မျိုးကြီး (NP News) - မတ် ၁၂

ပအိုဝ်းနယ်မြေအတွင်းသို့ ကျူးကျော်လာမှုများရှိသည့်အတွက် တိုက်ပွဲဖြစ်ပွားရခြင်းဖြစ်ပြီး အေးအေးချမ်းချမ်းနေ လိုကြောင်း ပအိုဝ်းအမျိုးသားအဖွဲ့ချုပ် PNO/PNA ထိပ်ပိုင်းခေါင်းဆောင်တစ်ဦးက ပြောသည်။

ပြီးခဲ့သော ဖေဖော်ဝါရီ ၂၄ ရက်မှ စတင်ကာ ရှမ်းပြည်နယ်၊ ပင်လောင်းမြို့နယ်ရှိ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ လုံးပြင်ကျေးရွာအုပ်စု၌ ပအိုဝ်းအမျိုးသားတပ်မတော်(PNA)နှင့် KNDF ပူးပေါင်းအဖွဲ့တို့အကြား တိုက်ပွဲများ ဖြစ်ပွား လျက်ရှိကြောင်း သိရသည်။

ယခုရက်ပိုင်းအတွင်း၌ လုံးပြင်ကျေးရွာအုပ်စုရှိ နန့်နှိမ်ရွာတွင် နှစ်ဖက်အကြား တိုက်ပွဲများအပြင်းအထန်းဖြစ်ပွား ခဲ့ပြီး နေအိမ်ပေါင်း (၆ဝ)ထက်မနည်းမှာလည်း မီးလောင်ပျက်စီးမှုများရှိခဲ့ကြောင်း သိရသည်။

“ကျွန်တော်တို့ ပင်လောင်းမြို့နယ်၊ လုံးပြင်ကျေးရွာအုပ်စုမှာ ဖြစ်နေတာ။ အဲဒါကို သူတို့ ဖယ်ခုံမြို့နယ်မှာ ကျွန်တော်တို့က ကျူးကျော်တာတို့ ပြောနေတာ။ ကျွန်တော်တို့က သူများ ဖယ်ခုံနယ်ကို တစ်လက်မမှ မကျူးကျော် ခဲ့ရဘူး။ လုံးပြင်ဆိုတာ ပအိုဝ်းရွာတွေပဲလေ။ အဲဒါတွေက ကျွန်တော်တို့ ပအိုဝ်းကိုယ်ပိုင်အုပ်ချုပ်ခွင့်ရဒေသ အတွင်း မှာပဲ ရှိတာ။ အခု မီးရှို့ခံရတာက နန့်နှိမ်ရွာ အဲဒီ အိမ်ခြေ ၅ဝ ကျော် ၆ဝ နီးပါး သူတို့ မီးရှို့သွားတယ်” ဟု PNO/PNA ၏ ထိပ်ပိုင်းခေါင်းဆောင်တစ်ဦးဖြစ်သူ ဦးခွန်ထွန်းရွှေက NP News ကို ပြောသည်။

ပအိုဝ်းအဖွဲ့ PNO/PNA နှင့် KNDF၊ PDF ပူးပေါင်းအဖွဲ့တို့သည် ပင်လောင်းမြို့နယ် လုံးပြင်ကျေးရွာအုပ်စု၌ ဖေဖော်ဝါရီ ၂၄ ရက်မှ စတင်ကာ ယနေ့အချိန်အထိ တိုက်ပွားများဖြစ်ပွားလျက်ရှိကြောင်းလည်း ၎င်းက ဆိုသည်။

၎င်းဒေသအတွင်း PNA အဖွဲ့နှင့်အတူ တပ်မတော်ဘက်ကလည်း နိုင်ငံတော်လုံခြုံရေး၊ နယ်မြေတည်ငြိမ်အေးချမ်း ရေးအတွက် တာဝန်ယူဆောင်ရွက်ပေးနေမှုများ ရှိကြောင်းလည်း ဦးခွန်ထွန်းရွှေက ပြောသည်။

