မြူနစ် (NSS) - ဒီဇင်ဘာ ၁၂

နစက၏ NSPNC နှင့် မြောက်ပိုင်းမဟာမိတ်(၃)ဖွဲ့ တွေ့ဆုံဆွေးနွေးမှုများရှိခဲ့သော်လည်း ရှမ်းပြည်နယ်၊ မူဆယ်မြို့ နှင့်တစ်ဝိုက်တွင် တိုက်ပွဲများ ဆက်လက်ဖြစ်ပွားနေကြောင်း သိရသည်။

တအာင်းလက်နက်ကိုင်အဖွဲ့ TNLA၊ ကိုးကန့်လက်နက်ကိုင်အဖွဲ့ MNDAA ပူးပေါင်းအဖွဲ့နှင့် တပ်မတော်လုံခြုံရေး အဖွဲ့တို့သည် ယမန်နေ့(ဒီဇင်ဘာ ၁၁ ရက်) တွင် မူဆယ်မြို့နှင့် ၁ဝ၅ မိုင်ကုန်သွယ်ရေးဇုန်ကြား၌ တိုက်ပွဲများ အပြင်းအထန်ဖြစ်ပွားခဲ့ကြောင်း သိရသည်။

“မူဆယ်နဲ့ ၁၀၅ မိုင်ကြားထဲတော့ မနေ့က ညနေကတည်းက အပြင်းအထန်ဖြစ်နေတာပေါ့။ မနေ့က လေကြောင်း ပစ်ကူတွေလာပြီ ပစ်သွားတာရှိတယ်” ဟု မူဆယ်မြို့ခံတစ်ဦးက NP News ကို ပြောသည်။

အလားတူ ယနေ့(ဒီဇင်ဘာ ၁၂ ရက်) နံနက်ပိုင်းတွင် တပ်မတော်နှင့် TNLA ပူးပေါင်းအဖွဲ့များကြားတွင် မူဆယ်မြို့ နှင့်တစ်ဝိုက်၌ ဆက်လက်တိုက်ပွဲဖြစ်နေလျက်ရှိကြောင်း အထက်ပါမြို့ခံက ထပ်မံပြောသည်။

“ဒီနေ့ မနက်မှာလည်း မူဆယ်နဲ့ ၁ဝ၅ မိုင်ကြားမှာရှိတဲ့ တုံထန်ရွာနားမှာပဲ ဖြစ်နေတယ်။ တိုက်ပွဲက ရပ်သွားလိုက် ပြန်ပစ်လိုက်နဲ့ဖြစ်နေတာ။ အဓိကတော့ MNDAA အဖွဲ့တွေနဲ့ TNLA အဖွဲ့တွေ ပါတယ်။ သူတို့နဲ့ တပ်မတော်နဲ့ ဖြစ်နေကြတာပေါ့။ ဒီနေ့မနက်တော့ လေယာဉ်နဲ့လာပြီး ပစ်တာမျိုးတော့ မရှိသေးဘူး” ဟု ၎င်းက ဆက်လက် ပြောသည်။

MNDAA၊ TNLA၊ AA မြောက်ပိုင်းမဟာမိတ် (၃) ဖွဲ့သည် ပြီးခဲ့သော အောက်တိုဘာ ၂၇ ရက်မှစတင်ကာ (၁၀၂၇ စစ်ဆင်ရေး) အမည်ဖြင့် ရှမ်းပြည်နယ်အရှေ့မြောက်ပိုင်းရှိ လုံခြုံရေးစခန်းများကို အင်အားအလုံးအရင်းဖြင့် ဝင်ရောက်တိုက်ခိုက်ခဲ့သည်။

ထို့အပြင် ရခိုင်လက်နက်ကိုင်အဖွဲ့ဖြစ်သည် AA သည်လည်း ရခိုင်ပြည်နယ်အတွင်း၌ နိုဝင်ဘာ ၁၃ ရက်မှစတင်ကာ တစ်ကျော့ပြန်တိုက်ပွဲများကို ပြန်လည်ဖော်ဆောင်ခဲ့သည်။

