Pika (NSS) - ဒီဇင်ဘာ ၅

အစ္စရေးနိုင်ငံသည် ဂါဇာကမ်းမြောင်ဒေသကို စစ်ဆင်ရေးများ ဆက်လက်လုပ်ဆောင်နေမှုနှင့်အတူ အစ္စရေးဝန်ကြီးချုပ်နေတန်ရာဟုသည် နိုင်ငံတကာရာဇဝတ်တရားရုံး(ICC) တွင် စစ်ရာဇဝတ်မှုစွဲချက်များကို ရင်ဆိုင်ရနိုင်ဖွယ်ရှိနေကြောင်း တူရကီသမ္မတအာဒိုဂန်က ခန့်မှန်းပြောဆိုခဲ့သည်။

ထို့အပြင် ဂါဇာကမ်းမြောင်ဒေသအပေါ် စစ်ဆင်ရေးများ ဆက်လက်လုပ်ဆောင်နေသော အစ္စရေးကို အနောက်အုပ်စုနိုင်ငံများက ထောက်ခံမှုကို အာဒိုဂန်က ပြစ်တင်ရှုတ်ချခဲ့ကြောင်းလည်း သိရသည်။ ပြီးခဲ့သည့် အောက်တိုဘာလ(၇)ရက်တွင် ဟားမက်လက်နက်ကိုင်အဖွဲ့က အစ္စရေးကို ဒုံးကျည်များဖြင့် စတင်ပစ်ခတ် တိုက်ခိုက်ခဲ့ခြင်းကြောင့် အစ္စရေးဖက်မှ အနည်းဆုံးလူ(၁၂ဝဝ)ဦး သေဆုံးခဲ့ပြီး အခြားလူ(၂၄ဝ) ဦးမှာ ဓါးစာခံအဖြစ် ဟားမက်လက်နက်ကိုင်အဖွဲ့၏ ဖမ်းဆီးခေါ်ဆောင်သွားခြင်းကို ခံခဲ့ရကြောင်းလည်း သိရသည်။

အဆိုပါတိုက်ခိုက်မှုများကို လက်တုံ့ပြန်သည့်အနေဖြင့် ဟားမက်လက်နက်ကိုင်အဖွဲ့ကို အမြစ်ပြတ်ချေမှုန်းသွားမည်ဖြစ်ကြောင်း အစ္စရေးဝန်ကြီးချုပ်နေတန်ရာဟုက ကတိပြုပြောဆိုခဲ့သည်။

ထို့နောက် အစ္စရေးဖက်မှ ဂါဇာကမ်းမြောင်ဒေသကို လေကြောင်းနှင့်မြေပြင်မှ ထိုးစစ်ဆင်မှုများ ပြန်လည်လုပ်ဆောင်ခဲ့ရာ ကလေးငယ်များနှင့် အမျိုးသမီးအများစု အပါအဝင် ပါလက်စတိုင်းနိုင်ငံသား (၁၅၈ဝဝ)ကျော် သေဆုံးခဲ့ကြောင်း သိရသည်။

ပြီးခဲ့သည့်သီတင်းပတ်တွင် အစ္စရေး နှင့် ဟားမက်လက်နက်ကိုင်အဖွဲ့တို့သည် ယာယီအပစ်အခတ်ရပ်စဲရေးကို သဘောတူညီခဲ့ပြီး အကျဉ်းသားလဲလှယ်မှုများကို လုပ်ဆောင်ခဲ့ကြကြောင်း သိရသည်။ သို့သော်လည်း ဟားမက်လက်နက်ကိုင်အဖွဲ့သည် အပစ်အခတ်ရပ်စဲရေးသဘောတူညီချက်ကို ချိုးဖောက်ကြောင်း အစ္စရေးအစိုးရက စွပ်စွဲပြောဆိုခဲ့ပြီး ဟားမက်လက်နက်ကိုင်အဖွဲ့အပေါ် တိုက်ခိုက်မှုများကို ဒီဇင်ဘာလ(၁)ရက်တွင် ပြန်လည်စတင်ခဲ့ကြောင်း သိရသည်။

တူရကီသမ္မတအာဒိုဂန် က "နေတန်ရာဟုဟာ ဂါဇာကမ်းမြောင်ဒေသအပေါ် စစ်ရာဇဝတ်မှုတွေ ကျူးလွန်နေတဲ့ လူတစ်ယောက်ဖြစ်ပါတယ်။ နေတန်ရာဟုဟာ တစ်နေ့မှာ နိုင်ငံတကာရာဇဝတ်တရားရုံးမှာ စစ်ရာဇဝတ်မှုစွဲချက်တွေကို ရင်ဆိုင်ရမယ်လို့ ကျွန်တော်ထင်ပါတယ်" ဟု ပြောခဲ့သည်။

ထို့အပြင် အစ္စရေး၏ အနောက်အုပ်စုမိတ်ဖက်နိုင်ငံများသည် ကလေးများကို သတ်ဖြတ်ရန်အတွက် အစ္စရေးကို ပံ့ပိုးမှုများ လုပ်ဆောင်ပေးနေကြောင်း အာဒိုဂန်က ပြောဆိုခဲ့သည်။ နေတိုးအဖွဲ့ဝင်နိုင်ငံဖြစ်သော တူရကီနိုင်ငံသည် ၎င်း၏ မိတ်ဖက်နိုင်ငံများ အပါအဝင် အခြားနိုင်ငံများနှင့်မတူဘဲ ဟားမက်လက်နက်ကိုင်အဖွဲ့ကို နိုင်ငံတကာအကြမ်းဖက်အဖွဲ့အစည်းအဖြစ် ဖော်ပြပြောဆိုခြင်းမျိုးမရှိခဲ့ကြောင်း သိရသည်။