ဂျန်ဇက် (NSS) - အောက်တိုဘာ ၃ဝ

အစ္စရေးစစ်တပ်တွေဟာ ဂါဇာမြို့လယ်ခေါင်ရှိ al-Quds ဆေးရုံနားကို ရော့ကတ်ဒုံးကျည်တွေနဲ့ ပစ်ခတ်တိုက်ခိုက်ခဲ့ကြောင်း၊ အဲဒီတိုက်ခိုက်မှုဟာ ဆေးရုံဝန်ထမ်းတွေထွက်ပြေးစေဖို့ ရည်ရွယ်လုပ်ဆောင်တာမျိုးဖြစ်ကြောင်း ပါလက်စတိုင်း လခြမ်းနီအဖွဲ့ကပြောပါတယ်။အဆိုပါအဖွဲ့က "အစ္စရေးစစ်တပ်ဟာ ဆေးရုံအနီးကို ရော့ကတ်ဒုံးကျည်တွေနဲ့ပစ်ခတ်ခဲ့တယ်။ အဲဒီဆေးရုံမှာရှိနေတဲ့ ဝန်ထမ်းတွေ၊ လူနာတွေနဲ့ နေရပ်စွန့်ခွာတိမ်းရှောင်နေသူတွေကိုထွက်ပြေးဖို့ ရည်ရွယ်လုပ်ဆောင်တာဖြစ်တယ်"လို့ ပြောပါတယ်။ 

အီရန်နိုင်ငံက ကျောထောက်နောက်ခံပေးထားတဲ့ လက်နက်ကိုင်အဖွဲ့တွေဟာ ပြီးခဲ့တဲ့ ၂၄ နာရီအတွင်း အီရတ် နဲ့ ဆီးရီးယားနိုင်ငံတို့ရှိ အမေရိကန်စစ်အခြေစိုက်စခန်းတွေကို ပစ်မှတ်ထားတိုက်ခိုက်နေကြောင်း သိရပါတယ်။ အီရတ်နိုင်ငံရှိ လက်နက်ကိုင်အဖွဲ့က ၎င်းတို့ဟာ ဆီးရီးယားနိုင်ငံအရှေ့ဘက်ပိုင်းရှိ အမေရိကန်ရဲ့ al-Shaddadi စစ်အခြေစိုက်စခန်းကို ဒရုန်းတွေနဲ့တိုက်ခိုက်ခဲ့သလို Deir ez-Zor ဒေသအနီးရှိ အမရိကန်စစ်အခြေစိုက်စခန်းကိုလည်းတိုက်ခိုက်ခဲ့ကြောင်း သတင်းထုတ်ပြန်ထားပါတယ်။ 

ရုရှားနိုင်ငံ ဒါဂက်စတန်ပြည်နယ် မာခက်ချကာလာ မြို့ရှိလေဆိပ်မှာ စိတ်ဆိုးဒေါသဖြစ်နေတဲ့ လူအုပ်ကြီးဟာ အစ္စရေးဆန့်ကျင်ရေးဆန္ဒပြပွဲများလုပ်ဆောင်ခဲ့ရာ ရုရှားလုံခြုံရေးတပ်ဖွဲ့ဝင်များဖြန့်ကြတ်ချထားခဲ့ရကြောင်းသိရပါတယ်။ အဆိုပါ အစ္စရေးဆန့်ကျင့်ရေးလူအုပ်ကြီးဟာ လေဆိပ်လုံခြုံရေးဇုန်ကိုချိုးဖျက်ဝင်ရောက်ခဲ့ပြီး လေယာဉ်ပြေးလမ်းကိုဝင်ရောက်တာမျိုးတွေလည်းရှိခဲ့တဲ့အတွက် လေကြောင်းခရီးစဉ်များ နှောင့်နေးခဲ့ရကြောင်းသိရပါတယ်။ 

အမေရိကန်ရဲ့မဟာမိတ်အဖွဲ့စည်းတစ်ခုဖြစ်တဲ့ ဂျော်ဒန်နိုင်ငံက နယ်စပ်ကာကွယ်ရေးပိုင်းပိုမိုကောင်းမွန်စေဖို့ ပက်ထရီယော့ ဒုံးကျည်ကာကွယ်ရေးစနစ်များဖြန့်ကြတ်ချထားပေးဖို့အမေရိကန်အစိုးရကိုတိုက်တွန်းတောင်းဆိုလိုက်ကြောင်းသိရပါတယ်။ ဂျော်ဒန်နိုင်ငံဟာ ဒေသအတွင်းတင်းမာမှုတွေမြင့်တက်နေချိန်မှာ နယ်စပ်ဒေသ ကာကွယ်ရေးပိုင်းပိုမိုကောင်းမွန်စေဖို့ပက်ထရီယော့ဇ်ဒုံးကျည်တွေ ဖြန့်ကြတ်ချထားပေးဖို့ တောင်းဆိုခဲ့တာဖြစ်ကြောင်းသိရပါတယ်။ 

ရုရှားနိုင်ငံ Kabardino-Balkaria ဒေသရဲ့မြို့တော်ဖြစ်တဲ့  Nalchik မြို့မှာ ဆောက်လုပ်လျက်ရှိနေဆဲဖြစ်တဲ့ ဂျူးယာဉ်ကျေးမှုစင်တာကို တိုက်ခိုက်ဖျက်ဆီးဖို့ ကြိုးပမ်းမှုတွေဖြစ်ပွားခဲ့ကြောင်းသိရပါတယ်။ အဆိုပါဒေသမှာနေထိုင်သူအားလုံးရဲ့၇၀ ရာခိုင်နှုန်းဖြစ်တဲ့ လူပေါင်း ၉ သိန်းဟာ မွတ်စလင်တွေဖြစ်ကြောင်းသိရပါတယ်။ မြို့ခံတွေဟာ ဂျူးယာဉ်ကျေးမှုစင်တာအဆောက်အဦးကို အောက်တိုဘာ ၂၉ရက်နေ့က မီးရှို့ဖျက်ဆီးဖို့ ကြိုးစားခဲ့ခြင်းဖြစ်ကြောင်းသိရပါတယ်။