Pearl (NP News) – ဒီဇင်ဘာ ၁၉

ကျန်းမာရေးကဏ္ဍကို တိုက်ခိုက်ခြင်းသည် အပြစ်မဲ့ပြည်သူလူထုအား ဦးတည်၍ သစ္စာမဲ့စွာ အကြမ်းဖက်ခြင်းဖြစ်သည်ဟု တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ဝေဖန်ပြစ်တင်ထားသည်။ 

၎င်းက  ယမန်နေ့ (ဒီဇင်ဘာလ ၁၈ ရက်)တွင် ရန်ကုန်မြို့ရှိ  တပ်မတော်ဆေးတက္ကသိုလ် စစ်ရေးပြကွင်း၌ကျင်းပသော တပ်မတော်ဆေးတက္ကသိုလ် ဗိုလ်လောင်းသင်တန်းအမှတ်စဉ် (၂၄) သင်တန်းဆင်း ဂုဏ်ပြုစစ်ရေးပြအခမ်းအနားတွင် အထက်ပါကဲ့သို့ ဝေဖန်ပြောကြားခဲ့ခြင်းဖြစ်သည်။ 

CRPH၊ NUG နှင့် PDF အမည်ခံ အကြမ်းဖက်သမားများသည်  နိုင်ငံတော်၏ ကျန်းမာရေးစောင့်ရှောက်မှုယန္တရားလည်ပတ်မှု ရပ်တန့်ရန် ဆရာဝန်၊ သူနာပြုများအပါအဝင် ကျန်းမာ ရေးဝန်ထမ်းများကို CDM ပြုလုပ်ရန် သွေးဆောင်ဖြားယောင်းခြင်း၊ ဖိအားပေး အကျပ်ကိုင်ခြိမ်းခြောက်ခြင်းများကို ပြုလုပ်ခဲ့ကြောင်း တပ်ချုပ်က ပြောသည်။

အချို့သောကျန်းမာရေးဝန်ထမ်းများအနေဖြင့်လည်း လိုက်နာကျင့်ကြံရမည့် ကတိသစ္စာကို ဖောက်ဖျက်ခဲ့ကြသဖြင့် ပြည်သူလူထု၏ ကျန်းမာရေး စောင့်ရှောက်မှုလုပ်ငန်းများ လစ်ဟာမှုများဖြစ်ပေါ်ခဲ့ပြီး မိမိတို့တပ်မတော်သား ပါရဂူ၊ ဆရာဝန်နှင့် သူနာပြုများက ဝင်ရောက်တာဝန်ထမ်းဆောင်ခဲ့ရကြောင်း သိရသည်။

ထို့ပြင် အကြမ်းဖက်သမားများသည် မိဘပြည်သူတစ်ရပ်လုံး၏ ကျန်းမာရေး နှင့် မိသားစုဘဝလုံခြုံရေးအတွက် အလွန်အန္တရာယ်ကြီးမားသည့် လုပ်ရပ်များဖြစ်သော ဆေးရုံ၊ ဆေးပေးခန်းများကို မီးရှို့ဖျက်ဆီးခြင်း၊ ဗုံးခွဲတိုက်ခိုက်ခြင်းများကို အကြိမ်ကြိမ်ဆောင်ရွက်ခဲ့ကြသည့်အပြင် ဆရာဝန်၊ သူနာပြုနှင့်ကျန်းမာရေးဝန်ထမ်းများကိုလည်း ခြိမ်းခြောက်ခြင်း၊ ဖိအားပေးခြင်း၊ အကြမ်းဖက်သတ်ဖြတ်ခြင်းများကို လုပ်ဆောင်ခဲ့ကြောင်း တပ်ချုပ်က ပြောသည်။

