မျိုးကြီး (NP News) - ဖေဖော်ဝါရီ ၂၈

ရခိုင်ပြည်နယ်၌ စစ်အင်အားတိုးချဲ့မှု မရှိကြောင်းနှင့် ULA/AA ၏ တစ်ဖက်သတ်စွပ်စွဲပြောဆိုမှုများသည် ငြိမ်းချမ်းရေးကို အထောက်အကူမပြုကြောင်း နစကဘက်က ပြန်လည်တုံ့ပြန်ထားသည်။

နစက၏ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဖေဖော်ဝါရီလ ၂၇ ရက်တွင် မီဒီယာများကို အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။

ULA/AA နှင့်ပတ်သက်သူများကို တပ်မတော်က ဖမ်းဆီးထားသည့်အပေါ် ပြန်မလွှတ်ပေးသေးကြောင်းတစ်ဖက်သတ် စွပ်စွဲပြောဆိုနေမှုများကို တွေ့ရှိရကြောင်း ဗိုလ်ချုပ်ဇော်မင်းထွန်းက ဆိုသည်။

နစကအစိုးရအနေဖြင့် ပြီးခဲ့သော NCA လက်မှတ်ရေးထိုးခြင်း(၆)နှစ်ပြည့်နေ့တွင် ၎င်းတို့နှင့်ပတ်သက်သူ (၆၁)ဦး၊ စိန်ရတုပြည်ထောင်စုနေ့တွင် (၄၆)ဦး၊ အမျိုးသားနေ့တွင် (၁၇)ဦးတို့ကို ပြစ်ဒဏ်လွတ်ငြိမ်းခွင့်ပေးခဲ့ကြောင်း ၎င်းက ဆိုသည်။

ထို့ပြင် ULA/AA အပြင် KIA၊ KNU၊ MNDAA၊ RCSS၊ SSPP၊ TNLA အဖွဲ့တို့နှင့်ပတ်သက်ပြီး တရားစွဲဆိုခံ ထားရသူများကိုလည်း ငြိမ်းချမ်းရေးအား ရှေးရှု့ကာ ပြစ်ဒဏ်လွတ်ငြိမ်းခွင့်များပေးခဲ့ကြောင်း နစကပြောခွင့်ရက ပြောသည်။

ထိုသို့ ပြစ်ဒဏ်လွတ်ငြိမ်းခွင့်ပေးခဲ့သည်မှာ စုစုပေါင်း (၂ဝ၅)ဦးအထိရှိခဲ့ကြောင်း ဗိုလ်ချုပ်ဇော်မင်းထွန်းက ပြောသည်။

“ဒီအချက်အလက်တွေ အမှန်တကယ်ရှိပြီးဖြစ်တဲ့ ဒီအချက်အလက်တွေကို မျက်ကွယ်ပြုပြီး ဒီလိုမျိုးတစ် ဖက်သတ်စွပ်စွဲ ပြောဆိုတာဟာ ငြိမ်းချမ်းရေးအတွက် အထောက်အကူမပြုဘူးလို့ပဲ ပြောချင်ပါတယ်” ဟု နစကပြောခွင့်ရက တုံ့ပြန်ထားသည်။

ထို့ပြင် ရခိုင်ပြည်နယ်၌ စစ်အင်အားများ တိုးချဲ့နေသည်ဟု ပြောဆိုချက်များနှင့်ပတ်သက်၍ ဗိုလ်ချုပ်ဇော်မင်းထွန်းက “ နောက်တစ်ခုကတော့ ရခိုင်ပြည်နယ်နဲ့ပတ်သက်ပြီးတော့ စစ်အင်အားတွေ တိုးချဲ့နေတယ်ဆိုတဲ့ ပြောဆိုချက်မျိုးတွေနဲ့ ရခိုင်ပြည်သူလူထုကို ထင်ရောင်ထင်မှားဖြစ်အောင် ဆောင်ရွက်နေတာမျိုး ရှိပါတယ်။ တပ်မတော်အနေနဲ့ကတော့ ရခိုင်ပြည်နယ်မှာ ယခင်ကတည်းကရှိပြီးဖြစ်တဲ့ လုံခြုံရေးနဲ့ပတ် သက်ပြီးတော့ ရှိနေတဲ့အင်အားတွေအတိုင်းပဲ ရှိပါတယ်” ဟု ပြန်လည်တုံ့ပြန်ထားသည်။

သို့သော် ပြည်သူလူထုရပ်ရွာအေးချမ်းသာယာရေး၊ လမ်းပန်းဆက်သွယ်မှုလုံခြုံချောမွေ့ရေးအတွက် လိုအပ်သည့် လုံခြုံရေးအင်အားများကို အသုံးပြုထားမှုမျိုးရှိကြောင်း နစကပြောခွင့်ရက ဖွင့်ဟပြောဆိုထားသည်။

ယမန်နေ့ (ဖေဖော်ဝါရီလ ၂၇ ရက်)က ကျင်းပခဲ့သော ULA/AA ၏ သတင်းစာရှင်းလင်းပွဲတွင် ဦးခိုင်သုခက ရခိုင်ပြည်နယ်အတွင်း တပ်မတော်မှ စစ်အင်အားများ တိုးချဲ့နေကြောင်း ထည့်သွင်းပြောဆိုခဲ့သည်။

ရခိုင်ပြည်သူလူထုနှင့် တစ်နိုင်ငံလုံးရှိ ပြည်သူများအနေဖြင့် ဖွံ့ဖြိုးတိုးတက်ရေးသည် တည်ငြိမ်အေးချမ်းမှုရှိမှသာရရှိမည်ဖြစ်ပြီး ပြည်သူလူထုအားလုံးအနေဖြင့် ရေရှည်တည်တံ့ခိုင်မြဲသည့်ငြိမ်းချမ်းရေးရရှိရန် ဝိုင်းဝန်းကြိုးပမ်းကြရန်လည်း ဗိုလ်ချုပ် ဇော်မင်းထွန်းက တိုက်တွန်းထားသည်။