Pika (NSS) - ဇန်နဝါရီ ၅ 

ဂျပန်နိုင်ငံတွင် ဇန်နဝါရီလ(၁)ရက်က လှုပ်ခတ်ခဲ့သော အင်အားပြင်းငလျင်ကြောင့် ဇန်နဝါရီလ(၅)ရက်အထိ သေဆုံးသူဦးရေမှာ (၉၂)ဦးထိ မြင့်တက်လာခဲ့ပြီး အခြားလူ(၂၅ဝ)နီးပါး ပျောက်ဆုံးနေဆဲဖြစ်ကြောင်း ဒေသဆိုင်ရာ အာဏာပိုင်များက ပြောကြားခဲ့သည်။

ဇန်နဝါရီလ(၁)ရက်တွင် ပြင်းအား (၇ ဒသမ ၅) မဂ္ဂနီကျုအဆင့်ရှိ ငလျင်လှုပ်ခတ်ခဲ့ပြီးနောက် လေးရက်အကြာတွင် ထောင်နှင့်ချီသော ကယ်ဆယ်ရေးသမားများသည် အခြားအသက်ရှင်ကျန်ရစ်သူများကို ရှာဖွေကယ်ဆယ်နိုင်ရန် အတွက် ဆက်လက်ကြိုးပမ်းနေရဆဲဖြစ်ကြောင်း သိရသည်။ ဂျပန်နိုင်ငံတစ်ဝှမ်းမှ ထောင်နှင့်ချီသော ကယ်ဆယ်ရေးသမားများသည် နောက်ဆက်တွဲငလျင်များကို ရင်ဆိုင်နေရပြီး Ishikawa ဒေသတွင် ရာနှင့်ချီသော လူများထံ ရောက်ရှိနိုင်ရန်အတွက် ပျက်စီးနေသော လမ်းမများ၊ မြေပြိုမှုများဖြင့် ပိတ်ဆို့နေသောလမ်းမများကို ကျော်ဖြတ်နိုင်ရန် ကြိုးပမ်းနေရကြောင်းလည်း သိရသည်။

Noto ကျွန်းဆွယ်ရှိ ဆိပ်ကမ်းမြို့ Wajima မြို့သည် အဆိုးရွားဆုံးထိခိုက်သည့်နေရာများထဲမှ တစ်ခုဖြစ်ပြီး ရာနှင့်ချီ သော နေအိမ်များ မီးလောင်ပျက်စီးခဲ့ကြောင်းလည်း သိရသည်။ 

"ငလျင်လှုပ်တဲ့အချိန်မှာ ကျွန်တော် နှစ်သစ်ကူးနေ့မှာ အပန်းဖြေနေတာပါ။ ကျွန်တော့်ရဲ့ဆွေမျိုးတွေအားလုံးလည်း ဒီနေရာမှာပဲ ရှိနေကြတာပါ။ ကျွန်တော်တို့နေအိမ်က အများကြီး မပျက်စီးခဲ့ပေမယ့်လည်း နေထိုင်ဖို့ကတော့ နည်းနည်းခက်ခဲသွားပါပြီ။ ရှေ့အနာဂတ်နဲ့ပတ်သက်ပြီး ကျွန်တော်အများကြီး မစဉ်းစားနိုင်တော့ပါဘူး" ဟု အသက်(၅၃)နှစ်အရွယ် Hiroyuki Hamatani က  ပြောခဲ့သည်။

ဂျပန်နိုင်ငံတွင် အင်အားပြင်းငလျင်လှုပ်ခတ်ခဲ့ပြီးနောက် ရာနှင့်ချီသော နောက်ဆက်တွဲငလျင်များ ထပ်မံလှုပ်ခတ်ခဲ့ရာ အနည်းဆုံးလူ(၃၃ဝ)ဦး ထိခိုက်ဒဏ်ရာရရှိခဲ့ကြောင်း ဒေသတွင်းအာဏာပိုင်များက ပြောကြားခဲ့သည်။ Ishikawa ဒေသတွင် အိမ်ထောင်စု(၃)သောင်းဝန်းကျင် လျှပ်စစ်မီးပြတ်တောက်မှုများနှင့်ကြုံတွေ့နေရပြီး နေအိမ်ပေါင်း (၈၉၈ဝဝ) နှင့် အိမ်နီးချင်းဒေသနှစ်ခုတွင် ရေပြတ်လပ်မှုများ ကြုံတွေ့နေရကြောင်းလည်း သိရသည်။ 

ထို့အပြင် ရာနှင့်ချီသောလူများသည် အစိုးရ၏ ကယ်ဆယ်ရေးစခန်းများတွင် နေထိုင်နေရကြောင်းလည်း သိရသည်။ ဂျပန်နိုင်ငံတွင် ရာနှင့်ချီသောငလျင်များကို နှစ်စဉ်ကြုံတွေ့နေရပြီး ငလျင်အများစုမှာ ထိခိုက်ပျက်စီးမှု အနည်းငယ်သာရှိကြောင်းလည်း သိရသည်။