ထိုသို့ မိဘပြည်သူများ၏ ကျန်းမာရေးကဏ္ဍအပေါ် ဦးတည်ချက်ထားတိုက်ခိုက်ခြင်းသည် နိုင်ငံတော်၏ လူသားအရင်းအမြစ် စွမ်းအားပြိုလဲရန် တိုက်ခိုက်ခြင်းဖြစ်သကဲ့သို့ အပြစ်မဲ့ပြည်သူလူထုကိုဦးတည်ပြီး သစ္စာမဲ့စွာ အကြမ်းဖက် တိုက်ခိုက်ခြင်းဖြစ်ကြောင်း ဗိုလ်ချုပ်မှူးကြီးမင်းအောင်လှိုင်က ဝေဖန်ပြစ်တင်ထားသည်။   

အဆိုပါလုပ်ရပ်များသည် မည်သည့်နိုင်ငံ၊ မည်သည့်လူ့အဖွဲ့အစည်းကမျှ လက်မခံနိုင်သကဲ့သို့ မြန်မာ့လူ့အဖွဲ့အစည်းတွင်လည်း လက်မခံနိုင်သည့် လုပ်ရပ်များဖြစ်ကြောင်း ၎င်းက ဆက်လက် ပြောသည်။ 

“အဓိကတော့ ဘယ်အခြေအနေမျိုးမှာမဆို ဆရာဝန်တွေက မစွန့်ခွာသင့်ဘူးပေါ့။ ဒါကတော့ ဆရာဝန်တင်မဟုတ်ပါဘူး။ ကျန်းမာရေးဝန်ထမ်းတွေ အားလုံးပါတယ်။ ဘယ်နိုင်ငံမှာပဲ ဖြစ်ဖြစ် ဒီအတိုင်းပါပဲ။ ကျွန်တော်တို့ ဆရာဝန်ဖြစ်စမှာ သစ္စာဆိုရတယ်။ အဲဒီအထဲမှာလည်း ပါတယ်။ ဒါကတော့ မလုပ်သင့်တဲ့ အလုပ်ပေါ့။ သို့သော် မလုပ်သင့်လို့ မှားသွားပေမယ့် လည်း ပြန်ပြင်ဖို့ အခွင့်အရေးကို ပေးသင့်တယ်။ ဆရာဝန်တစ်ယောက်၊ သူနာပြုတစ်ယောက် မွေးထုတ်ဖို့က မလွယ်ဘူး။ ဒါတွေကို ပြန်ဖြည့်ဖို့အတွက် ဆယ်စုနှစ်တစ်စုတောင် အချိန်လောက်ပမလား မပြောနိုင်ဘူး။ အဲဒီတော့ အပြင်ရောက်နေတဲ့သူတွေကိုလည်း အခွင့်အရေးတစ်ခု ပြန်ပေးသင့်တယ်လို့ မြင်တယ်။ ပြန်ဝင်လာရင် လက်ခံကြိုဆိုသင့်တယ်” ဟု အပူပိုင်းဆေးပညာအထူးကု ဆရာဝန်ဒေါက်တာပြည့်ထူးက သုံးသပ်ပြောကြားသည်။

၂ဝ၂၁ ခုနှစ် ဖေဖော်ဝါရီလတွင် တပ်မတော်က နိုင်ငံတော်အာဏာရယူခဲ့ပြီးနောက်ပိုင်းတွင် တစ်နိုင်ငံလုံး၌ ကျန်းမာရေးဝန်ကြီးဌာနတွင် အရာထမ်း၊ အမှုထမ်း ကျန်းမာရေးဝန်ထမ်း (၁ဝ၃၂၁၄)ဦးရှိသည့်အနက် CDM ပြုလုပ်ခဲ့သည့် ကျန်းမာရေးဝန်ထမ်းဦးရေသည် (၄၇၂၅၄)ဦးထက်မနည်းရှိခဲ့ကြောင်း နစက၏ အချက်အလက်များအရ သိရသည်။ 

ထို့ပြင် လက်ရှိ နစက လက်ထက်၌   ပညာရေးဝန်ထမ်း (၈၈)ဦး နှင့် ကျန်းမာရေးဝန်ထမ်း (၂ဝ)ဦး အကြမ်းဖက်သတ်ဖြတ်ခံခဲ့ရသည်။