ကျော် (NSS) - နိုဝင်ဘာ ၂၅

ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO)အခြေပြုဒေသများသို့ ကယားပြည်နယ်မှစစ်ဘေးရှောင်များ နေ့စဥ်ရောက်ရှိလာကာ စစ်ဘေးရှောင်ဦးရေ ၉၀၀၀ ကျော်ရှိပြီဖြစ်ကြောင်း ဆီဆိုင်မြို့၊ PNLO ဆက်ဆံရေးရုံးတာဝန်ခံ ဆရာခွန်ထွန်းမှ ယနေ့ (နိုဝင်ဘာလ ၂၅ ရက်)က NSS ကိုပြောသည်။

"စစ်ဘေး‌ရှောင်တွေက နေ့စဥ်ဝင်လာကြတယ်။ ညဘက်ကြမှရောက်လာကြတဲ့လူတွေလည်းရှိတယ်။ PNLO ရဲ့အခြေပြုဒေသနဲ့ဆက်စပ်ဧရိယာတွေမှာ စစ်ဘေးရှောင်စခန်း ၂၁ ခုဖွင့်ထားရတယ်။ လက်ရှိခန့်မှန်းလူဦးရေ ၉၀၀၀ ကျော်လောက်ခိုလှုံနေကြတယ်"ဟု ဆရာခွန်ထွန်းကပြောသည်။

အဆိုပါ စစ်ဘေးရှောင်စခန်း ၂၁ ခုအပြင် PNLO အခြေပြုဒေသများရှိ ဆွေမျိုးအိမ်များ၊ အသိမိတ်ဆွေအိမ်များတွင် ရောက်ရှိခိုလှုံနေကြသူများလည်းရှိနေကြောင်း သိရသည်။

"ကျွန်တော်တို့ PNLO အခြေပြုဒေသမှာ စခန်း ၃ ခု၊ ဆက်စပ်ဧရိယာမှာစခန်း ၁၈ ခု အားလုံးပေါင်း ၂၁ ခုကိုလတ်တလောဖွင့်ထားရတယ်။ အရန်ရိက္ခာတွေကိုလည်း ဖြန့်ခွဲပြီးပို့ပေးထားတယ်။ ရိက္ခာလိုအပ်ချက်တွေတော့ရှိတယ်"ဟု ဆရာခွန်ထွန်းက ပြောသည်။

PNLO အခြေပြုဒေသနှင့်ဆက်စပ်ဧရိယာများတွင်ဖွင့်လှစ်ထားသည့် စစ်ဘေးရှောင်စခန်းများတွင် စစ်ဘေးရှောင်များထပ်မံရောက်ရှိလာပါက နေထိုင်ရအဆင်ပြေစေရန် အဆောက်အဦးများကို PNLO မှတာဝန်ရှိသူများက ဆောက်လုပ်ပေးလျက်ရှိကြောင်း သိရသည်။

"စစ်ဘေးရှောင်တွေအတွက် အလှူရှင်တွေက လှူဒါန်းတာတွေကိုလည်း ဖြန့်ခွဲပေးပို့လှူဒါန်းပေးနေပါတယ်။ စားနပ်ရိက္ခာတွေ အမိုးအကာ၊ အခြုံအခင်းတွေကို ဝေငှပေးထားပါတယ်"ဟု ဆရာခွန်ထွန်းကဆက်လက်ပြောသည်။

လက်ရှိအချိန်၌ PNLO အခြေပြုဒေသနှင့်ဆက်စပ်ဧရိယာများရှိ စစ်ဘေးရှောင်စခန်းများသို့ ကယား ပြည်နယ်မှစစ်ဘေးရှောင်များ နေ့စဥ်ဝင်ရောက်လျက်ရှိသဖြင့် စစ်ဘေးရှောင်ဦးရေစာရင်းအား အတိအကျစာရင်းပြုစုနိုင်ခြင်းမရှိသေးကြောင်း သိရသည်။