ကျော်(NSS) - နိုဝင်ဘာ ၇

အကြမ်းဖက်မှုများရှိနေသည့် နယ်မြေများတွင် ဖွံ့ဖြိုးတိုးတက်မှုနောက်ကျကျန်ခဲ့ခြင်းအကျိုးဆက်ကို နယ်မြေခံလူထုနှင့်တိုင်းရင်းသားများက ခံစားနေရလျက်ရှိဟု နစက ဥက္ကဋ္ဌက ပြောကြားခဲ့သည်။

ယနေ့ (နိုဝင်ဘာလ ၇ ရက်)တွင်ကျရောက်သည့် (၆၈)နှစ်မြောက် ကရင်ပြည်နယ်နေ့အခမ်းအနားသို့ နစက ဥက္ကဋ္ဌမှသဝဏ်လွှာပေးပို့ရာ၌ အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

နိုင်ငံတော်အစိုးရအနေဖြင့် ဒေသတည်ငြိမ်အေးချမ်းရေးနှင့် တရားဥပဒေစိုးမိုးရေးအတွက် တစ်နိုင်ငံလုံး တစ်ပြေးညီအကြားအလပ်မရှိအောင်ဆောင်ရွက်ပေးလျက်ရှိသည်ဟု သဝဏ်လွှာ၌ ပြောကြားထား သည်။ 

"အကြမ်းဖက်မှုတွေရှိနေတဲ့ နယ်မြေတွေမှာ ကဏ္ဍအလိုက် ဖွံ့ဖြိုးတိုးတက်မှုဆောင်ရွက်လို့မရတဲ့အ တွက် နောက်ကျကျန်ခဲ့ခြင်းအကျိုးဆက်ကို နယ်မြေခံလူထုနဲ့တိုင်းရင်းသားပြည်သူတွေ ခံစားနေရပါတယ်" ဟု နစက ဥက္ကဋ္ဌက ပြောသည်။

အသိဉာဏ်ဆင်ခြင်မှုတရားကင်းမဲ့သည့် အဖျက်သမား သစ္စာဖောက်များ၏ နှောင့်ယှက်ဖျက်ဆီး မိုက်မဲမှုများကြောင့် ဒေသခံပြည်သူများဆင်းရဲဒုက္ခများစွာခံစားနေရသည်ဟုလည်း နစက ဥက္ကဋ္ဌ ပေးပို့သည့် သဝဏ်လွှာ၌ရေးသားထားသည်။

ထို့ကြောင့် တိုင်းရင်းသားပြည်သူများအနေဖြင့် ဒေသအကျိုး၊ နယ်မြေအကျိုး၊ ပြည်သူအကျိုးကိုကြည့်၍ အကြမ်းဖက်မှုတိုက်ဖျက်ရေး၊ တည်ငြိမ်အေးချမ်းရေးကို ပူးပေါင်းပါဝင်ဆောင်ရွက်ပေးကြရန် နစက ဥက္ကဋ္ဌက တိုက်တွန်းပြောကြားခဲ့သည်။

ထို့ပြင် နိုင်ငံတော်အစိုးရအနေဖြင့် နိုင်ငံတည်ငြိမ်အေးချမ်းစေရန် နှင့် ဖွံ့ဖြိုးတိုးတက်စေရန် ဆောင်ရွက်လျက်ရှိကာ တိုင်းရင်းသားပြည်သူတစ်ဦးချင်း၏ လူမှုစီးပွားဘဝများတိုးတက်မှသာ နိုင်ငံဖွံ့ဖြိုးတိုးတက်မှုများဖြစ်ပေါ်လာမည်ဖြစ်၍ လူတစ်ဦးချင်း၏ လူမှုစီးပွားဘဝတိုးတက်ရေးကို ဦးတည်ချက်ထားဆောင် ရွက်ရန်လည်း နစက ဥက္ကဋ္ဌ ပေးပို့သည့်သဝဏ်လွှာ၌ရေးသားထားသည်။