ကျော်(NSS) - ဒီဇင်ဘာ ၁၂

ရန်ကုန်တိုင်းအတွင်း နေ့စဥ်ထွက်ရှိသော YBS ယာဥ်များ၏ ၃၀ ရာခိုင်နှုန်းခန့်သည် CNG ဆိုင်များ၌ရောက်ရှိနေ၍ ယခုရက်ပိုင်းအတွင်း ယာဥ်ထွက်ရှိမှုလျော့နည်းနေခြင်းဖြစ်ကြောင်း YRTC တွဲဖက်အတွင်းရေးမှူး ဦးလျန်ကျင့်မန်က NSS ကိုပြောသည်။

"တစ်နေ့ကို ယာဥ်လိုင်းပေါင်း ၁၃၂ လိုင်းကနေ ယာဥ်စီးရေ ၃၇၀၀ လောက်နဲ့ ခရီးသည် ၁၅ သိန်းဝန်းကျင်လောက်ကို ဝန် ဆောင်မှုပေးနေပါတယ်။ အဲဒီလို ဝန်ဆောင်မှုပေးရာမှာ ယာဥ် လိုင်းထွက်ရှိနိုင်ဖို့အတွက် CNG ဆိုင်တွေမှာ တန်းစီရတာတွေရှိတယ်"ဟု တွဲဖက်အတွင်းရေးမှူး ဦးလျန်ကျင့်မန်က ပြောသည်။

ထိုသို့ CNG အရောင်းဆိုင်များ၌ တန်းစီစောင့်ဆိုင်းပြီးနောက် CNG ရရှိချိန်တွင်လည်း pressure လျော့နည်းခြင်း၊ CNG အရည် အသွေးလျော့ကျခြင်း၊ ဟောင်းနွမ်းကာ သက်တမ်းကုန်နေသည့် CNG အိုးများအားလဲလှယ်တပ်ဆင်နေခြင်း နှင့် လျှပ်စစ်မီးပုံမှန်မရရှိခြင်းတို့ကြောင့် YBS ယာဥ်များထွက်ရှိမှုသည် လျော့နည်းလျက်ရှိကြောင်း သိရသည်။

"အရင်က ၄ ခေါက်၊ ၅ ခေါက်ပြေးဆွဲကျတယ်။ အခုက ၂ ခေါက် ၃ ခေါက်လောက်ပဲရတယ်။ အဲဒီမှာယာဥ်စီးရေလျော့သလိုဖြစ်သွားတာ။ MOGE နဲ့လည်းအမြဲတမ်းချိတ်ဆက်ပြီး ညှိနှိုင်းဆောင်ရွက်နေပါတယ်။ pressure ပြည့်ဖို့ကိုလည်း လုပ်ဆောင်ပေးဖို့အကူအညီတောင်းထားပါတယ်"ဟု တွဲဖက်အတွင်းရေးမှူးဦးလျန်ကျင့်မန်ကပြောသည်။

ထို့ပြင် YBS ယာဥ်များနေ့စဥ်အစီးရေများစွာထွက်ခွာပြေးဆွဲပေးနိုင်ရန် YRTC မှတာဝန်ရှိသူများ နှင့် MOGE မှတာဝန်ရှိသူများပူးပေါင်း၍ ညှိနှိုင်းဆောင်ရွက်လျက်ရှိပြီး MOGE ဘက်မှလည်း ဖြေရှင်းပေးမှုများပြုလုပ်ပေးလျက်ရှိကြောင်း သိရသည်။

"ဒီရက်ပိုင်းထဲ CNG ဆိုင်တွေမှာတန်းစီနေရတဲ့ YBS ကားစီးရေဟာ ထွက်ရှိ ကားစီးရေရဲ့ ၂၀ ရာခိုင်နှုန်း၊ ၃၀ ရာခိုင်နှုန်းလောက်အထိရှိတယ်။ အရင်ကဆိုရင် ၁၀ ရာခိုင်နှုန်းလောက်ပဲရှိတာ။ ဒါကြောင့် အရင်ကလိုပြန်ပြီးအဆင်ပြေအောင် ချိတ်ဆက်ဆောင်ရွက်နေပါတယ်"ဟု တွဲဖက်အတွင်းရေးမှူးဦးလျန်ကျင့်မန်ကပြောသည်။

လက်ရှိအချိန်၌ YBS ယာဥ်များပြေးဆွဲမှုလျော့နည်းခြင်း၊ သတ် မှတ်ချိန်အထိ ပြေးဆွဲမှုမရှိခြင်းတို့ကြောင့် YBS ယာဥ်အသုံးပြုကာ သွားလာအလုပ်လုပ်ကိုင်နေကြရသူများတွင် အခက်အခဲများကြုံတွေ့နေရကြောင်း သိရသည်။

"ကျွန်တော် မနေ့ကရုံးသွားဖို့ အရင်အိမ်ကနေ ထွက်တဲ့အချိန် ထွက်လာတာ ကားတွေသိပ်မရှိဘူး။ ကားစောင့်ရင်းနဲ့အဲဒီနေ့က ရုံးတက်ချိန်နောက်ကျသွားတယ်။ ပြန်လာတော့လည်း YBS တစ်စီးမှာမလာတဲ့အတွက် ကားဌားပြီးပြန်လာရတော့ ကားခတွေကအရမ်းကုန်နေတာ YBS တွေရှားသွားတာ ဒီရက်ပိုင်းလေးပဲရှိသေးတယ်"ဟု ဒဂုံမြို့သစ်(တောင်ပိုင်း)မြို့နယ်နေ ကိုဆန်းဝင်းကပြောသည်။

ထိုသို့ YBS ယာဥ်အသုံးပြုသွားလာနေရသူများ အဆင်ပြေစေရေးအတွက် YBS ယာဥ်များအား ည ၁၀ နာရီနောက်ဆုံးထား၍ပြေးဆွဲပေးရန် YRTC မှညွှန်ကြားထားကြောင်း သိရသည်။

ထို့အတူ pressure နည်းပါးမှုကြောင့် YBS ယာဥ်ထွက်ရှိမှုလျော့ နည်းနေသဖြင့် YRTC မှ CNG အရောင်းဆိုင်များနှင့်ညှိနှိုင်း၍ CNG ပိုမိုရရှိနိုင်စေရန် ချိတ်ဆက်ဆောင်ရွက်ပေးလျက်ရှိကြောင်း သိရသည်။