ဂျန်ဇက် (NSS) - စက်တင်ဘာ ၉

တရုတ်အစိုးရဟာ iPhone အသုံးပြုခွင့်ပိတ်ပင်လိုက်ပြီးနောက် iPhone ထုတ်လုပ်တဲ့ ကမ္ဘာကျော် Apple ကုမ္ပဏီရဲ့ရှယ်ယာများ ထပ်မံကျဆင်းလျက်ရှိနေကြောင်းသိရပါတယ်။

Apple ကုမ္ပဏီရဲ့ရှယ်ယာများဟာ ဈေးကွက်အတွင်းမှာ အမေရိကန်ဒေါ်လာ ၂၀၀ ဘီလျံကျော်နီးပါးထိခိုက်ဆုံးရှုံးမှုဖြစ်နေခဲ့ကြောင်းသိရပါတယ်။ တရုတ်နိုင်ငံဟာ Apple ကုမ္ပဏီရဲ့တတိယမြောက်အကြီးမားဆုံးဈေးကွက်ဖြစ်ပြီး ပြီးခဲ့တဲ့နှစ်အတွင်း Apple ကုမ္ပဏီရရှိခဲ့တဲ့ ဝင်ငွေစုစုပေါင်းရဲ့ ၁၈ ရာခိုင်နှုန်းက တရုတ်နိုင်ငံကနေ ရရှိခဲ့တာဖြစ်ကြောင်းသိရပါတယ်။ တရုတ်အစိုးရက အစိုးရအဖွဲ့ဝန်ထမ်းများကို ရုံးများ ဒါမှမဟုတ် အလုပ်လုပ်ရာမှာ iPhone အသုံးပြုခြင်းမလုပ်ဖို့ ပြီးခဲ့တဲ့ရက်ပိုင်းမှာ ညွှန်ကြားချက်ထုတ်ပြန်ခဲ့ကြောင်းသိရပါတယ်။

တရုတ်အစိုးရရဲ့ အဆိုပါတားမြစ်ပိတ်ပင်မှုဟာ အစိုးရဝန်ထမ်းတွေအပြင် အစိုးရပိုင်ကုမ္ပဏီများ၊ အစိုးရကျောထောက်နောက်ခံပြုထားတဲ့ အေဂျင်စီအားလုံးအပေါ်မှာလည်း အကျုံးဝင်ကြောင်းသိရပါတယ်။ Apple ကုမ္ပဏီဟာ လာမယ့် စက်တင်ဘာလ ၁၂ ရက်မှာ iPhone15 ကို စတင်ထုတ်လုပ်ဖြန့်ချီခါနီးချိန်မှာ တရုတ်အစိုးရက ဝန်ထမ်းတွေကို iPhone အသုံးမပြုဖို့ ရုတ်တရက် ပိတ်ပင်လိုက်တာဖြစ်ပါတယ်။ တရုတ်နိုင်ငံပိုင်မီဒီယာတွေကလည်း အစိုးရပိုင်ကုမ္ပဏီများမှာအလုပ်လုပ်နေတဲ့ ဝန်ထမ်းတွေကို စက်တင်ဘာလကုန်ကစတင်ပြီး Apple ကထုတ်လုပ်တဲ့ ပစ္စည်းများအသုံးပြုခြင်းမလုပ်ဖို့ တားမြစ်ထားကြောင်း ဖော်ပြထားပါတယ်။ တရုတ်အစိုးရဟာ ဝန်ထမ်းတွေကို Apple ထုတ်ကုန်ပစ္စည်းများ အသုံးမပြုဖို့ တားမြစ်တာနဲ့ပတ်သက်ပြီး မှတ်ချက်ပြုပြောဆိုခြင်းမရှိခဲ့သလို Apple ဘက်ကလည်း မှတ်ချက်ပြုခြင်းမျိုးမရှိကြောင်းသိရပါတယ်။

Apple ကုမ္ပဏီရဲ့ရှယ်ယာတွေဟာ စက်တင်ဘာလ ၈ ရက်မှာ စတင်ကျဆင်းခဲ့ပြီး စက်တင်ဘာလ ၉ရက်မှာလည်းထပ်မံကျဆင်းလျက်ရှိနေကြောင်း သိရပါတယ်။ အမေရိကန်နိုင်ငံ ကယ်လီဖိုးနီးယားပြည်နယ်အခြေစိုက် Apple ကုမ္ပဏီဟာ ကမ္ဘာ့ရှယ်ယာဈေးကွက်မှာ တန်ဖိုးအကြီးမားဆုံး ကုမ္ပဏီဖြစ်ပြီး အမေရိကန်ဒေါ်လာ ၂ ဒသမ ၈ ထီလျံတန်ဖိုးရှိကြောင်း သိရပါတယ်။ Apple ကုမ္ပဏီရှယ်ယာကျဆင်းခြင်းအပြင် iPhone ထုတ်လုပ်ရာမှာအသုံးပြုတဲ့ ချက်စ်ပြားများထုတ်လုပ်တဲ့ Qualcomm က ရှယ်ယာတန်ဖိုး (၇)ရာခိုင်နှုန်း ၊ တောင်ကိုရီးယား ကုမ္ပဏီတစ်ခုဖြစ်တဲ့ SK Hynix ရဲ့ရှယ်ယာဈေးနှုန်းများလည်း (၄)ရာခိုင်နှုန်းကျဆင်းသွားခဲ့ကြာင်း သိရပါတယ်။ 

အမေရိကန် နဲ့ တရုတ်အစိုးရတို့ဟာ နည်းပညာသုံးပစ္စည်းများနဲ့ပတ်သက်ပြီး တင်းမာမှုတွေရှိနေခဲ့ပြီး အပြန်အလှန်ကန့်သတ်ပိတ်ပင်မှုများလုပ်ဆောင်နေကြောင်း သိရပါတယ်။ တရုတ်အစိုးရဟာ မကြာသေးမီလည်း semiconductor industry လုပ်ငန်းမှာအဓိကအသုံးပြုရတဲ့ ပစ္စည်းနှစ်မျိုးတင်ပို့ခြင်းကို ကန့်သတ်ခဲ့ဖူးကြောင်းသိရပါတယ်။ တရုတ်ဈေးကွက်အတွင်း Apple ကုမ္ပဏီနဲ့အဓိကပြိုင်ဘက်ဖြစ်တဲ့ Huawe ကုမ္ပဏီဟာ Mate 60 Pro အမျိုးအစား 5G smartphone အသစ်ကိုမကြာခင် ဈေးကွက်အတွင်း မိတ်ဆက်ခါနီးနေချိန်မှာ တရုတ်အစိုးရက နိုင်ငံအတွင်း Apple ကုမ္ပဏီ ထုတ်ပစ္စည်းများကို ကန့်သတ်လိုက်တာဖြစ်ပါတယ်။ Mate 60 Pro အမျိုးအစား စမတ်ဖုန်းမှာပါဝင်တဲ့ ပစ္စည်းများအားလုံးကို တရုတ်နိုင်ငံမှာထုတ်လုပ်ထားပြီး လှပမှုရှိတဲ့ ဖုန်းအမျိုးအစားဖြစ်ကြောင်းသိရပါတယ်။