ယွန်း (NP News) - ဖေ‌ဖော်ဝါရီ ၂၁

နယ်ချဲ့အင်္ဂလိပ်တို့အား တော်လှန်သည့် ဇာတ်ကားများစွာကို ရိုက်ကူးခဲ့သော ထပ်ဆင့်အကယ်ဒမီသီဟတင်စိုး ကွယ်လွန်သွားပြီဖြစ်ကြောင်း သတင်းရရှိသည်။

သီဟတင်စိုးသည် ယနေ့(ဖေဖော်ဝါရီလ ၂၁ ရက်)တွင် နှလုံးရောဂါဖြင့် ကွယ်လွန်သွားခဲ့ခြင်းဖြစ်ကြောင်း သိရသည်။

၎င်းသည် ယနေ့နံနက်ပိုင်းတွင် နှလုံးရောဂါဖောက်ကာ သင်္ကန်းကျွန်းစံပြဆေးရုံသို့ ပို့ဆောင်စဉ်လမ်း၌ ကွယ်လွန်သွားခြင်းဖြစ်ကြောင်း သိရသည်။

“ထပ်ဆင့်အကယ်ဒမီ ကိုသီဟတင်စိုး နှလုံးရောဂါနဲ့ ယနေ့ကွယ်လွန်သွားကြောင်း သိရလို့ ကျန်ရစ်သူမိသားစုဝင်တွေနဲ့အတူ အထူးဝမ်းနည်းစိတ်မကောင်း ဖြစ်ရပါတယ်။ သွားနှင့်တော့ ကိုသီဟရေ။ အကိုနဲ့ ချိန်းထားတာတောင် မတွေ့ဆုံရတော့ဖူးပေါ့။ ကောင်းရာသုဂတိလားပါစေ။ ပြုမိသမျှ ကုသိုလ် အမျှဝေလိုက်ပါတယ်။ သာဓုခေါ်ပါ အစ်ကို” ဟု ဝေဠုကျော်ကလည်း အသိပေးပြောဆိုထားသည်။

အကယ်ဒမီသီဟတင်စိုးသည် တော်လှန်ရေးဇာတ်ကားအများအပြားနှင့် ရုပ်ရှင်ဇာတ်ကားကြီးများကို ရိုက်ကူးထားခဲ့ပြီး အကယ်ဒမီများလည်း ရရှိခဲ့သူဖြစ်သည်။

သီဟတင်စိုး ပါဝင်သရုပ်ဆောင်ထားသည့် ငရဲသား၊ အနိုင်မခံ အရှုံးမပေး၊ တိုက်ပွဲခေါ်သံ စသည့် ရုပ်ရှင်ဇာတ်ကားများသည် လူသိများ ကျော်ကြားခဲ့သည်။

သရုပ်ဆောင်သီဟတင်စိုးသည် ၂ဝဝဝ ပြည့်နှစ်တွင် ကျင်းပသည့် (၄၉)ကြိမ်မြောက် မြန်မာ့ရုပ်ရှင်ဆုပေးပွဲ၌ ငရဲသားရုပ်ရှင် ဇာတ်ကားဖြင့် အမျိုးသားဇာတ်ဆောင်ဆုနှင့် ဒါရိုက်တာဆုတို့ကို ရယူနိုင်ခဲ့သူတစ်ဦးလည်း ဖြစ်ကြောင်း သိရသည်။

၎င်း၏ ဇနီးဖြစ်သူ အကယ်ဒမီ ဇင်မာဦးသည်လည်း ပြီးခဲ့သည့် ၂ဝ၂၁ ခုနှစ် မတ်လ(၁၁)ရက်တွင် နှလုံး ရောဂါဖြင့် ကွယ်လွန်ထားသည်။