပိုပြီးတော့ခံစားရတာပေါ့။ ဒါကြောင့် ကျန်းမာရေးဝန်ကြီးဌာနက ကာကွယ်ဆေး update  ဖြစ်အောင် (၆)လတစ်ကြိမ်ထိုးပေးတာကို မဖြစ်မနေထိုးထားသင့်ပါတယ်”ဟု ကျန်းမာရေးဝန်ကြီးဌာန၊ ကုသရေးဦးစီးဌာနမှူး ဒေါက်တာသန်းနိုင်စိုးက NSS ကိုပြောသည်။

ယခုတွေ့ရှိရသော SARS-CoV-2 Omicron Variant များတွင် HV.1၊ JN.1 နှင့် EG.5.1.8 တို့သည် မြန်မာနိုင်ငံတွင် အသစ်ထပ်မံတွေ့ရှိသည့် ကိုဗစ်-၁၉ ရောဂါ ဗီဇပြောင်းမျိုးကွဲ (Newly Detected Variants In Myanmar) ဖြစ်ကြောင်း ကျန်းမာရေးဝန်ကြီးဌာနက ထုတ်ပြန်ထားသည်။

သို့သော် ကမ္ဘာ့ကျန်းမာရေးအဖွဲ့၏ ထုတ်ပြန်ချက်များအရ အသစ်တွေ့ရှိရသော ကိုဗစ်(၁၉)ရောဂါ ဗီဇပြောင်းမျိုးကွဲ JN.1 သည် EG.5 ကဲ့သို့ ကျန်းမာရေး ထိခိုက်မှုအန္တရာယ်ဖြစ်နိုင်ခြေနည်းပါးပြီး ၎င်းဗီဇပြောင်းမျိုးကွဲပိုးသည် ကူးစက်ပျံ့နှံ့မှုမြင့်တက်လာသော်လည်း ရောဂါပြင်းထန်မှုမရှိကြောင်း သိရသည်။ 

ကိုဗစ်-၁၉ ရောဂါကာကွယ်ဆေးထိုးနှံခြင်းသည် ရောဂါပြင်းထန်မှုမှ ကာကွယ်ရန်ထိရောက်မှုရှိခြင်းကြောင့် ပြည်သူများအနေဖြင့် ကိုဗစ်-၁၉ ရောဂါ ကာကွယ်ဆေးထိုးနှံမှုကို ခံယူသင့်ကြောင်း ကျန်းမာရေးဝန်ကြီးဌာနမှ တိုက်တွန်းထားသည်။