မြူနစ် (NSS) - အောက်တိုဘာ ၁

NUG အား ကတိသစ္စာပြုပြီး ရောင်နီပျောက်ကျား PDF အဖွဲ့က ထွေအုပ်ဒုဦးစီးမှူးအပါ အဝင် လူ(၇)ဦးကို လည်လှီးသတ်ဖြတ်သော ရုပ်သံဖိုင်တစ်ခု လူမှုကွန်ယက်စာမျက်နှာများတွင် ပျံ့နှံ့လျက်ရှိသည်။

လက်နက်နှင့် ဓားများကိုင်ဆောင်ထားသည့် အင်အား(၃၀)ဝန်းကျင်ခန့်ရှိသော ရောင်နီပျောက်ကျား PDF အဖွဲ့သည် တောတွင်းတစ်နေရာရှိ မြေတူးထားသောတွင်းအနီး၌ ထွေအုပ်ဒုဦးစီးမှူးအပါအဝင် (၇)ဦးကို စစ်ဆေးမေးမြန်းမှုများ ပြုလုပ်ခဲ့ကြောင်း တွေ့ရှိရသည်။

ရောင်နီပျောက်ကျား PDF အဖွဲ့မှ ခေါင်းဆောင်ဟုယူဆရသူတစ်ဦးသည် အထက်ပါလူ(၇)ဦးအား ဒလန်၊ ကိုယ်ပိုင်နံပါတ်၊ ရာထူးစသည်တို့ကို စစ်ဆေးမေးမြန်းမှုများ ပြုလုပ်ခဲ့ကြောင်း တွေ့ရှိရသည်။

ထိုသို့ စစ်ဆေးမေးမြန်းခံရသူ(၇)ဦးထဲ၌ အထွေထွေအုပ်ချုပ်ရေးဦးစီးဌာနမှ ဒုတိယဦးစီးမှူး တစ်ဦးပါဝင်သည်ကို တွေ့ရှိရပြီး လုံခြုံရေးအဖွဲ့ဝင်များနှင့် ဒလန်ဟုစွပ်စွဲခံရသူ အရပ်သားတစ်ဦးလည်း ပါဝင်သည်ကို တွေ့ရှိရသည်။

ထို့နောက် PDF အဖွဲ့ဝင်များသည် ထွေအုပ်ဒုဦးစီးမှူးအပါအဝင် လူ(၇)ဦး၏ လည်ပင်းအား ဓားဖြင့်လှီးကာ “မြေပြန့်ဒေသက ကျဆုံးသွားတဲ့ PDF ရဲဘော်များရဲ့ သွေးကြွေးကလဲ့စား” ဟု (၃)ကြိမ်ကြွေးကြော်၍ သတ်ဖြတ်ခဲ့သည်ကို ရုပ်သံဖိုင်၌ တွေ့ရသည်။

ထို့ပြင် ဓားဖြင့်လည်လှီးသတ်ဖြတ်ခဲ့သော ရုပ်အလောင်း(၇)လောင်းကို တွင်းထဲသို့ ကန်ချပြီးနောက် နစက၏စစ်သားများကို ရောင်နီပျောက်ကျားတော်လှန်ရေးအဖွဲ့(PDF)မှ အမြစ်ပါမကျန်ရှင်းလင်းသွားမည်ဟု ပြည်သူလူထုနှင့် NUG အဖွဲ့အား လက်နက်ကိုင်၍ ကတိသစ္စာပြုပါသည်ဟု ပြောဆိုကြွေးကြော်ခဲ့သည်ကို တွေ့ရသည်။

အဆိုပါသတ်ဖြတ်မှုဖြစ်စဉ်သည် စစ်ကိုင်းတိုင်းအတွင်း ဖြစ်ပွားခဲ့ကြောင်း ကြားသိရသော် လည်း မည်သည့်မြို့နယ်၊ မည်သည့်နေရာ၊ မည်သည့်အချိန်နှင့် နေ့ရက်တို့တွင် ဖြစ်ပွားခဲ့သည်ကို ဆက်လက်ဖော်ပြပေးနိုင်ရန်အတွက် NSS အနေဖြင့် ဆက်လက်စုံစမ်းလျက်ရှိသည်။

အဆိုပါရောင်နီပျောက်ကျား PDF အဖွဲ့သည် စစ်ကိုင်းတိုင်းအတွင်းရှိ ရွှေဘိုမြို့နယ်၊ ခင်ဦးမြို့နယ် နှင့် ဝက်လက်မြို့နယ်တို့အတွင်း လှုပ်ရှားဆောင်ရွက်မှုများရှိကြောင်း ကြားသိရသည်။

အထက်ပါ ထွေအုပ်ဒုဦးစီးမှူးအပါအဝင် လူ(၇)ဦး သတ်ဖြတ်ခံရမှုနှင့်ပတ်သက်၍ နစကဘက်က လက်ရှိအချိန်ထိ တစ်စုံတစ်ရာထုတ်ပြန်ပြောဆိုခြင်း မရှိသေးပေ။

၂၀၂၁ ခုနှစ် ဖေဖော်ဝါရီလမှစ၍ နိုင်ငံတော်အာဏာကို တပ်မတော်က ရယူခဲ့ပြီးနောက်ပိုင်းတွင် နိုင်ငံအတွင်း၌ အကြမ်းဖက်သတ်ဖြတ်မှုဖြစ်စဉ်များဖြစ်ပွားလျက်ရှိပြီး လူပေါင်း(၆၀၀၀)ကျော် သတ်ဖြတ်ခံခဲ့ရသည်။

၎င်းကဲ့သို့ အကြမ်းဖက်သတ်ဖြတ်မှုဖြစ်စဉ်များအနက် စစ်ကိုင်းတိုင်းသည် အခြားသော တိုင်း၊ ပြည်နယ်များနှင့်နှိုင်းယှဉ်ပါက အကြမ်းဖက်သတ်ဖြတ်မှု အများဆုံးဖြစ်ပွားခဲ့သော တိုင်းတစ်တိုင်းလည်း ဖြစ်သည်။