ယနေ့ နေ့လည်ပိုင်းအချိန်အထိ ရခိုင်ပြည်နယ်အတွင်း၌ တပ်မတော်နှင့် AA အဖွဲ့တို့အကြား ထိတွေ့တိုက်ပွဲများ မရှိခဲ့ကြောင်း ရခိုင်ပြည်နယ်လုံခြုံရေးအဖွဲ့နှင့်နီးစပ်သူက NP News ကို ပြောသည်။

“ဒီနေ့မှာတော့ ရခိုင်ဘက်မှာ ပစ်တာခတ်တာ မရှိပါဘူး။ ဆွေးနွေးပွဲရဲ့ ရလာဒ်လားတော့ မသိဘူး။ ပြီးတော့ ဒီဇင်ဘာလကုန်အထိ ပစ်ခတ်တိုက်ခိုက်တာတွေ ရပ်စဲမယ်လို့လည်း သတင်းတွေကြားနေရတယ်။ သေချာတော့ အတည်မပြုနိုင်သေး ဘူးပေါ့။ အဲဒီလိုဖြစ်ရင်တော့ လူထုအတွက်၊ အားလုံးအတွက် ကောင်းတာပေါ့” ဟု ရခိုင် ပြည်နယ်လုံခြုံရေးအဖွဲ့နှင့်နီးစပ်သူက ပြောသည်။

အလားတူ ကိုးကန့်လက်နက်ကိုင်အဖွဲ့ MNDAA အဓိက တိုက်ပွဲဖော်ဆောင်နေသည့် ရှမ်းပြည်နယ်၊ လောက်ကိုင် မြို့နှင့် တစ်ဝိုက်တွင်လည်း ယနေ့နေ့လည်ပိုင်းအချိန်အထိ နှစ်ဖက်အကြား ပစ်ခတ်တိုက်ခိုက်မှုများ မရှိခဲ့ကြောင်း လောက်ကိုင်မြို့ ခံတစ်ဦးက NP News ကို ပြောသည်။

တပ်မတော်နှင့် မြောက်ပိုင်းမဟာမိတ်(၃)ဖွဲ့တို့အကြား (၁)လကျော်ကြာ တိုက်ပွဲအပြင်းအထန်ဖြစ်ပွားခဲ့ပြီးနောက် ယခုရက်ပိုင်းအတွင်းတွင် တရုတ်နိုင်ငံ၏ ကြားဝင်ကူညီပေးမှုဖြင့် တရုတ်နိုင်ငံ၌ နစက၏ NSPNC နှင့် မြောက်ပိုင်းမဟာမိတ် (၃)ဖွဲ့ ၏ တာဝန်ရှိသူများကြား တွေ့ဆုံဆွေးနွေးခဲ့ကြသည်။

လက်ရှိပဋိပက္ခများကို စစ်ရေးအစား နိုင်ငံရေးဖြင့် ဖြေရှင်းရန်အတွက် တွေ့ဆုံဆွေးနွေးခဲ့ခြင်းဖြစ်ပြီး ယင်းကဲ့သို့ တွေ့ဆုံဆွေးနွေးမှုသည် အပြုသဘောဆောင်သည့်ရလာဒ်များရရှိခဲ့သည်ဟု တရုတ်အစိုးရက ဆိုသည်။

ထိုသို့ NSPNC နှင့် မြောက်ပိုင်းမဟာမိတ်(၃)ဖွဲ့၏ တွေ့ဆုံဆွေးနွေးမှုရလာဒ် တိုးတက်မှုအပေါ် မူတည်ကာ ယခု ဒီဇင်ဘာလကုန်ပိုင်းတွင် နှစ်ဖက်အကြား ထပ်မံဆွေးနွေးသွားရန်ရှိကြောင်း နစကပြောခွင့်ရ ဗိုလ်ချုပ်ဇော်မင်းထွန်း က ယမန်နေ့တွင် ပြောဆိုခဲ့သည်။