Pika (NSS) - ဒီဇင်ဘာ ၇ 

ဘယ်လ်ဂျီယံနိုင်ငံတွင် လက်နက်ခဲယမ်းမီးကျည်များ ပြတ်လပ်မှုများကြောင့် စစ်ပွဲဖြစ်ပွားခဲ့မည်ဆိုပါက ဘယ်လ်ဂျီယံစစ်တပ်သည် ကျောက်တုံးများဖြင့် စတင် ပစ်ပေါက်ရလိမ့်မည်ဖြစ်ကြောင်း အငြိမ်းစားဗိုလ်ချုပ်ကြီး Marc Thys က သတိပေးပြောဆိုခဲ့သည်။

ထို့အပြင် ဘယ်လ်ဂျီယံနိုင်ငံသည် စစ်ပွဲများဖြစ်ပွားခဲ့မည်ဆိုပါက တစ်လကြာ တိုက်ပွဲဝင်နိုင်ရန်အတွက် ၎င်းတို့၏ ခဲယမ်းမီးကျည်ဘတ်ဂျက်ကို အနည်းဆုံး(၃၃)ကြိမ်ခန့် ပိုမိုမြှင့်တင်ရန် လိုအပ်ကြောင်း Marc Thys က ထပ်မံ ပြောဆိုခဲ့သည်။

Marc Thys က "ဒီနေ့မှာ စစ်ပွဲသာ စတင်ဖြစ်ပွားခဲ့မယ်ဆိုရင် နာရီပိုင်းအတွင်းမှာပဲ ခဲယမ်းမီးကျည်တွေ ကုန်သွားမှာဖြစ်တဲ့အတွက် ဘယ်လ်ဂျီယံစစ်တပ်ဟာ ကျောက်တုံးတွေနဲ့ ပစ်ပေါက်ရတော့မှာပါ" ဟု ပြောဆိုခဲ့သည်။

Marc Thys သည် ၂ဝ၁၇ ခုနှစ်မှ ၂ဝ၁၉ ခုနှစ်အထိ ဘယ်လ်ဂျီယံမြေပြင်တပ်ဖွဲ့များကို ကွပ်ကဲခဲ့ပြီး ပြီးခဲ့သည့် နိုဝင်ဘာလအထိ ဒုဗိုလ်ချုပ်ကြီးအဖြစ် တာဝန်ထမ်းဆောင်ခဲ့ကြောင်း သိရသည်။ Marc Thys က "ဘယ်လ်ဂျီယံ စစ်တပ်မှာ ခဲယမ်းမီးကျည်တွေ ဝယ်ယူဖို့ တစ်နှစ်လျှင် ယူရို(၁၅)သန်း ရှိပါတယ်။ ကျွန်တော်တို့ ခဲယမ်းမီးကျည်တွေဝယ်ယူဖို့ကို ယူရိုသန်း(၁၅ဝ)ထိ တိုးရပါမယ်။ ကျွန်တော်တို့ ရက်ပေါင်း(၃ဝ) ကနေ (၆ဝ) ထိ တိုက်ပွဲဝင်ချင်တယ်ဆိုရင် ယူရို(၅)ဘီလျံကနေ (၇)ဘီလျံထိ လိုအပ်ပါလိမ့်မယ်" ဟု ပြောခဲ့သည်။

၂ဝ၂၂ ခုနှစ် ဖေဖော်ဝါရီလတွင် ရုရှားက ယူကရိန်းကို ကျူးကျော်တိုက်ခိုက်ပြီးနောက်ပိုင်းတည်းက ဘယ်လ်ဂျီယံ နိုင်ငံသည် ယူကရိန်းသို့ ယူရိုသန်း(၂၉ဝ) တန်ဖိုးရှိ စစ်ရေးအကူအညီများ ပေးပို့ခဲ့ကြောင်း သိရသည်။ အဆိုပါ အကူအညီများထဲတွင် စစ်လက်နက်ပစ္စည်းများ၊ ခဲယမ်းမီးကျည်များ၊ မီးစက်များ၊ လောင်စာဆီ နှင့် မော်တော်ယာဉ်အစိတ်အပိုင်းများ ပါဝင်ကြောင်း ဘယ်လ်ဂျီယံကာကွယ်ရေးဝန်ကြီးဌာန၏ အဆိုအရ သိရသည်။ 

စစ်ပွဲများ ဖြစ်ပွားမည်ဆိုပါက ဂျာမနီနိုင်ငံတွင် နှစ်ရက်ကြာတိုက်ပွဲဝင်နိုင်ရန်အတွက်သာ ခဲယမ်းမီးကျည်အလုံအလောက်ရှိကြောင်း ဂျာမနီလွှတ်တော်အမတ် Johann Wadephul က ပြီးခဲ့သည့်လတွင် ထုတ်ဖော်ပြောဆိုခဲ့သည်။ ထို့အပြင် ပြင်သစ်နိုင်ငံသည် (၇)ရက်သာ တိုက်ပွဲဝင်နိုင်ရန် ခဲယမ်းမီးကျည်များ အလုံအလောက်ရှိပြီး အီတလီနိုင်ငံသည် သီတင်းပတ်တစ်ပတ်အောက်သာ တိုက်ပွဲဝင်နိုင်မည်ဖြစ်ကြောင်း မီဒီယာများ၏ ဖော်ပြချက်အရ သိရသည်။

ဗြိတိန်နိုင်ငံသည် စစ်ပွဲဖြစ်ပွားခဲ့မည်ဆိုပါက တစ်ရက်သာ တိုက်ပွဲဝင်ပြီးနောက် ခဲယမ်းမီးကျည်များ ကုန်ခမ်းသွားမည်ဖြစ်ကြောင်း Marc Thys က ယခုနှစ်အစောပိုင်းတွင် ထုတ်ဖော်ပြောဆိုခဲ့ဖူးသည်။