Pika (NSS) - စက်တင်ဘာ ၁၆

တရုတ်ကုမ္ပဏီပိုင်ဆိုင်သော ကမ္ဘာကျော် လူမှုကွန်ရက်ဖြစ်တဲ့ TikTok သည် ၎င်း၏ ပလက်ဖောင်းပေါ်တွင် ကလေးသူငယ်များ၏ ကိုယ်ရေးကိုယ်တာ ဒေတာအချက်အလက်များကို ကာကွယ်ပေးရန် ပျက်ကွက်ခဲ့သည့်အတွက် အိုင်ယာလန်ဒေတာကာကွယ်ရေးကော်မရှင် (DPC)က ယူရို(၃၄၅)သန်း ဒဏ်ရိုက်ခဲ့ကြောင်းသိရသည်၊၊

ဥရောပသမဂ္ဂ၏ အထွေထွေဒေတာကာကွယ်ရေးစည်းမျဉ်း (GDPR) အရ TikTok သည် ကလေးသူငယ် အသုံးပြုသူများနှင့်ပတ်သက်သည့် ကိုယ်ရေးကိုယ်တာ အချက်အလက်များကို ဘေးကင်းအောင် မဆောင်ရွက်ပေးနိုင်ခဲ့ခြင်းအတွက် DPC က ယခုကဲ့သို့ ဒဏ်ငွေပေးဆောင်စေခိုင်းခဲ့ခြင်းဖြစ်ကြောင်းသိရသည်။

ထို့ပြင် TikTok သည် GDPR က ချမှတ်ထားသော စည်းမျဉ်း(၈)ချက်ကို ချိုးဖောက်ခဲ့ကြောင်း DPC ကပြောကြားခဲ့သည်။

TikTok က "DPC ရဲ့ ဒဏ်ငွေပေးဆောင်စေခိုင်းခြင်းကို လေးစားစွာနဲ့ပဲ ကန့်ကွက်ပါတယ်။DPC ရဲ့ဝေဖန်ပြောဆိုချက်တွေဟာ ပြီးခဲ့တဲ့သုံးနှစ်ကရှိခဲ့တဲ့  feature တွေ၊ setting ကို ရည်ညွှန်းပြောဆိုနေတာဖြစ်ပါတယ်။ DPC က စုံစမ်းစစ်ဆေးမှုတွေ မလုပ်ဆောင်ခင်မှာပဲ ကျွန်တော်တို့ဘက်က အဲဒီအချက်တွေနဲ့ပတ်သက်ပြီး အပြောင်းအလဲတွေကို ပြုလုပ်ခဲ့ပါတယ်၊၊ အသက်(၁၆)နှစ်အောက် အသုံးပြုသူတွေရဲ့ အကောင့်တွေကို ပုံသေသတ်မှတ်လိုက်တာမျိုးတွေစတဲ့ setting အပြောင်းအလဲတွေကို လုပ်ခဲ့ပါတယ်"ဟု ထုတ်ပြန်ထားသည်။

DPC က စုံစမ်းစစ်ဆေးမှုများ မလုပ်ဆောင်ခင် TikTok သည် လုံခြုံရေးဆိုင်ရာကိစ္စရပ်များကို ဖြေရှင်းပေးခဲ့ကြောင်း ဥရောပရှိ TikTok ၏ ကိုယ်ရေးကိုယ်တာဆိုင်ရာ အကြီးအကဲ Elaine Fox က ထုတ်ပြန်ပြောကြားခဲ့သည်။

၎င်းက "DPC ရဲ့ စုံစမ်းစစ်ဆေးမှုမတိုင်ခင်မှာပဲ TikTok ဟာအသက်(၁၃)နှစ်နဲ့ (၁၄)နှစ်အောက် အသုံးပြုသူတွေရဲ့ အကောင့်တွေကို သီးသန့်ပုံသေသတ်မှတ်လိုက်တာမျိုးတွေစတဲ့ setting တွေကိုလည်း ပြောင်းလဲခဲ့ပါတယ်"ဟု ပြောဆိုခဲ့သည်။