Pika (NSS) - ဒီဇင်ဘာ ၁ဝ 

တရုတ်နှင့်ဂျပန်တို့၏ ကမ်းခြေစောင့်တပ်ဖွဲ့များသည် အရှေ့တရုတ်ပင်လယ်အတွင်းရှိ အငြင်းပွားကျွန်းစုများအနီးတွင် ထိပ်တိုက်တွေ့ဆုံခဲ့ပြီးနောက် ရေကြောင်းကျူးကျော်မှုများ လုပ်ဆောင်နေသည်ဟု တစ်ဖက်နှင့်တစ်ဖက် အပြန်အလှန်စွပ်စွဲပြောဆိုမှုများ ရှိခဲ့ကြောင်း သိရသည်။

ဂျပန်ငါးဖမ်းသင်္ဘော နှင့် ကင်းလှည့်သင်္ဘောအများအပြားသည် ဒီဇင်ဘာလ(၉)ရက်တွင် အရှေ့တရုတ်ပင်လယ် အတွင်းရှိ အငြင်းပွားကျွန်းစုများအနီးသို့ ကျူးကျော်ဝင်ရောက်လာခဲ့ကြောင်း တရုတ်ကမ်းခြေစောင့်တပ်ဖွဲ့က ဒီဇင်ဘာလ(၁ဝ)ရက်တွင် ထုတ်ပြန်ပြောဆိုခဲ့သည်။

အဆိုပါအငြင်းပွားကျွန်းစုများကို တရုတ်နိုင်ငံတွင် Diaoyu ဟု ခေါ်ဆိုကြပြီး ဂျပန်နိုင်ငံတွင် Senkaku ဟု ခေါ်ဆို ကြကြောင်း သိရသည်။ အဆိုပါအငြင်းပွားကျွန်းစုများကို ဂျပန်ဖက်က ထိန်းချုပ်ထားသော်လည်း တရုတ်နိုင်ငံဖက်က ၎င်းတို့ပိုင်ဆိုင်သည့်ကျွန်းစုဖြစ်ကြောင်း အခိုင်အမာပြောဆိုထားသည်။

ဂျပန်သင်္ဘောများကို သတိပေးရန်အတွက် လိုအပ်သော အရေးယူဆောင်ရွက်မှုများကို ဥပဒေနှင့်အညီ လုပ်ဆောင် ခဲ့ကြောင်း တရုတ်ကမ်းခြေစောင့်တပ်ဖွဲ့က သတင်းထုတ်ပြန်ပြောဆိုခဲ့သည်။ 

အငြင်းပွားကျွန်းစုများအနီးတစ်ဝိုက်သို့ ရောက်ရှိလာသော တရုတ်ကင်းလှည့်သင်္ဘောနှစ်စင်းကို သတိပေးမှုများ လုပ်ဆောင်ခဲ့ပြီးနောက် တရုတ်သင်္ဘောနှစ်စင်းသည် ဂျပန်ရေပိုင်နက်အတွင်းမှ ထွက်ခွာသွားခဲ့ကြောင်း ဂျပန် ကမ်းခြေစောင့်တပ်ဖွဲ့က ဒီဇင်ဘာလ(၉)ရက်တွင် ထုတ်ပြန်ပြောဆိုခဲ့သည်။ ထို့အပြင် ဂျပန်ကင်းလှည့်သင်္ဘော များသည် တရုတ်ကင်းလှည့်သင်္ဘောများ၏ ချဉ်းကပ်မှုကိုခံခဲ့ရသည့် ငါးဖမ်းသင်္ဘောကို ကာကွယ်ပေးခဲ့ခြင်းသာ ဖြစ်ကြောင်း ဂျပန်ကမ်းခြေစောင့်တပ်ဖွဲ့က ပြောကြားခဲ့သည်။

အလားတူဖြစ်ရပ်မျိုး ပြီးခဲ့သည့်နိုဝင်ဘာလ နှင့် အောက်တိုဘာလတို့တွင် ဖြစ်ပွားခဲ့ဖူးကြောင်းလည်း သိရသည်။ တောင်တရုတ်ပင်လယ်အတွင်း တရုတ်နှင့် ဖိလစ်ပိုင်တို့၏ သင်္ဘောများ တိုက်မိမှုနှင့်ပတ်သက်ပြီး ဒီဇင်ဘာလ(၁ဝ)ရက်တွင် တစ်ဖက်နှင့်တစ်ဖက် အပြန်အလှန်စွပ်စွဲပြောဆိုမှုများဖြစ်ပွားနေချိန်တွင် ယခုကဲ့သို့ ဖြစ်ရပ်များ ထပ်မံဖြစ်ပွားခဲ့ခြင်းဖြစ်ကြောင်းလည်း သိရသည်။