စော (NSS) - အောက်တိုဘာ ၁၇

မြန်မာနိုင်ငံရုပ်ရှင်အစည်းအရုံးအနေဖြင့် မြန်မာ့ရိုးရာဓလေ့ခေါင်းစဉ်ဖြင့် ဇာတ်လမ်းတိုရုပ်ရှင်ပြိုင်ပွဲကို ကျင်းပမည်ဖြစ်ကြောင်း သိရသည်။

မျိုးဆက်သစ်ရုပ်ရှင်ဖန်တီးထုတ်လုပ်သူများကို  အားပေးမြှင့်တင်ရန်နှင့် ရုပ်ရှင်အပေါ်စိတ်ဝင်စား တန်ဖိုးထားတတ်လာစေရန် ရည်ရွယ်၍ မြန်မာနိုင်ငံရုပ်ရှင်အစည်းအရုံးက အဆိုပါဇာတ်လမ်းတိုရုပ်ရှင် ပြိုင်ပွဲ (၂၀၂၃)ကို ကျင်းပရခြင်းဖြစ်ကြောင်း သိရသည်။

“ကျွန်တော်တို့ ပြိုင်ပွဲကျင်းပရတဲ့ ရည်ရွယ်ချက်ကိုက မျိုးဆက်သစ်လူငယ်တွေကို အားပေးချင်တာ။ ဒီရုပ်ရှင်ဇာတ်ကားကစဖို့က ခက်တယ်။ အွန်လိုင်းပေါ်မှာ ဇာတ်လမ်းတိုလေးတွေ အများကြီးတွေ့ရတယ်။ ဒါပေမယ့် ပြန့်ကျဲနေတယ်။ အဲဒီတော့ ပြန့်ကျဲနေတဲ့လူငယ်တွေကို  စုစုစည်းစည်းနဲ့ နိုင်ငံတကာကို ထိုးဖောက်နိုင်အောင် စင်တင်ပေးတဲ့သဘောပါ” ဟု မြန်မာနိုင်ငံရုပ်ရှင်အစည်းအရုံး၊ နိုင်ငံတကာ ဆက်ဆံ‌ရေးကော်မတီမှ ပြန်ကြားရေးမှူး ဦးချမ်းသာကြည်စိုးက NP News ကိုပြောသည်။

အဆိုပါ ပြိုင်ပွဲခေါင်းစဉ်သည် မြန်မာ့ရိုးရာဓလေ့ဖြစ်ပြီး (၅)မိနစ်အောက် ရိုက်ကူးထားသည့် ဇာတ်လမ်းတို နှင့် (၅)မိနစ်မှ (၂၅)မိနစ်အတွင်း ရိုက်ကူးထားသည့် ဇာတ်လမ်းတိုဟူ၍ အမျိုးအစားနှစ်မျိုးခွဲထားကြောင်း သိရသည်။

ပြိုင်ပွဲဝင်လိုသူများအနေဖြင့် အသက် (၂၀)နှစ် မှ (၄၀)နှစ်အတွင်းဖြစ်ရန်လိုပြီး ဇာတ်လမ်းတိုများတွင် အသုံးပြုထားသည့် နောက်ခံတေးဂီတသီချင်းများသည် Copy Right ငြိစွန်းမှုမရှိစေရန် လိုကြောင်း သိရသည်။

ထို့ပြင် ရုပ်/သံ အရည်အသွေးအနေဖြင့် Full HD; H-264 MP4,Stero 2CH ဖြစ်ရမည်ဖြစ်ပြီး တင်သွင်းထား သော ဇာတ်လမ်းတိုများကို ပြန်လည်ရုပ်သိမ်းခွင့်မရှိကြောင်း သိရသည်။

အဆိုပါ ပြိုင်ပွဲတွင် (၅) မိနစ်အောက် ဇာတ်လမ်းတိုရုပ်ရှင်အတွက်  Jury Award ဆု၊ Audience Award ဆုနှင့် Chairman’s Choice ဆုတို့ကို ချီးမြှင့်သွားမည်ဖြစ်ပြီး (၅) မိနစ်မှ (၂၅ )မိနစ်အတွင်း ဇာတ်လမ်းတိုရုပ်ရှင်ပြိုင်ပွဲအတွက်  Jury Award ပထမ၊ ဒုတိယ၊ တတိယဆု၊ Audience Award ဆုနှင့် Chairman’s Choice ဆုတို့ကို ချီးမြှင့်သွားမည်ဖြစ်ကြောင်း သိရသည်။

“ဆန်ခါတင်ဘယ်နှစ်ကားထွက်လာမလဲတော့ မသိသေးဘူး။ အဲဒီဆန်ခါတင်ကားတွေကို ဂုဏ်ပြု လက်မှတ်တွေပေးမယ်။ နောက်ပြီး အဲဒီကားတွေကို နိုင်ငံတကာရုပ်ရှင်ပွဲတော်တွေရှိရင် ချိတ်ဆက်ပြီး ပို့ပေးမယ်”ဟု ၎င်းကဆက်လက်ပြောသည်။

အဆိုပါ ဇာတ်လမ်းတိုပြိုင်ပွဲတွင် ဆုကြေးများကိုလည်း ထိုက်တန်စွာ ချီးမြှင့်သွားမည့်ဖြစ်ပြီး  Top Ten ဝင်သည့် ဇာတ်လမ်းတို (၁၀)ကားကို ဖန်တီးသူတို့အား အသိအမှတ်ပြုဂုဏ်ပြုလွှာများ ချီးမြှင့်သွားမည် ဖြစ်ကြောင်း သိရသည်။

ထို့ပြင် Top Ten ဝင်သည့် ဇာတ်လမ်းတိုများကို နိုင်ငံတကာရုပ်ရှင်ပွဲတော်များသို့ ပေးပို့ပြသသွားမည် ဖြစ်ကြောင်း သိရသည်။

ပြိုင်ပွဲဝင်မည့်သူများအနေဖြင့် မြန်မာနိုင်ငံရုပ်ရှင်အစည်းအရုံး၊ နိုင်ငံတကာဆက်ဆံရေးကော်မတီတွင် လျှောက်လွှာကိုရယူ၍ လာမည့် ဒီဇင်ဘာလ (၂၅) ရက် နောက်ဆုံးထား၍ မြန်မာနိုင်ငံရုပ်ရှင်အစည်းအရုံး သို့ ပေးပို့ရမည်ဖြစ်ကြောင်း သိရသည်။