ယွန်း (NSS) - ဒီဇင်ဘာ ၇

ကျန်းမာရေးကဏ္ဍအတွက် ရန်ပုံငွေများကို တစ်နှစ်ထက်တစ်နှစ်တိုးမြှင့်ခွဲဝေချထားပေးနေကြောင်း နစကဥက္ကဋ္ဌက အသိပေးပြောကြားခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်း‌အောင်လှိုင်က ဒီဇင်ဘာလ(၆)ရက်တွင်နေပြည်တော်ရှိ MICC-II ၌ ကျင်းပခဲ့သည့် မြန်မာနိုင်ငံပြည်သူ့ကျန်းမာရေးပညာရပ်ဆိုင်ရာ နှီးနှောဖလှယ်ပွဲတွင် အထက်ပါကဲ့သို့ ပြောကြားခဲ့ခြင်းဖြစ်သည်။

နစကအနေဖြင့် ကျန်းမာရေးဝန်ထမ်းများ တာဝန်ကျရာနေရာတွင် အဆင် ပြေစွာ နေထိုင်တာဝန်ထမ်းဆောင်နိုင်ရေးအတွက် တိုင်းနှင့် ပြည်နယ်အသီးသီးတွင် ဝန်ထမ်းအိမ်ရာများ တိုးမြှင့်ဆောက်လုပ်ပေးလျက်ရှိကြောင်း သိရသည်။

ထို့ပြင် ပြည်သူ့ကျန်းမာရေးလုပ်ငန်းများဖြစ်သည့် ကာကွယ်ဆေးထိုးလုပ် ငန်း နှင့် တီဘီ၊ HIV ရောဂါကုသဆေး နှင့် ဆေးပစ္စည်းများ ဝယ်ယူရေး၊ မကူးစက်နိုင်သော ရောဂါများဖြစ်သည့် သွေးတိုး၊ ဆီးချို၊ နှလုံးရောဂါဆေးနှင့် ဆေးပစ္စည်းများဝယ်ယူရေး အပါအဝင် ကျန်းမာရေးကဏ္ဍအတွက် ရန်ပုံငွေများကို တစ်နှစ်ထက်တစ်နှစ် တိုးမြှင့်ခွဲဝေချထားပေးကြောင်း နစကဥက္ကဋ္ဌက အသိပေးပြောကြားခဲ့သည်။

အလားတူ သူနာပြုများ အပါအဝင် ကျန်းမာရေးဝန်ထမ်းများကို ပညာရှင်ဘွဲ့ချီးမြှင့်ငွေများ လစဥ်ချီးမြှင့်လျက်ရှိပြီး ခံစားခွင့်များကိုလည်း တိုးမြှင့်ခွင့်ပြုထားကြောင်း သိရသည်။

ပြည်သူ့ကျန်းမာရေးကဏ္ဍကို အထူးအလေးပေး ဆောင်ရွက်နိုင်မှုကြောင့် ၁၉၉၀ ပြည့်နှစ်တွင်ရှိခဲ့သည့် မိခင်သေဆုံးမှုနှုန်းသည် ၂၀၂၀ ပြည့်နှစ်တွင် (၆၀)ရာခိုင်နှုန်းအထိကျဆင်းခဲ့ပြီး အသက်(၅)နှစ်အောက်ကလေးသေဆုံးမှုနှုန်းသည်လည်း ၂၀၀၀ ပြည့်နှစ်နှင့် နှိုင်းယှဥ်ပါက ၅၃ ဒသမ ၂ ရာခိုင်နှုန်းကျဆင်းခဲ့ကြောင်း သိရသည်။

ထို့ပြင် မွေးကင်းစကလေးသေဆုံးမှုနှုန်းသည်လည်း ၂၀၀၀ ပြည့်နှစ်နှင့် နှိုင်းယှဥ်ပါက ၂၀၂၁ ခုနှစ်တွင် ၄၂ ဒသမ ၁ ရာခိုင်နှုန်းကျဆင်းခဲ့ကြောင်း နစကဥက္ကဋ္ဌက ထည့်သွင်းပြောကြားထားသည်။

အလားတူ HIV/AIDS နှင့်ငှက်ဖျားရောဂါများဖြစ်ပွားမှု၊ သေဆုံးမှုကိုလည်း သိသိသာသာလျှော့ချနိုင်ခဲ့ကြောင်း နစကဥက္ကဋ္ဌ၏ ပြောကြားချက်အရ သိရသည်။

ကျင်းပလျက်ရှိသည့် မြန်မာနိုင်ငံပြည်သူ့ကျန်းမာရေးပညာရပ်ဆိုင်ရာ နှီးနှောဖလှယ်ပွဲတွင် ပြည်တွင်းမှ ပြည်သူ့ကျန်းမာရေးပညာရှင် ၁၈၀၀ ကျော် နှင့် နိုင်ငံတကာမှ ပြည်သူ့ကျန်းမာရေးပညာရှင် ၃၀ တို့က ဆွေးနွေးမှုများ ပြုလုပ်လျက်ရှိကြောင်း သိရသည်။