Pika (NSS) - နိုဝင်ဘာ ၃

အောက်တိုဘာလနှောင်းပိုင်းတွင် ကမ္ဘာ့ယူရေနီယမ်ဈေးနှုန်းများသည် ပြီးခဲ့သည့်(၁၅)နှစ်ကျော်အတွင်း အမြင့်ဆုံးသို့ ရောက်ရှိသွားခဲ့ကြောင်း  COMEX ကုမ္ပဏီ၏ ဒေတာအချက်အလက်များအရ သိရသည်။ 

ယူရေနီယမ်ဈေးနှုန်းများ မြင့်တက်လာရခြင်း အကြောင်းအရင်းများမှာ ပထဝီဝင်နိုင်ငံရေးဆိုင်ရာ တင်းမာမှုများ အပါအဝင် အခြားအချက်များစွာကြောင့်ဖြစ်ကြောင်း လေ့လာသုံးသပ်သူများက ပြောကြားခဲ့သည်။ 

အောက်တိုဘာလ(၃၁)ရက်မှ စတင်ပြီး လာမည့်နိုဝင်ဘာလအတွက် ယူရေနီယမ်ပေးပို့မှုများသည်  တစ်ပေါင်လျှင် အမေရိကန်ဒေါ်လာ (၇၄ ဒသမ ၅) ဒေါ်လာထိ မြင့်တက်သွားခဲ့ကြောင်း ဒေတာအချက်အလက်များအရ သိရသည်။ ယူရေနီယမ်ဈေးနှုန်းများသည် ယခုနှစ်အစောပိုင်းကတည်းက (၅၅)ရာခိုင်နှုန်း မြင့်တက်ခဲ့ခြင်းဖြစ်ကြောင်း သိရသည်။

နျူကလီးယားစွမ်းအင်အတွက် ကျယ်ပြန့်စွာအသုံးပြုသော ယူရေနီယမ် ဝယ်လိုအားသည် ကမ္ဘာလုံးဆိုင်ရာ အရန်ပမာဏကန့်သတ်ချက်များနှင့်အတူ ဈေးနှုန်းများအပေါ် ဖိအားများပေးလျက်ရှိကြောင်းလည်း သိရသည်။

ရုရှားနိုင်ငံမှ စွမ်းအင်ထောက်ပံ့မှုများ ကျဆင်းနေချိန်တွင် နျူကလီးယားစွမ်းအင်အပေါ် တစ်ကမ္ဘာလုံးက အသစ် တဖန်ပြန်လည်အာရုံစိုက်လာခဲ့ကြောင်း လေ့လာသုံးသပ်သူများက ပြောကြားခဲ့သည်။ စိုးရိမ်မှုများမြင့်တက်နေမှု နှင့်အတူ ကမ္ဘာ့ဒုတိယအကြီးဆုံး ယူရေနီယမ်ထုတ်လုပ်သည့် ကနေဒါကုမ္ပဏီ Cameco က ၂ဝ၂၃ ခုနှစ်အတွက် ထုတ်လုပ်မှု ခန့်မှန်းချက်များကို လျှော့ချခဲ့ကြောင်းလည်း သိရသည်။

ထို့အပြင် ယူရေနီယမ်ထုတ်လုပ်သည့် ပြင်သစ်ကုမ္ပဏီ Orano သည်လည်း ကမ္ဘာလုံးဆိုင်ရာ ယူရေနီယမ် ထွက်ရှိမှု ၏ (၄)ရာခိုင်နှုန်းရှိသော နိုင်ဂျာတွင် မကြာသေးမီကဖြစ်ပွားခဲ့သော အာဏာသိမ်းမှုများကြောင့် အခက်အခဲများ နှင့် ရင်ဆိုင်နေရကြောင်း သိရသည်။

ရုရှား၏ စွမ်းအင်ထောက်ပံ့မှု ကျဆင်းလာခဲ့ပြီးနောက် နိုင်ဂျာနိုင်ငံသည် ပြီးခဲ့သည့်နှစ်တွင် ဥရောပသမဂ္ဂသို့ ယူရေနီယမ်ထောက်ပံ့ပေးခဲ့သည့် ဒုတိယအကြီးဆုံးထောက်ပံ့သူဖြစ်လာခဲ့ကြောင်းလည်း သိရသည်။ နျူကလီးယားစွမ်းအင်အပေါ် အသစ်တဖန်ပြန်လည်အာရုံစိုက်မှုများကြောင့် ကမ္ဘာတစ်ဝှမ်းတွင် ယူရေနီယမ် အပါအဝင် အရေးပါသောသတ္တုတွင်းထွက်များ၏ ဝယ်လိုအားများ မြင့်တက်လာခဲ့ကြောင်း နိုင်ငံတကာစွမ်းအင် အေဂျင်စီ (IEA) က ခန့်မှန်းပြောခဲ့သည်။

ကမ္ဘာ့နျူကလီးယားအဖွဲ့၏ မကြာသေးမီကထုတ်ပြန်ခဲ့သော အစီရင်ခံစာတွင် နျူကလီးယားစွမ်းရည်သည် (၈ဝ) ရာခိုင်နှုန်းနီးပါး ကြီးထွားလာခဲ့ပြီး ၂ဝ၄ဝ ပြည့်နှစ်တွင် ယူရေနီယမ်လိုအပ်ချက်မှာ နှစ်ဆထိတိုးလာနိုင်ဖွယ်ရှိကြောင်း ခန့်မှန်းပြောထားသည်။