မျိုးကြီး (NSS) - စက်တင်ဘာ ၂၇

ပုဂ္ဂလိကဆေးရုံအချို့သည် ဆေးကုသမှုခံယူသော လူနာများထံမှ ဝင်ငွေခွန်(၂)ရာခိုင်နှုန်းကို ထပ်ဆောင်းကောက်ခံသည့် နည်းလမ်းအမှားကို လုပ်ဆောင်နေကြောင်း ပြည်တွင်းအခွန်များဦးစီးဌာနက အသိပေးထားသည်။

ပုဂ္ဂလိကဆေးရုံများတွင် ကျန်းမာရေးစောင့်ရှောက်မှုပေးနေသည့် ဆရာဝန်များအနေဖြင့် ယခု ၂၀၂၃ ခုနှစ် စက်တင်ဘာလ ၁ ရက်မှစတင်ကာ ဝင်ငွေခွန် (၂)ရာခိုင်နှုန်းထမ်းဆောင်ရမည်ဟု စီမံကိန်းနှင့်ဘဏ္ဍာရေးဝန်ကြီးဌာန၊ ပြည်တွင်းအခွန်များဦးစီးဌာနက ပြီးခဲ့သောလအတွင်း အမိန့်ကြော်ငြာစာထုတ်ပြန်ခဲ့သည်။

သို့သော် အချို့သောပုဂ္ဂလိကကျန်းမာရေးလုပ်ငန်းများမှ ငွေထုတ်ပေးရန်တာဝန်ရှိသူများအနေဖြင့် ဆရာဝန်ထံပေးချေမည့် ပေးချေငွေအပေါ် ဝင်ငွေခွန်(၂)ရာခိုင်နှုန်း နုတ်ယူရမည့်အစား ဆေးကုသမှုခံယူသူ(လူနာ)ထံမှ ဝင်ငွေခွန်(၂)ရာခိုင်နှုန်း ထပ်ဆောင်းကောက်ခံသည့်နည်းလမ်းအမှားကို ဆောင်ရွက်နေကြောင်းသိရှိရသည်ဟု ဦးစီးဌာနက ပြောသည်။

“(၂) ရာခိုင်နှုန်းက အရမ်းကြီးများတဲ့ ပမာဏမဟုတ်ပါဘူး။ ဒါပေမယ့် အပြင်ဆေးခန်းတွေက အလုပ်ရှုပ်တယ်ထင်ပြီးတော့ လူနာဆီကပဲ ပေါင်းကောက်တာ ဖြစ်နိုင်သလို တစ်ချို့ဆရာဝန်တွေကလည်း စားသောက်ဆိုင်မှာထိုင်တဲ့အခွန်လိုမျိုး နဲ့ မှားပြီးတော့ သုံးစွဲသူဆီကပဲ ယူရမယ်လို့ ထင်တာလည်းဖြစ်နိုင်ပါတယ်။ အဓိကတော့ အခွန်ဆိုင်ရာအသိ နည်းနေတယ်လို့ မြင်တယ်။ အခုလိုကြေညာလိုက်တဲ့နောက်ပိုင်းမှာ ဆရာဝန်တွေကပဲ ပေးမယ်လို့ ယုံကြည်ပါတယ်” ဟု အထူးကု ဆရာဝန်ဒေါက်တာပြည့်ထူး (ကာကွယ်ရေးနှင့်အပူပိုင်းဆေးပညာ)က NSS ကို မှတ်ချက်ပြုပြောကြားသည်။ 

ထို့ကြောင့် ငွေထုတ်ပေးရန်တာဝန်ရှိသူများအနေဖြင့် ဆေးကုသမှုခံယူသူများထံမှ ဝင်ငွေခွန် (၂)ရာခိုင် နှုန်း ထပ်ဆောင်းကောက်ခံခြင်းအား လုံးဝ(လုံးဝ) ဆောင်ရွက်ခြင်းမပြုလုပ်ရန် ပြည်တွင်းအခွန်များဦးစီးဌာနက အသိပေးထားသည်။

ထို့ပြင် ဆရာဝန်များ၏ အသက်မွေးဝမ်းကျောင်းပညာလုပ်ငန်းသည် ကုန်သွယ်လုပ်ငန်းခွန် မကျသင့်သည့် ဝန်ဆောင်မှုအမျိုးအစားဖြစ်သည့်အတွက် ဆေးကုသမှုခံယူသူများထံမှ ကုန်သွယ်လုပ်ငန်းခွန်ကောက်ခံပေးသွင်းရန် မလိုအပ်ကြောင်းလည်း ဆက်လက်အသိပေးထားသည်။

“ကျွန်တော် ထိုင်တဲ့ဆေးခန်းတွေမှာ ဒီလကစပြီးတော့ (၂)ရာခိုင်နှုန်း အခွန်ဖြတ်ခိုင်းထားတယ်။ ကျွန် တော်တို့ level နဲ့က စမ်းသပ်ခ ၇၀၀၀ ရတယ်။ အဲဒီရတဲ့အထဲကပဲ (၂)ရာခိုင်နှုန်းထား ဖြတ်ခိုင်းထားတယ်ပေါ့။ အမှန်က အဲဒီလိုပဲဖြစ်သင့်ပါတယ်။ လူနာတွေဆီကနေ ကောက်လို့မရဘူး။ ဒါက ကုန်သွယ်ခွန်မှမဟုတ်တာ။ ဒါက ပညာရပ်ပိုင်းဆိုင်ရာ ဝန်ဆောင်မှုဖြစ်တယ်။ ရထားတဲ့သူပဲ ဆောင်သင့်တယ်လို့ မြင်ပါတယ်” ဟု အထူးကုဆရာဝန်ဒေါက်တာပြည့်ထူးက ပြောသည်။

ပုဂ္ဂလိကဆေးရုံးများထူထောင်ထားသူများအနေဖြင့် မိမိတို့လုပ်ငန်းမှ ငွေထုတ်ပေးရန်တာဝန်ရှိသူများက အခွန်နုတ်ယူပေးသွင်းသည့်လုပ်ငန်းစဉ်များကို ဆောင်ရွက်ရာတွင် ပြဋ္ဌာန်းသတ်မှတ်ချက်များနှင့်အညီ ဆောင်ရွက်စေရေးကြီးကြပ်ပေးရန်လည်း ဦးစီးဌာနက တိုက်တွန်းထားသည်။

မြန်မာနိုင်ငံရှိ ပုဂ္ဂလိကကျန်းမာရေးနယ်ပယ်တွင် အထွေထွေရောဂါကုဆေးခန်း (၅၁၂၄)ခု၊ အထူးကုဆေးခန်း (၁၀၀၂)ခု နှင့် အထွေထွေရောဂါကုဆေးရုံ (၂၇၀)ရုံတိုကို ခွင့်ပြုပေးထားကြောင်း ကျန်းမာရေးဝန်ကြီးဌာန၏ အချက်အလက်များအရ သိရသည်။