NP News - မတ် ၁၂

မန္တလေးတိုင်း၊ ချမ်းအေးသာစံမြို့နယ်ရှိ ဒေါ်တောမုန့်တီဆိုင် ဓားပြတိုက် လုယက်ခံခဲ့ရကြောင်း သတင်းရရှိသည်။

ဖြစ်စဥ်မှာ ယနေ့(မတ်လ ၁၂ ရက်‌) နံနက်(၅)နာရီ (၃ဝ) မိနစ်အချိန်ခန့်တွင် ချမ်းအေးသာစံမြို့နယ်၊ သီရိဟေမာ အနောက်ရပ်ကွက်၊ (၂၆/၂၇)လမ်းကြား၊ အောက်ကမ်းနားလမ်းဘေးတွင် ဖွင့်လှစ်ရောင်းချနေသည့် ဒေါ်တော မုန့်တီဆိုင်တွင် ဖြစ်ပွားခဲ့ကြောင်း အခင်းဖြစ်ပွားရာနေရာအနီးတွင် နေထိုင်သည့် သတင်းအရင်းအမြစ်ထံမှ သိရသည်။

အဆိုပါဖြစ်စဥ်မှာ အောက်ကမ်းနားလမ်းအတိုင်း မြောက်မှတောင်သို့ ဆိုင်ကယ်မောင်းနှင်လာသည့် အမျိုးသား (၂)ဦးသည် ဒေါ်တောမုန့်တီဆိုင်သို့ အရောက်တွင် ဆိုင်ကယ်ပေါ်မှဆင်းပြီး ဓားပြတိုက်လုယက်ခဲ့ခြင်းဖြစ်ကြောင်း သိရသည်။

၎င်းအမျိုးသားနှစ်ဦး ဆိုင်ကယ်ပေါ်မှ ဆင်းလာပြီး လက်ထဲ၌ သေနတ်နှင့် လက်ပစ်ဗုံးတို့ကို ကိုယ်စီကိုင်ဆောင်၍ ဆိုင်အတွင်း ဝင်ရောက်သွားခဲ့ကြောင်း အထက်ပါသတင်းအရင်းအမြစ်မှ ဆက်လက်ပြောဆိုထားသည်။

ထို့နောက် သေနတ်ပြ၍ “တစ်ယောက်မှမလှုပ်နဲ့ လှုပ်တဲ့သူ ပစ်လိုက်မည်” ဟု ခြိမ်း‌ခြောက်ပြောဆိုကာ ဆိုင်ပိုင်ရှင် ဝတ်ဆင်ထားသည့် ဆွဲကြိုး အပါအဝင် လက်ကောက်နှင့် လက်စွပ်တို့ကို လုယက်ယူဆောင်ထွက်ပြေးသွားခဲ့ ကြောင်း သိရသည်။

လက်ရှိတွင် ကျူးလွန်သူများကို ဖမ်းဆီးရမိရေးအတွက် သက်ဆိုင်ရာလုံခြုံရေးတပ်ဖွဲ့ဝင်များက ဆက်လက် ဆောင်ရွက်လျက်ရှိကြောင်း အဆိုပါ သတင်းအရင်းအမြစ်မှ ပြောဆိုထားသည်။