Pika (NSS) - အောက်တိုဘာ ၁ဝ 

အာဖဂန်နစ္စတန်နိုင်ငံတွင် အောက်တိုဘာလ(၇)ရက်က လှုပ်ခတ်ခဲ့သော ပြင်းအား(၆ ဒသမ ၃) မဂ္ဂနီကျုအဆင့်ရှိ ငလျင်ကြောင့် သေဆုံးသူဦးရေမှာ (၂၄၄၅)ဦးထိ မြင့်တက်လာခဲ့ပြီး အခြားလူ(၉၂ဝဝ)ကျော် ထိခိုက်ဒဏ်ရာရရှိခဲ့ ကြောင်း ဆင်ဟွာသတင်းဌာနက ဖော်ပြခဲ့သည်။

အဆိုပါငလျင်လှုပ်ခတ်မှုကြောင့် Herat ပြည်နယ် Zanda Jan ခရိုင်ရှိ ရွာပေါင်း(၁၃)ရွာမှာ လုံးဝပြိုကျပျက်စီးသွား ခဲ့ပြီး အပျက်အစီးများအောက်တွင် လူအများအပြားပိတ်မိနေဆဲဖြစ်ကြောင်း သိရသည်။ အာဖဂန်နစ္စတန်နိုင်ငံ ပြည်နယ်အာဏာပိုင်များသည် ထိခိုက်ဒဏ်ရာရရှိသူများနှင့် ပိတ်မိနေသူများကို ကူညီကယ်ဆယ်ရန်အတွက် ကယ်ဆယ်ရေးအဖွဲ့ တစ်ဒါဇင်ခန့်ကို ဖြန့်ကျက်ချထားခဲ့ကြောင်း သတင်းများတွင် ဖော်ပြထားသည်။

သို့သော်လည်း စက်ပစ္စည်းကိရိယာများ နည်းပါးခြင်းကြောင့် ဒေသခံပြည်သူများနှင့် ရှာဖွေကယ်ဆယ်ရေးသမား များသည် သေဆုံးသူများ (သို့မဟုတ်) အသက်ရှင်ကျန်ရစ်သူများကို ရှာဖွေရန်အတွက် လက်ဖြင့်သာ တူးခဲ့ရမှုများ လည်း ရှိခဲ့ကြောင်း သိရသည်။

Save the Children အဖွဲ့အစည်း၏ အာဖဂန်နစ္စတန်ဒါရိုက်တာ Arshad Malik က "ဒီဖြစ်ရပ်ဆိုးကြောင့် သက်ရောက်မှုဒဏ်ခံခဲ့ရတဲ့လူအရေအတွက်က တကယ်ကိုများပြားပါတယ်။ Herat ပြည်နယ်မှာ လူအများအပြား ဟာ အပျက်အစီးတွေအောက်မှာ ပိတ်မိနေဆဲဖြစ်ပြီး သေဆုံးသူအရေအတွက်က ထပ်တိုးလာနိုင်ပါတယ်။ နိုင်ငံတကာအသိုင်းအဝိုင်းကိုလည်း ရန်ပုံငွေတွေ ကူညီပေးဖို့ တောင်းခံထားပါတယ်။ အစားအသောက်တွေ၊ ဆေးဝါးတွေနဲ့ တဲအိမ်လေးတွေ ရရှိဖို့ မျှော်လင့်ထားပါတယ်" ဟု ပြောခဲ့သည်။

အီရန်၏ လခြမ်းနီကြက်ခြေနီအသင်းသည် ရှာဖွေကယ်ဆယ်ရေးအဖွဲ့(၁ဝ)ဖွဲ့ နှင့် လူသားချင်းစာနာထောက်ထားမှု ဆိုင်ရာအကူအညီများကို အာဖဂန်နစ္စတန်နိုင်ငံသို့ ပေးပို့ခဲ့ကြောင်းလည်း သိရသည်။ ထို့အပြင် ပါကစ္စတန် နှင့် တရုတ်အစိုးရတို့သည် အရေးပေါ်လိုအပ်ချက်များကို အကဲဖြတ်နိုင်ရန်အတွက် အာဖဂန်နစ္စတန်အာဏာပိုင်များကို ဆက်သွယ်ခဲ့ကြောင်းလည်း သိရသည်။ 

အာဖဂန်နစ္စတန်နိုင်ငံတွင် ပြန်လည်ထူထောင်ရေးလုပ်ငန်းများ လုပ်ဆောင်ရန်အတွက် လိုအပ်သောအကူအညီများ အားလုံးကို အပြည့်အဝကူညီပေးရန် အဆင်သင့်ရှိကြောင်း ကာတာနိုင်ငံခြားရေးဝန်ကြီးဌာနကလည်း ထုတ်ပြန် ပြောခဲ့သည်။