ကျော်(NSS) - ဇန်နဝါရီ ၉

ရန်ကုန်-မန္တလေးအမြန်လမ်းမကြီး၏ ပလွေးအမြန်လမ်းမီးသတ်စခန်းအပိုင်တွင် ပန်းဂေါ်ဖီထုတ်များတင်လာသည့် (၆)ဘီးကားက အဝတ်အထည်များတင်လာသော (၆) ဘီးကားကိုနောက်မှဝင်တိုက်မိခဲ့မှုဖြစ်ပွားခဲ့ကြောင်း သိရသည်။

ဖြစ်စဉ်သည် ယမန်နေ့ (ဇန်နဝါရီလ ၈ ရက်)၊ ည ၁ နာရီခန့်က အမြန်လမ်းမကြီး၏ ပလွေးအမြန်လမ်းမီးသတ်တပ်ဖွဲ့စခန်းအပိုင် မိုင်တိုင်အမှတ် ၂၀၂/၆ နှင့် ၂၀၂/၇ ကြားတွင် ဖြစ်ပွားခဲ့ကြောင်း အမြန်လမ်းမီးသတ်တပ်ဖွဲ့စခန်းထံမှ သိရသည်။

မန္တလေးဘက်မှနေပြည်တော်ဘက်သို့ ပန်းဂေါ်ဖီထုတ်များတင် ဆောင်လာသည့် Isuzu Forwoard (ဖြူ/ပြာရောင်) (၆)ဘီးကုန်တင်ကားမောင်းသူသည် အခင်းဖြစ်နေရာအရောက်၌ အိပ်ငိုက်ပြီး ရှေ့မှအဝတ်အထည်များတင်ဆောင်ကာ မောင်းနှင်နေသော Nissan Condor (အဖြူရောင်) (၆) ဘီးကုန်တင်ကား၏ နောက် ပိုင်းကို အရှိန်မထိန်းနိုင်ဘဲဝင်တိုက်မိခဲ့ကြောင်း သိရသည်။

"ပုဆိုးနဲ့အဝတ်အထည်တွေတင်လာတဲ့ ၆ ဘီးကားကို ပန်းဂေါ်ဖီထုတ်တွေသယ်လာတဲ့ကားရဲ့ ယာဉ်မောင်းက အိပ်ငိုက်ပြီးအရှိန်မထိန်းနိုင်ဘဲဝင်တိုက်မိတာ။ တိုက်ခံရတဲ့ကားက တစ်ပတ်လည်ပြီးမှောက်သွားတယ်။ ပြီးတော့လမ်းဘေးမြေသားလမ်းပေါ်ရောက်သွားပါတယ်။ ဝင်တိုက်တဲ့ကားက အရှိန်မထိန်းနိုင်ဘဲ လမ်းဘေးက ကုက္ကိုပင်ကို ဝင်တိုက်မိပြီးရပ်သွားပါတယ်"ဟု အမြန်လမ်းမီးသတ်တပ်ဖွဲ့စခန်းမှတာဝန်ရှိသူတစ်ဦးက NSS ကိုပြောသည်။

ဖြစ်စဥ်ကြောင့် ပန်းဂေါ်ဖီထုတ်များတင်လာသည့်ကားပေါ်မှ ယာဉ်မောင်း နှင့်ယာဥ်နောက်လိုက်တို့တွင် ထိခိုက်ဒဏ်ရာများရရှိခဲ့ကြောင်း သိရသည်။ 

"အဝတ်အထည်တွေတင်လာတဲ့ကားပေါ်က ၂ ယောက်က ဒဏ်ရာရတာမရှိပါဘူး။ ပန်းဂေါ်ဖီထုတ်တွေတင်လာတဲ့ကားက ကုက္ကိုပင်ကိုဝင်တိုက်မိတဲ့အတွက် ကားမောင်းတဲ့လူရယ်၊ ယာဥ်နောက်လိုက်ရယ်ဒဏ်ရာရခဲ့ပါတယ်"ဟု အမြန်လမ်းမီးသတ်တပ်ဖွဲ့၏ တာဝန်ရှိသူတစ်ဦးက ပြောသည်။

ထို့ကြောင့် ထိခိုက်ဒဏ်ရာရသူ ၂ ဦးအား ပလွေးအမြန်လမ်းမီးသတ်တပ်ဖွဲ့စခန်းပိုင်လူနာတင်ကားဖြင့် နေပြည်တော်ခုတင် (၁၀၀၀)ဆေးရုံကြီးသို့ ပို့ဆောင်ပေးခဲ့ကြကြောင်း သိရသည်။

ရန်ကုန်-မန္တလေးအမြန်လမ်းမကြီးပေါ် သီးကုန်းအမြန်လမ်းမီးသတ်တပ်ဖွဲ့စခန်းအပိုင် မိုင်တိုင်အမှတ် ၃၀၂/၂ နှင့် ၃၀၂/၁ ကြားတွင် ပြီးခဲ့သည့် ဇန်နဝါရီလ ၆ ရက်၊ ည ၆ နာရီခန့်ကလည်း အမျိုးသမီးတစ်ဦးမောင်းနှင်လာသည့်ကားမှ လမ်းဖြတ်ကူးသောဆိုင်ကယ်အားဝင်တိုက်မိကာ ဆိုင်ကယ်မောင်းနှင်လာသူသေဆုံးသွားခဲ့မှုဖြစ်ပွားခဲ့ကြောင်း သိရသည်။