အဆိုပါတိုက်ပွဲများကြောင့် ပအိုဝ်းတိုင်းရင်းသားများ၊ ကယန်းတိုင်းရင်းသားများ၊ ရှမ်းတိုင်းရင်းသားများ အပါအဝင် ဒေသခံတိုင်းရင်းသားလူမျိုးပေါင်းစုံ (၈ဝဝဝ)ကျော်မှာ စစ်ဘေးရှောင်နေရကြောင်းလည်း သိရသည်။

“ကျွန်တော်တို့ PNA ကတော့ PDF ဆိုးခြင်း၊ ကောင်းခြင်း၊ တပ်မတော် ဆိုးခြင်း၊ ကောင်းခြင်း မည်သူ့ကိုမှ ကျွန်တော်တို့က ထောက်ခံခြင်း၊ အားပေးခြင်း၊ ကန့်ကွက်ခြင်းမရှိဘူး။ ကျွန်တော်တို့ကတော့ ၉၁ ငြိမ်းချမ်းရေးမူ အရ ကျွန်တော်တို့ ပအိုဝ်းဒေသ သူ့လူနဲ့ ရိုးရာဓလေ့နဲ့ အေးအေးချမ်းချမ်း စားကောင်းခြင်း၊ လာကောင်းခြင်း၊ ရောင်းဝယ်ကောင်းခြင်းပဲ ကျွန်တော်တို့က နေချင်တယ်။ သူများနယ်လည်း မကျူးကျော်ဘူး။ ကျွန်တော်တို့ နယ်မြေတွေ အေးအေးချမ်းချမ်းဖြစ်အောင်တော့ ကျွန်တော်တို့ တာဝန်ယူတယ်။ ကျူးကျော်လာရင်တော့ ကျွန်တော်တို့ ခုခံရမှာပေါ့။ သူတို့လာတာကလည်း ကယားပြည်သစ်က လိုလို ဘာလိုလိုနဲ့ ကျွန်တော်တို့ မဟာမိတ်အဖွဲ့လိုလို ဘာလိုလိုနဲ့ ပုံမှားရိုက်ပြီးလာတော့ ထိတွေ့မှုဖြစ်သွားတာပေါ့” ဟု ဦးခွန်ထွန်းရွှေက ဆက်လက်ပြောသည်။

PNO/PNA အနေဖြင့် အေးအေးချမ်းချမ်းနေလိုကြောင်း၊ မည်သူ့ကိုမျှ ဒုက္ခမပေးလိုကြောင်း နှင့် နိုင်ငံတော်ကိုလည်း ဒုက္ခမပေးလိုကြောင်း အဆိုပါအဖွဲ့မှ ထိပ်ပိုင်းခေါင်းဆောင်တစ်ဦးဖြစ်သူ ဦးခွန်ထွန်းရွှေက ဆက်လက်ပြောသည်။

“ကျွန်တော်တို့ က အေးအေးချမ်းချမ်းပဲ နေချင်တယ်။ ဒါက ကျွန်တော်တို့ စခဲ့တဲ့ မီးစမဟုတ်ဘူး။ သူတို့စခဲ့တဲ့ မီးစလေ။ ကျွန်တော်တို့ သူတို့နယ်မြေကို သွားကျူးကျော်တာလည်း မဟုတ်ဘူး” ဟု ၎င်းက ဆိုသည်။

ယခုရက်ပိုင်းအတွင်း နန့်နှိမ်ရွာ၌ ဖြစ်ပွားနေသည့် နှစ်ဖက်တိုက်ပွဲများအတွင်း ကျေးရွာအတွင်းရှိ နေအိမ်များကို တပ်မတော် အပါအဝင် PNA အဖွဲ့အနေဖြင့် မီးရှို့ဖျက်ဆီးခဲ့ခြင်း မရှိကြောင်း ဦးခွန်ထွန်းရွှေက တုံ့ပြန်ထားသည်။

သို့သော် KNDF ပူးပေါင်းအဖွဲ့ကလည်း နန့်နှိမ်ကျေးရွာရှိ နေအိမ်များကို ၎င်းတို့အနေဖြင့် မီးရှို့ခဲ့ခြင်း မရှိကြောင်းနှင့် တစ် ဖက်အဖွဲ့အစည်းကသာ မီးရှို့ဖျက်ဆီးခဲ့ခြင်းဖြစ်ကြောင်း ထုတ်ပြန်ထားသည်ကို တွေ့ရှိရသည်။