မြူနစ် (NSS) - နိုဝင်ဘာ ၂၅

ရှမ်းပြည်နယ်၊ လောက်ကိုင်မြို့ပတ်ဝန်းကျင်၌ တိုက်ပွဲဖြစ်ပွားခဲ့ပြီး ၁၀၂၇ စစ်ဆင်ရေးသည် လောက်ကိုင်မြို့သို့ ဦးတည်လာနေကြောင်း MNDAA ဘက်က အသိပေးထားသည်။

ယမန်နေ့(နိုဝင်ဘာလ ၂၄ ရက်)တွင် လောက်ကိုင်မြို့ ပတ်ဝန်းကျင်ရှိ နေရာ(၃)ခုတွင် တပ်မတော်နှင့် MNDAA၊ TNLA ပူးပေါင်းအဖွဲ့များကြား ထိတွေ့တိုက်ပွဲများဖြစ်ပွားခဲ့ကြောင်း နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။

လောက်ကိုင်မြို့သစ်ဟု ခေါ်ဆိုလေ့ရှိသော တုန်းချိန်တစ်ဝိုက်တွင် ယမန်နေ့ နံနက်ပိုင်းမှစ၍ တိုက်ပွဲများ အပြင်းအထန်ဖြစ်ပွားခဲ့ကြောင်း မြို့ခံတစ်ဦးကလည်း NSS ကို ပြောသည်။

“တုန်းချိန်ဘက်မှာ ပစ်နေကြတာ။ တုန်းချိန်က လောက်ကိုင်ရဲ့ မြို့သစ်လို့ ခေါ်လို့ရတာပေါ့။ တော်တော်လေးပြင်းထန်ပုံရတယ်။ တိုက်လေယာဉ်တွေရော၊ လက်နက်ကြီးပစ်သံတွေရော ထောင့်ပေါင်းစုံကနေ ကြားနေရတယ်။ စစ်မီးက လောက်ကိုင်မြို့ထဲထိ ရောက်လာမှာ အရမ်းစိုးရိမ်တယ်”ဟု လောက်ကိုင်မြို့ခံတစ်ဦးက ပြောသည်။

၁၀၂၇ စစ်ဆင်ရေးသည် လောက်ကိုင်ဒေသဘက်သို့ ဦးတည်လာနေပြီဖြစ်ကြောင်းလည်း ကိုးကန့်လက်နက်ကိုင်အဖွဲ့ MNDAA က ထုတ်ဖော်အသိပေးထားသည်။

ထို့ပြင် ယမန်နေ့တွင်လည်း လောက်ကိုင်မြို့သစ်ဟု ခေါ်ဆိုလေ့ရှိသော တုန်းချိန်ဒေသတစ်ဝိုက်ရှိ တပ်မတော်၏ ဆိုင်တာအိုင်တောင်ကုန်းစခန်းကို ထိုးစစ်ဆင်တိုက်ခိုက်ခဲ့ကာ သိမ်းနိုင်ခဲ့သည်ဟု MNDAA က ထုတ်ပြန်ထားသည်ကို တွေ့ရှိရသော်လည်း NSS အနေဖြင့် သီးခြားအတည်ပြုနိုင်ခြင်း မရှိသေးပေ။

အလားတူ ယမန်နေ့တွင်လည်း ရှမ်းပြည်နယ်အရှေ့မြောက်ဘက်ရှိ နမ့်စလပ် နှင့် မုံးကျက်တို့တွင်လည်း တပ်မတော် နှင့် MNDAA၊ TNLA တို့ကြား တိုက်ပွဲများ ဆက်လက်ဖြစ်ပွားခဲ့ကြောင်း နစကမှ ဆိုသည်။

“ရှမ်းပြည်နယ်အရှေ့မြောက်ဘက်မှာတော့ နမ့်စလပ်မှာ ထိတွေ့တိုက်ပွဲ ဆက်လက်ဖြစ်ပွားတာရှိပါတယ်။ မုံးကျက်မှာတော့ စခန်းနေရာရွှေ့ပြောင်းခဲ့တာရှိပါတယ်။ ဒါနဲ့ပတ်သက်ပြီးလည်း နမ့်စလပ်နဲ့ မုံးကျက်မှာ MNDAA ၊ TNLA အဖွဲ့က အကျအဆုံးများစွာ ရှိပါတယ်။ ဒါကြောင့်လည်း ဒီနေ့မှာ ဓာတုဗုံးတွေ သုံးနေတယ်ဆိုတဲ့ စွပ်စွဲချက်မျိုး ထွက်ပေါ်လာတာရှိပါတယ်”ဟု ဗိုလ်ချုပ်ဇော်မင်းထွန်းက ပြောသည်။

MNDAA ဦးဆောင်သော TNLA၊ AA မဟာမိတ်လက်နက်ကိုင် (၃)ဖွဲ့သည် ပြီးခဲ့သော အောက်တိုဘာလ ၂၇ ရက်မှစတင်ကာ ၁၀၂၇ စစ်ဆင်ရေးအမည်ဖြင့် တပ်မတော်လုံခြုံရေးစခန်းများကို အင်အားအလုံး အရင်းဖြင့် ဝင်ရောက်တိုက်ခိုက်ကာ စစ်ပွဲများကို စတင်ဖော်ဆောင်ခဲ့သည်။

ထိုသို့တိုက်ခိုက်မှုများကြောင့် ပြည်ထောင်စုလမ်းမရှိ တံတားနှင့် လမ်းပိုင်းများသည် ပျက်စီးမှုများရှိခဲ့ကာ ကုန်သွယ်မှုများသည်လည်း လုံးဝရပ်တန့်လျက်ရှိသည်။

လက်ရှိတွင် လောက်ကိုင်မြို့၌ ဆန်တစ်ပြည်လျှင် တရုတ်ယွမ် ၁၅၀ (မြန်မာငွေကျပ် ၇၀၀၀၀ ဝန်းကျင်)အထိ ဈေးမြင့်တက်လျက်ရှိပြီး အခြေခံပြည်သူများ ရပ်တည်ရန် ခက်ခဲလာနေကြောင်း သိရသည်။