ကျော် (NSS) - နိုဝင်ဘာ ၂၃

မကွေးတိုင်း၊ ဆင်ပေါင်ဝဲမြို့နယ်တွင် ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ(USDP)၏ အောင်လံခရိုင်အတွင်းရေးမှူးကို PDF အဖွဲ့မှ နိုဝင်ဘာလ ၂၂ ရက်ညပိုင်းက ပစ်ခတ်သတ်ဖြတ်ခဲ့ကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။

ယမန်နေ့ (နိုဝင်ဘာလ၂၂ ရက်)၊ ည ၇ နာရီခွဲကျော်ခန့်က PDF အဖွဲ့ဝင်များသည် ဆင်ပေါင်ဝဲမြို့နယ်၊ ငရန့်ချောင်းကျေးရွာနေ USDP ပါတီ၏ အောင်လံခရိုင်အတွင်းရေးမှူး ဒေါ်တင်မာဌေး(၅၄)နှစ်၏ နေအိမ်သို့ ရောက်ရှိလာခဲ့ကြကြောင်း သိရသည်။

ထိုသို့ရောက်ရှိလာပြီးနောက် နေအိမ်၌ရှိနေသည့် ဒေါ်တင်မာဌေးအား သေနတ်ဖြင့်ပစ်ခတ်ခဲ့ကြကြောင်း သိရသည်။

"စုံစမ်းလို့သိရသလောက်ဆိုရင် PDF အဖွဲ့ဝင် ၅ ယောက်က ဆိုင်ကယ် ၃ စီးနဲ့ဒေါ်တင်မာဌေးအိမ်ကိုရောက်လာတယ်။ ရောက်လာပြီးတာနဲ့ သေနတ်တွေနဲ့ပစ်ပြီး ပြန်မောင်းထွက်သွားကြတယ် လိုအပ်တဲ့စုံစမ်းစစ်ဆေးတာတွေလုပ်နေပါတယ်"ဟု လုံခြုံရေးအဖွဲ့နှင့်နီးစပ်သူတစ်ဦးက ပြောသည်။

သေနတ်ဖြင့်ပစ်ခတ်ခံရမှုကြောင့် ဒေါ်တင်မာဌေးသည် ကျည်ထိမှန်ဒဏ်ရာများရရှိ၍ အခင်းဖြစ်နေရာ၌ သေဆုံးသွားခဲ့ကြောင်း သိရသည်။

ထို့ပြင် ယမန်နေ့ ၊ နေ့လည် ၁၂ နာရီခွဲခန့်ကလည်း ပဲခူးတိုင်း၊ လက်ပံတန်းမြို့နယ်၊ ဝါးရုံပင်စင်းကျေးရွာ အုပ်စု၏ အုပ်ချုပ်ရေးမှူးဦးဝင်းမြင့်(၅၉)နှစ်အား PDF အဖွဲ့ဝင်များမှ သေနတ်ဖြင့်ပစ်ခတ်သတ်ဖြတ်ခဲ့ကြကြောင်း သိရသည်။

PDF အဖွဲ့ဝင်များသည် သရက်ချောင်းကျေးရွာမှ ရိုးမပတ်လမ်းရှိ ငါးကန်သို့သွားရန် ဆိုင်ကယ်မောင်းလာသည့် ဦးဝင်းမြင့်အား အရှေ့သရက်ချောင်းကျေးရွာနှင့် ရိုးမပတ်လမ်းကြားနေရာ၌ သေနတ်ဖြင့်ပစ်ခတ်သတ်ဖြတ်ခဲ့ကြခြင်းဖြစ်ကြောင်း သိရသည်။

ထိုသို့ ပစ်ခတ်ခံရမှုကြောင့် ဦးဝင်းမြင့်၏ ညာဘက်လက်ကောက်ဝတ် ၁ ချက်၊ မေးစေ့မှနောက်ဂုတ်ပိုးဖောက်ထွက်၊ ဘယ်ဘက်လည်ပင်းရှပ်ထိ၊ ဘယ်ညာရင်ဘတ်တို့တွင် ကျည်ထိမှန်ဒဏ်ရာများရရှိ၍ အခင်းဖြစ်နေရာ၌ သေဆုံးသွားခဲ့ကြောင်း သိရသည်။

ဖြစ်စဥ်များမှ ပြစ်မှုကျူးလွန်သူများအား ဖမ်းဆီးရမိရေးနှင့်ဥပဒေအရ ထိရောက်စွာအရေးယူနိုင်ရေးတို့အတွက် လုံခြုံရေးအဖွဲ့ဝင်များက စုံစမ်းစစ်ဆေးမှုများပြုလုပ်လျက်ရှိကြောင်း သိရသည်။