ပုံစာ - ပြီးခဲ့သော ၂၀၂၀ ပြည့်နှစ်တွင် တပ်ချုပ်နှင့် နိုင်ငံရေးပါတီများ တွေ့ဆုံခဲ့စဉ်

မျိုးကြီး/Pearl (NSS) - ဇန်နဝါရီ ၆

တိုင်းပြည် မငြိမ်မသက်ဖြစ်နေချိန်၌ အားလုံးပါဝင်သော ပြည်သူ့လုံခြုံရေးစနစ်ကို ဝိုင်းကူပေးရန် နိုင်ငံရေးပါတီများကို ဗိုလ်ချုပ်မှူးကြီးမင်းအောင်လှိုင်က ပြောကြားခဲ့ကြောင်းသိရသည်။

ဗိုလ်ချုပ်မှူးကြီးမင်းအောင်လှိုင်နှင့် နိုင်ငံရေးပါတီ (၃၉)ပါတီခန့်တို့သည် ယနေ့(ဇန်နဝါရီလ ၆ ရက်)၊ နံနက် ၉ နာရီမှစတင်ကာ နေ့လည် ၁ နာရီဝန်းကျင်အချိန်အထိ နေပြည်တော်ရှိ နစကဥက္ကဋ္ဌရုံး၌ တွေ့ဆုံဆွေးနွေးခဲ့ခြင်းဖြစ်သည်။

ပြည်ထောင်စုရွေးကောက်ပွဲကော်မရှင်၏ မှတ်ပုံတင်ခွင့်ပြုချက်ရရှိထားသည့် နိုင်ငံရေးပါတီ (၄၅)ပါတီနှင့် တပ်ချုပ်တို့ တွေ့ဆုံဆွေးနွေးရန် စီစဉ်ခဲ့ခြင်းဖြစ်သော်လည်း ၎င်းတွေ့ဆုံပွဲအား နိုင်ငံရေးပါတီ (၆)ပါတီခန့်က တက်ရောက်ခဲ့ခြင်းမရှိကြောင်း သိရသည်။

“(၄၅)ပါတီမှာမှ ပျက်ကွက်တာက (၆)ပါတီလောက်ရှိတယ်။ ဆိုတော့ တစ်ပါတီချင်းအလိုက် လိုအပ်ချက်တွေ ပြောကြတာပေါ့။ တိုင်းပြည်ကိစ္စတို့ ၊ အဲဒီပါတီတွေ ကြုံတွေ့နေရတဲ့ အခက်အခဲတို့၊ ဖြေလျော့ပေးဖို့တို့ ပြောကြတာပေါ့”ဟု ၎င်းတွေ့ဆုံပွဲသို့ တက်ရောက်ခဲ့သော နိုင်ငံရေးပါတီတည် ထောင်သူတစ်ဦးက NSS ကို ပြောသည်။

အဆိုပါတွေ့ဆုံပွဲတွင် နိုင်ငံရေးပါတီများအနေဖြင့် တစ်ပါတီအလိုက် ၎င်းတို့၏ လိုအပ်ချက်၊ တွေ့ကြုံနေရသည့်အခက်အခဲများကိုလည်း တင်ပြဆွေးနွေးမှုများရှိခဲ့ကြောင်း သိရသည်။

အလားတူ ဗိုလ်ချုပ်မှူးကြီးမင်းအောင်လှိုင်အနေဖြင့်လည်း ဂုဏ်သိက္ခာရှိသည့် ရွေးကောက်ပွဲကို ကျင်းပပေးမည့်အကြောင်း ပါတီများအား အသိပေးပြောဆိုမှုရှိခဲ့ကြောင်း ရခိုင့်ဦးဆောင်ပါတီဥက္ကဋ္ဌဒေါက်တာအေးမောင်က NSS ကို ပြောသည်။

“ပထမသူတို့ ပြောခဲ့တာရှိတာပေါ့။ အကြားအလပ်မရှိတဲ့ ရွေးကောက်ပွဲကို ကျင်းပေမယ်လို့ ဦးတည်ခဲ့တာရှိတယ်။ ဒါပေမဲ့ အခြေခံဥပဒေမှာ ပြဋ္ဌာန်းထားတာကတော့ ရွေးကောက်ခံကိုယ်စားလှယ် ထက်ဝက်ကျော်လွှတ်တော်ထဲကို ရောက်ရင် အစိုးရဖွဲ့နိုင်တဲ့ ဥပဒေပါ ပေးထားချက်ရှိတယ်။ အဲဒီတော့ ထက်ဝက်ကျော်ဆိုတာကလည်း တပ်မတော်သားဘက်က ၂၅ ရာခိုင်နှုန်း ရှိပြီးပြီ။ ကျန်တဲ့ ၂၅ ရာခိုင်နှုန်းကျော်ကျော်လောက်ကို ရွေးကောက်လိုက်ရင် အထမြောက်တယ်။ ဒါပေမဲ့ ဂုဏ်သိက္ခာလိုအပ်တဲ့အခါကြတော့ အဲဒီလောက်နဲ့မဖြစ်ဘူး။ အဲဒါကြောင့် အခြေခံဥပဒေပါအတိုင်း ရွေးကောက်ပွဲကို အတတ်နိုင်ဆုံး တည်ငြိမ်အေးချမ်းတဲ့ အခင်းအကျင်းရှိတဲ့အချိန်လေးမှာ အတတ်နိုင်ဆုံးကျင်းပချင်တယ်။ အဲဒါလေးတွေကို ပြောပါတယ်” ဟု ဒေါက်တာအေးမောင်က ပြောသည်။

