မျိုးကြီး (NSS) - အောက်တိုဘာ ၇

ပြည်ပရောက် မြန်မာနိုင်ငံများ ရရှိသည့်လစာဝင်ငွေအပေါ် ဝင်ငွေခွန်ပေးဆောင်ခြင်းနှင့်ပတ်သက်၍ သိရှိရမည့်အချက်များကို ပြည်တွင်းအခွန်များဦးစီးဌာနက အသိပေးထုတ်ပြန်လိုက်သည်။

မြန်မာနိုင်ငံ၏ ပြင်ပတွင် အလုပ်လုပ်ကိုင်နေကြသော မြန်မာနိုင်ငံသားများအနေဖြင့် ၂၀၂၃ ခုနှစ် ပြည်ထောင်စု၏အခွန်အကောက်ဥပဒေကို ပြင်ဆင်သည့်ဥပဒေအရ ဝင်ငွေခွန်ထမ်းဆောင်ရမည်ဖြစ်ကြောင်း သိရသည်။

ပြည်ပရောက် နိုင်ငံသားများအနေဖြင့် နိုင်ငံခြားငွေဖြင့် ရရှိသည့်လစာအပေါ် ဝင်ငွေခွန်ဥပဒေအရ ခွင့်ပြုထားသည့်သက်သာခွင့်များအား နုတ်ပယ်ပြီး ဝင်ငွေအလွှာအလိုက် အခွန်နှုန်ထားဖြင့် တွက်ချက်ခြင်းနည်းလမ်း၊ ဝင်ငွေခွန်ဥပဒေအရ ခွင့်ပြုထားသည့်သက်သာခွင့်များအား နုတ်ပယ်ခြင်းမပြုဘဲ အခွန်နှုန်း (၂)ရာခိုင်နှုန်းဖြင့် တွက်ချက်ခြင်းနည်းလမ်း (၂)ရပ်အနက်မှ နည်းရာအခွန်ပမာဏဖြင့် ပေးဆောင်နိုင်ကြောင်း သိရသည်။

ပေးဆောင်ရမည့် လစာဝင်ငွေခွန်ပမာဏကို သိရှိနိုင်ရန်အတွက် https://www.ird.gov.mm ၏ Home Page ရှိ လစာဝင် ငွေခွန်တွက်ချက်ရန်(ပြည်ပနေနိုင်ငံသား) Menu link မှတစ်ဆင့် ဝင်ရောက်တွက်ချက်ကြည့်နိုင်ကြောင်း ပြည်တွင်းအခွန်များဦးစီးဌာနက အသိပေးထားသည်။

ထို့ပြင် လစာဝင်ငွေခွန်ဆောင်နိုင်ရန် စနစ်အတွင်းသို့ အချက်အလက်များထည့်သွင်းခြင်းကို သက်ဆိုင်ရာသံရုံးဝန်ထမ်းများ (သို့မဟုတ်) သက်ဆိုင်ရာအခွန်ရုံးဝန်ထမ်းများက ဆောင်ရွက်ပေးမည်ဖြစ်ကြောင်း သိရသည်။

ယင်းကဲ့သို့ စနစ်အတွင်းသို့ ထည့်သွင်းရန်လိုအပ်သည့်အချက်အလက်များသည် လစာဝင်ငွေခွန်ပေးဆောင်သူ၏ အမည်၊ နိုင်ငံကူးလက်မှတ်အမှတ်၊ နိုင်ငံသားစိစစ်ရေးကတ်အမှတ်၊ OWIC အမှတ်(သို့မဟုတ်) CDC/SIRB အမှတ်၊ နေရပ်လိပ်စာ စသည်တို့ဖြစ်ကြောင်း သိရသည်။

ပြည်ပရောက် မြန်မာနိုင်ငံသားများအနေဖြင့် လစာဝင်ငွေခွန်ကို ရရှိသည့်နိုင်ငံခြားငွေအမျိုးအစားဖြင့်သာ ပေးဆောင်ရမည်ဖြစ်ပြီး သာမန်အားဖြင့် သက်ဆိုင်ရာနိုင်ငံရှိ မြန်မာသံရုံးတွင် နိုင်ငံကူးလက်မှတ်သက်တမ်းတိုးချိန်၌ ပေးဆောင်ရမည်ဖြစ်ကြောင်း ပြည်တွင်းအခွန်များဦးစီးဌာနက အသိပေးထားသည်။

သို့သော် အခွန်ဝန်ထုပ်ဝန်ပိုးမဖြစ်စေလိုသူများအနေဖြင့် လစဉ်(သို့မဟုတ်) သုံးလတစ်ကြိမ် (သို့မဟုတ်) နှစ်စဉ် သက်ဆိုင်ရာသံရုံးတွင် ပေးဆောင်လိုပါကလည်း ပေးဆောင်နိုင်ကြောင်း သိရသည်။

ထိုသို့အခွန်ပေးဆောင်ပြီးပါက သက်ဆိုင်ရာသံရုံးမှ QR Code ပါဝင်သည့် အီလက်ထရောနစ်ငွေရပြေစာနှင့် ပြည်ပနေနိုင်ငံသား၏ လစာဝင်ငွေခွန်ပေးသွင်းခြင်းဆိုင်ရာ အထောက်အထားလက်မှတ်တို့ကို ပြန်လည်ထုတ်ပေးသွားမည်ဖြစ်ကြောင်း သိရသည်။

ယခင်က ပြည်ပရောက် မြန်မာနိုင်ငံသားများ၏ နိုင်ငံခြားငွေဖြင့် ရရှိသည့်လစာဝင်ငွေအပေါ် ဝင်ငွေခွန်ကင်းလွတ်ခွင့်ပြုခဲ့ခြင်းအား နစကအစိုးရက ယခု ၂၀၂၃ ခုနှစ် အောက်တိုဘာလ ၁ ရက်မှစ၍ ပြန်လည်ပယ်ဖျက်ခဲ့ခြင်းဖြစ်သည်။