မြူနစ် (NSS) - စက်တင်ဘာ ၁၅

NCA စာချုပ်ကို KNU က ပျယ်ပြယ်ကြောင်း တရားဝင်ကြေညာခြင်းမရှိ၍ ငြိမ်းချမ်းရေးရရှိရန် NCA ကိုအခြေခံကာ ဆောင်ရွက်မည်ဟု KNU တပ်မဟာ (၇) ဘားအံခရိုင်ဥက္ကဋ္ဌက ပြောသည်။

KNU တပ်မဟာ (၇) ဘားအံခရိုင်ဥက္ကဋ္ဌ စောအောင်မော်ဧက စက်တင်ဘာ ၁၄ ရက်တွင် သက်ဆိုင်ရာတာဝန်ရှိသူများအားလုံးသို့ လိပ်မူကာ စာတစ်စောင်ထုတ်ပြန်ရာ၌ အထက်ပါကဲ့သို့ ထည့်သွင်းပြောခဲ့ခြင်းဖြစ်သည်။

NCA သဘောတူစာချုပ်ချုပ်ဆိုနိုင်ရေးနှင့် နိုင်ငံရေးပြဿနာကို နိုင်ငံရေးနည်းဖြင့် ဆွေးနွေးအဖြေရှာနိုင်ရေးသည် KNU က တစ်စိုက်မတ်မတ်တောင်းဆိုလာရာမှ ဖြစ်ပေါ်လာသော စာချုပ်တစ်ရပ်ဖြစ်သည်ဟု ဥက္ကဋ္ဌ စောအောင် မော်ဧက ဆိုသည်။

ထို့ပြင် NCA စာချုပ်အား ခိုင်ခိုင်မာမာဖြင့် သက်ဝင်ချုပ်ဆိုထားနိုင်ရေးအတွက် ပြည်တွင်းနှင့် နိုင်ငံတကာအသိ သက်သေများရှေ့၌ ချုပ်ဆိုခဲ့ခြင်းဖြစ်ကြောင်း ၎င်းက ဆက်လက်ပြောသည်။

နိုင်ငံရေးပြဿနာအား နှစ် (၇ဝ)ခန့် စစ်ပွဲအတွေ့အကြုံများကို အခြေခံကာ အဖြေရှာခဲ့ရာတွင် နိုင်ငံရေးပြဿနာကို နိုင်ငံရေးနည်းဖြင့် တွေ့ဆုံအဖြေရှာခြင်းသည် အကောင်းဆုံးပင်ဖြစ်ကြောင်း KNU တပ်မဟာ(၇)ဘားအံခရိုင်က ပြောသည်။

အလားတူ KNU ကွန်ကရက်၏ ပစ်ခတ်တိုက်ခိုက်မှုရပ်စဲရေးနှင့် ပြည်တွင်းငြိမ်းရေးအတွက် လမ်းစဉ်၊ လုပ်ငန်းစဉ် နှင့် ရှေ့လုပ်ငန်းစဉ်တွင်လည်း နိုင်ငံရေးပြဿနာကို နိုင်ငံရေးနည်းဖြင့် အဖြေရှာရန် အတိအလင်းဖော်ပြထားကြောင်း သိရသည်။

ထို့ကြောင့် တပ်မဟာ(၇)ဘားအံခရိုင်အနေဖြင့် NCA စာချုပ်ကို ကရင်အမျိုးသားအစည်းအရုံး (KNU)မှ တရားဝင် ပျက်ပြယ်ကြောင်း ထုတ်ပြန်ကြေညာခြင်းမရှိသည့်အပြင် နယ်မြေဒေသတည်ငြိမ်ရေး နှင့် ပြည်တွင်းငြိမ်းချမ်းရေး ရရှိရန်အတွက် NCA ကို အခြေခံကာ ဆောင်ရွက်သွားမည်ဟု ဥက္ကဋ္ဌစောအောင်မော်ဧက ပြောသည်။

တပ်မဟာ(၇)ဘားအံခရိုင်အနေဖြင့် NCA ကိုအခြေခံကာ ပြည်သူ့အကျိုးရှေ့ရှုပြီး နိုင်ငံရေးပြဿနာကို နိုင်ငံရေး နည်းဖြင့်သာ အဖြေရှာလာနိုင်ကြရေးအတွက် ဆောင်ရွက်သွားမည်ဖြစ်ကြောင်း အသိပေးအပ်သည်ဟု ဥက္ကဋ္ဌ စောအောင်မော်ဧ၏ စာတွင် ဖော်ပြထားသည်။

သို့သော် ပြီးခဲ့သော သြဂုတ်လ ၁ဝ ရက်တွင် ပြုလုပ်သည့် KNU ၏သတင်းစာရှင်းလင်းပွဲ၌ KNU အထွေထွေ အတွင်းရေးမှူး ပဒိုစောတာဒိုမှူးက NCA နှင့်ပတ်သက်၍ လိုက်နာစရာ အကြောင်းမရှိတော့ကြောင်း နှင့် NCA သည် ပျက်ပြယ်သွားပြီဖြစ်ကြောင်း ပြောဆိုခဲ့ဖူးသည်။

ယခင်အစိုးရများလက်ထက်၌ NCA စာချုပ်အား လက်မှတ်ရေးထိုးခဲ့သော တိုင်းရင်းသားလက်နက်ကိုင်အဖွဲ့ (၁ဝ) ဖွဲ့ရှိပြီး ၎င်းတို့မှာ KNU၊ PNLO၊ DKBA၊ ALP၊ LDU၊ RCSS၊ NMSP၊ ABSDF၊ CNF နှင့် KNU/KNLA-PC တို့ဖြစ်သည်။

လက်ရှိတွင် NCA ကို အခြေခံကာ နစကအစိုးရနှင့် ငြိမ်းချမ်းရေးတွေ့ဆုံဆွေးနွေးလျက်ရှိသည့် တိုင်းရင်းသား လက်နက်ကိုင်အဖွဲ့ (၇)ဖွဲ့ရှိပြီး ကျန်(၃)ဖွဲ့သော KNU၊ CNF နှင့် ABSDF တို့သည် NCA နှင့် သွေဖယ်ကာ တပ်မတော် နှင့် တိုက်ပွဲများ ဖြစ်ပွားလျက်ရှိသည်။

နစကအကြီးအကဲ ဗိုလ်ချုပ်မှူးကြီးမင်းအောင်လှိုင်သည်လည်း NCA သည် သမိုင်းဝင်စာချုပ်ဖြစ်ပြီး မည်သည့်အချိန်မှ ပျက်ပြယ်မှုမရှိဘဲ အမြဲတည်ရှိနေမည့်စာချုပ်ဖြစ်ကြောင်း ပြီးခဲ့သောရက်ပိုင်းအတွင်းက ပြောဆိုခဲ့ဖူးသည်။