ဂုဏ်သိက္ခာရှိသည့် ရွေးကောက်ပွဲဖြစ်မြောက်ရန် တည်ငြိမ်အေးချမ်းရေးသည်အရေးကြီးသည့်အတွက် ပါတီများအနေဖြင့် ဝိုင်းကူပေးကြရန်လည်း တပ်ချုပ်က မေတ္တာရပ်ခံပြောကြားခဲ့ကြောင်းလည်း ဆွေးနွေးပွဲသို့ တက်ရောက်ခဲ့သည့် နိုင်ငံရေးပါ တီတည်ထောင်သူတစ်ဦးက NP News ကို ထပ်မံပြောသည်။

ထို့ပြင် တိုင်းပြည် မငြိမ်မသက်ဖြစ်နေချိန်တွင် အားလုံးပါဝင်သော ပြည်သူ့လုံခြုံရေးစနစ်၌ ပါတီများအနေဖြင့် ဝိုင်းကူပေးကြရန်လည်း ဗိုလ်ချုပ်မှူးကြီးမင်းအောင်လှိုင်က ထည့်သွင်းပြောကြားခဲ့ကြောင်း သိရသည်။

“နောက်တစ်ခုက အခုလက်ရှိ တိုင်းပြည်မငြိမ်မသက် ဖြစ်နေတဲ့ကိစ္စမှာ ပြည်သူ့လုံခြုံရေးစနစ်ပေါ့။ အားလုံး ပူးပေါင်းပါဝင်တဲ့ ပြည်သူ့လုံခြုံရေးစနစ်မှာ ပါတီတွေကလည်း ဝိုင်းကူကြဖို့ပေါ့။ အဲဒါကို ပြောတယ်” ဟု နိုင်ငံရေးပါတီတည်ထောင်သူ တစ်ဦးက ထပ်မံပြောသည်။

နိုင်ငံတော်လုံခြုံရေး၊ တည်ငြိမ်ရေးအတွက် နိုင်ငံရေးပါတီများအနေဖြင့် ပူးပေါင်းကူညီပေးရန်လိုအပ်ကြောင်း တပ်ချုပ်အနေဖြင့် ပြောဆိုမှုရှိခဲ့သည်ဟု ဒေါက်တာအေးမောင်က ပြောသည်။

ထို့ပြင် တပ်ချုပ်အနေဖြင့် “အခုနလို အကြမ်းပဲ ဖက်ဖက်ပေါ့၊ မဟုတ်တာပဲ လုပ်လုပ်ပေါ့။ အိမ်တစ်အိမ်မှာရှိနေပြီဆိုရင် သူ့ကြောင့် ပတ်ဝန်းကျင်ကို ထိခိုက်နိုင်တာကို။ မူးယစ်ပဲဖြစ်ဖြစ်၊ အကြမ်းဖက်ပဲဖြစ်ဖြစ်၊ ဖောက်ခွဲတာပဲ ဖြစ်ဖြစ်ပေါ့ အဲဒီပတ်ပတ်လည်က သတင်းပြန်ပို့မှပဲ သူတို့ ဒါကိုတားဆီးနိုင်မယ်။ ကာကွယ်နိုင်မယ်။ အဲဒီလိုနည်းနဲ့ တားဆီးကာကွယ်နိုင်ခဲ့တယ်။ သတင်းရဲ့တန်ဖိုးပေါ့။ အဲဒီတော့ပြည်သူတွေရဲ့ လုံခြုံရေးအရ ပြည်သူတွေ ပူးပေါင်းပါဝင်ကူညီမှပဲ အကျပ်အတည်းကို ကျော်လွှားနိုင်မယ်။ အဲဒီလို ကဏ္ဍမျိုးမှာ နိုင်ငံရေးပါတီများဘက်ကလည်း ပူးပေါင်းကူညီပေးကြပါလို့ ပြောတယ်” ဟု ဒေါက်တာအေးမောင်က ပြောသည်။

ဗိုလ်ချုပ်မှူးကြီးမင်းအောင်လှိုင်နှင့် နိုင်ငံရေးပါတီများကြား တွေ့ဆုံပွဲကို ယမန်နေ့(ဇန်နဝါရီလ ၅ ရက်)၌ ကျင်းပရန် စီစဉ်ခဲ့သော်လည်း အကြောင်းအမျိုးမျိုးကြောင့် မဖြစ်မြောက်ခဲ့ဘဲ ယနေ့မှသာ ကျင်းပနိုင်ခဲ့ခြင်းဖြစ်သည်။