Pika (NSS) - ဒီဇင်ဘာ ၂၁

အမေရိကန်နိုင်ငံ၏ ကြွေးမြီးသည် ဆက်လက်မြင့်တက်လျက်ရှိနေပြီး ဒီဇင်ဘာလအထိ ပြီးခဲ့သည့်ခြောက်လ အတွင်း ကြွေးမြီးမှာ နောက်ထပ်အမေရိကန်ဒေါ်လာ(၂ ဒသမ ၆) ထရီလီယံ ထပ်မံတိုးလာခဲ့ကာ စုစုပေါင်း ကြွေးမြီး ပမာဏ အမေရိကန်ဒေါ်လာ(၃၃ ဒသမ ၈) ထရီလီယံထိ ရောက်ရှိခဲ့ကြောင်း ဘဏ္ဍာရေးဝန်ကြီးဌာန၏ ပြောကြား ချက်များအရ သိရသည်။

အခွန်ဖြတ်တောက်မှုများ၊ စီးပွားရေးကို နှိုးဆွပေးသည့် အစီအစဉ်များ၊ အစိုးရအသုံးစရိတ်များ မြင့်တက်လာမှုများ နှင့် အခွန်ရငွေများ ကျဆင်းမှုတို့သည် ကြွေးမြီးများကို ပိုမိုမြင့်တက်လာစေသည့် အကြောင်းအရင်းများဖြစ်ကြောင်း ဘဏ္ဍာရေးဝန်ကြီးဌာနက ဖော်ပြခဲ့သည်။ 

ရီပတ်ဘလစ်ကန်လွှတ်တော်အမတ် ဂျွန်ဂျိမ်းစ်က "နိုင်ငံသားတစ်ဦးလျှင် အမေရိကန်ဒေါ်လာ(၁)သိန်း ကြွေးမြီးနဲ့ တွက်မယ်ဆိုရင်တောင် နိုင်ငံတော်ကြွေးမြီးဟာ အဲ့ဒီထက်ကျော်လွန်သွားပါပြီ။ အစိုးရရဲ့အသုံးစရိတ် မြင့်တက် လာတာတွေဟာ အဓိကအချက်ဖြစ်တယ်ဆိုတာကို အိမ်ဖြူတော်ကို မက်ဆေ့ချ်တစ်စောင် ပေးပို့သင့်ပါတယ်" ဟု ပြောခဲ့သည်။ 

နောက်ဆုံးဘဏ္ဍာရေးအချက်အလက်များအရ ၂ဝ၂၃ ခုနှစ် နိုဝင်ဘာလအထိ အစိုးရအသုံးစရိတ် (၁၆)ရာခိုင်နှုန်းနှင့် ညီမျှသည့်ကြွေးမြီးကို ထိန်းသိမ်းရန်အတွက် အမေရိကန်ဒေါ်လာ(၁၆၉)ဘီလျံ ကုန်ကျကြောင်း သိရသည်။ 

အမေရိကန်နိုင်ငံကြွေးမြီးတွင် အတိုးပေးချေမှုသည် နှစ်စဉ်အခြေခံအားဖြင့် ပြီးခဲ့သည့်အောက်တိုဘာလကုန်အထိ  အမေရိကန်ဒေါ်လာ(၁)ထရီလီယံအထက် တိုးလာကြောင်း အမေရိကန်ဘဏ္ဍာရေးဝန်ကြီးဌာန၏ ဒေတာအချက် အလက်များကို အခြေခံကာ Bloomberg ၏ တွက်ချက်မှုများအရ သိရသည်။ အမေရိကန်နိုင်ငံ၏ ပြည်ပကြွေးမြီး သည် လာမည့်ဆယ်စုနှစ်အတွင်း အမေရိကန်ဒေါ်လာ(၂၀)ထရီလီယံ တိုးလာနိုင်ကြောင်း Bank of America (BoA) ၏ အဆိုအရသိရသည်။

အမေရိကန်၏ကြွေးမြီးသည် လာမည့်ဆယ်နှစ်အတွင်း နေ့စဉ်အမေရိကန်ဒေါ်လာ(၅ ဒသမ ၂) ဘီလျံ တိုးလာနိုင် ဖွယ်ရှိနေပြီး ၂ဝ၃၃ ခုနှစ်တွင် စုစုပေါင်းကြွေးမြီးပမာဏမှာ အမေရိကန်ဒေါ်လာ(၅၄)ထရီလီယံထိရှိလာနိုင်ကြောင်း  (BoA) က ပြီးခဲ့သည့်လတွင် သတိပေးပြောဆိုခဲ့သည်။