စော(NSS) - အောက်တိုဘာ ၃

ကမ္ဘာပေါ်တွင် မကူးစက်နိုင်သော ရောဂါများတွင် ကင်ဆာရောဂါသည် အဖြစ်အများဆုံး ရောဂါတစ်ခုဖြစ်လာပြီး မြန်မာနိုင်ငံ၌လည်း ကင်ဆာလူနာများအတွက် ဓာတ်ရောင်ခြည်ကုသမှု လိုအပ်ချက်သည် များပြားလာကြောင်း ဒုတိယဗိုလ်ချုပ်မှူးကြီးစိုးဝင်းက ပြောသည်။

နစကဒုဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်းက ယမန်နေ့(အောက်တိုဘာလ ၂ရက်)တွင် မန္တလေးတိုင်း၊ ပြင်ဦးလွင်မြို့နယ်ရှိ အမှတ် (၁)၊ တပ်မတော်ဆေးရုံ (ခုတင် ၇၀၀)၌ ပြုလုပ်သော ဓာတ်ရောင်ခြည်နှင့် ကင်ဆာရောဂါကုသဆောင်ဖွင့်ပွဲအခမ်းအနားတွင် အထက်ပါကဲ့သို့ထည့်သွင်း ပြောကြားခဲ့ခြင်းဖြစ်သည်။

ကမ္ဘာပေါ်တွင် ကူးစက်နိုင်သော ရောဂါများနှင့် မကူးစက်နိုင်သောရောဂါများ ဖြစ်ပွားလျက်ရှိရာ မကူးစက်နိုင်သောရောဂါများတွင် ကင်ဆာရောဂါသည် အဖြစ်အများဆုံး ရောဂါတစ်ခုဖြစ်ပြီး ကင်ဆာရောဂါလူနာများ၏ ၆ဝ ရာခိုင်နှုန်းခန့်သည် ဓာတ်ရောင်ခြည်ဖြင့် ကုသမှုခံယူနိုင်ရန် လိုအပ်ကြောင်း ၎င်းကပြောသည်။

အလားတူ မြန်မာနိုင်ငံတွင်လည်း ကင်ဆာလူနာများအတွက် ဓာတ်ရောင်ခြည်ကုသမှု လိုအပ်ချက်သည် တစ်စတစ်စမြင့်တက်လာသည်ဟုလည်း ဒုတိယဗိုလ်ချုပ်မှူးကြီး စိုးဝင်းက ထည့်သွင်းပြောကြားခဲ့သည်။

ထို့ကြောင့် Linear Accelerator (LA)ဟုခေါ်သည့် ဓာတ်ရောင်ခြည်ဖြင့် ကင်ဆာရောဂါကုသစက်ကြီးများ နှင့် ခေတ်မီကုသရေးအဆောက်အအုံများကို တပ်မတော်ဆေးရုံများတွင် တိုးချဲ့ဆောက်လုပ်တပ်ဆင်ပေးခဲ့ကြောင်း သိရသည်။

ထို့သို့ တပ်ဆင်ပေးခဲ့ရာမှ ယခင်က ရန်ကုန်မြို့ရှိ အမှတ် (၂)တပ်မတော်ဆေးရုံ (ခုတင် ၅၀၀)နှင့် အောင်ပန်းမြို့ရှိ အမှတ်(၂)တပ်မတော်ဆေးရုံ (ခုတင် ၇၀၀)တို့တွင်သာ ကုသလျက်ရှိရာ လက်ရှိတွင် ပြင်ဦးလွင်မြို့ရှိ အမှတ်(၁)တပ်မတော်ဆေးရုံ (ခုတင် ၇၀၀)၌ပင် ဓာတ်ရောင်ခြည်ဖြင့် ကင်ဆာရောဂါကုသစက်ကြီးများကို တပ်ဆင်ပေးလျက်ရှိကြောင်း သိရသည်။

အဆိုပါ စက်သစ်ကြီးများရှိလာသည့်အတွက် မြန်မာနိုင်ငံအထက်ပိုင်းတွင် နေထိုင်သည့်  တပ်မတော်သားများ၊ မိသားစုဝင်များနှင့် ပြည်သူများအတွက် အားကိုးအားထားပြုရမည့်ကင်ဆာကုသပေးရာဌာနတစ်ခုဖြစ်လာမည်ဖြစ်ကြောင်း သိရသည်။

ထို့ပြင် နေပြည်တော်ရှိ အမှတ်(၂)တပ်မတော်ဆေးရုံကြီး (ခုတင် ၁၀၀၀)တွင်လည်း Cyberknife ဟုခေါ်သည့် အဆင့်မြင့်ဓာတ်ရောင်ခြည်ကုသစက်တစ်လုံးရှိနေကြောင်း သိရသည်။

ယခုအချိန်တွင် တပ်မတော်ဆေးရုံကြီးလေးရုံ၌ ကင်ဆာရောဂါဝေသနာရှင်များကို ခွဲစိတ်ခြင်း၊ ဓာတ်ရောင်ခြည်ဖြင့်ကုသခြင်း၊ ကင်ဆာဆေးဖြင့် ကုသခြင်းအစရှိသည့် ကင်ဆာကုသမှုများကို ပြုလုပ်ပေးနိုင်တော့မည်ဖြစ်ကြောင်း သိရသည်။

ထို့ပြင် ကင်ဆာရောဂါကုသရေးလုပ်ငန်းသည် သုတေသနလုပ်ငန်းနှင့်ယှဉ်တွဲလုပ်ဆောင်ရမည်ဖြစ်သည့်အတွက် တပ်မတော်ဆေးရုံကြီး လေးရုံမှ ကင်ဆာသုတေသန အချက်အလက်များကို အမြဲလေ့လာသုံးသပ်နေရန် လိုအပ်ကြောင်း ဒုဗိုလ်ချုပ်မှူးကြီး စိုးဝင်းက တိုက်တွန်းပြောကြားခဲ့သည်။