Pika (NSS) - နိုဝင်ဘာ ၆ 

ယူကရိန်းသမ္မတဇီလန်စကီးသည် အမေရိကန်သမ္မတဟောင်းဒေါ်နယ်ထရမ့်ကို ယူကရိန်းနိုင်ငံသို့ လာရောက် လည်ပတ်ရန် ဖိတ်ကြားခဲ့ကြောင်းလည်း သိရသည်။

ထို့အပြင် ဒေါ်နယ်ထရမ့်သည် ရုရှားနှင့်ယူကရိန်း ပဋိပက္ခကို (၂၄)နာရီအတွင်း ဖြေရှင်းပေးနိုင်သည်ဟု ပြောဆိုခဲ့ သော်လည်း လက်ရှိအချိန်အထိ မဖြေရှင်းနိုင်သေးသည့်အကြောင်းအရင်းကို လက်တွေ့ပြသရန် ဇီလန်စကီးက တောင်းဆိုခဲ့ကြောင်းလည်း သိရသည်။

ဇီလန်စကီးက "အမေရိကန်သမ္မတဟောင်း ဒေါ်နယ်ထရမ့်က သူဟာ (၂၄)နာရီအတွင်း ရုရှား-ယူကရိန်းပဋိပက္ခကို စီမံခန့်ခွဲပြီး အဆုံးသတ်အောင်လုပ်ပေးနိုင်တယ်လို့ ပြောဆိုခဲ့ပါတယ်။ ဒါကြောင့် ကျွန်တော် ဒေါ်နယ်ထရမ့်ကို ဒီကို လာရောက်လည်ပတ်ဖို့ ဖိတ်ခေါ်ခဲ့တာပါ။ ဒေါ်နယ်ထရမ့် ယူကရိန်းကိုလာရောက်လည်ပတ်ခဲ့မယ်ဆိုရင် ကျွန်တော်သူနဲ့စကားပြောဖို့ အချိန်(၂၄)မိနစ်ပဲ လိုပါတယ်။ ဒီစစ်ပွဲကို သူစီမံခန့်ခွဲမှုတွေ မလုပ်ဆောင်နိုင်ဘူး ဆိုတာကိုရှင်းပြဖို့ အချိန်(၂၄)မိနစ်ပဲ လိုပါတယ်" ဟု ပြောခဲ့သည်။

ဒေါ်နယ်ထရမ့်သည် လက်ရှိအချိန်တွင် လာမည့်နှစ်သမ္မတရွေးကောက်ပွဲတွင် သမ္မတအဖြစ် ရွေးချယ်ခံရရန် အတွက် ကြိုးပမ်းနေကြောင်းလည်း သိရသည်။ ယူကရိန်းသို့ စစ်လက်နက်ပစ္စည်းများ ဆက်လက်ပံ့ပိုးရန် အမေရိကန်သမ္မတဂျိုးဘိုင်ဒန်က ကတိပြုထားသော်လည်း အဆိုပါလုပ်ရပ်မှာ အမေရိကန်နိုင်ငံကို နျူကလီးယား လက်နက်ပိုင်ဆိုင်သည့် ရုရှားနိုင်ငံနှင့်ဖြစ်ပွားမည့် တတိယကမ္ဘာစစ်ထဲသို့ ဆွဲခေါ်နေခြင်းမျိုးသာဖြစ်ကြောင်း ဒေါ်နယ်ထရမ့်က သတိပေးပြောဆိုခဲ့သည်။

အမေရိကန်သမ္မတဟောင်းဒေါ်နယ်ထရမ့်က ၎င်းသည် ၂ဝ၂၄ ခုနှစ် သမ္မတရွေးကောက်ပွဲတွင် သမ္မတအဖြစ် ရွေးချယ်ခံရမည်ဆိုပါက ရုရှား နှင့် ယူကရိန်းကြား ငြိမ်းချမ်းရေးသဘောတူညီချက်ကို(၂၄)နာရီအတွင်း ရရှိအောင် လုပ်ပေးမည်ဟု အကြိမ်ကြိမ်ကတိပြုပြောခဲ့ဖူးသည်။

ပြီးခဲ့သည့်စက်တင်ဘာလတွင် ဒေါ်နယ်ထရမ့်က "ကျွန်တော် ရုရှားသမ္မတပူတင်ကို အခန်းတစ်ခန်းထဲမှာ ထိုင်ခိုင်းမယ်။ ပြီးတော့ ယူကရိန်းသမ္မတဇီလန်စကီးကိုလည်း အဲဒီအခန်းထဲမှာပဲ ထိုင်ခိုင်းမယ်။ ပြီးတော့ သူတို့ နှစ်ယောက်နဲ့အတူ သဘောတူညီချက်တစ်ခုရအောင် ကျွန်တော်လုပ်မှာပါ" ဟု ပြောခဲ့သည်။