ရဲပြည့် (NSS) - စက်တင်ဘာ ၇ 

ပြည်ပထွက်ကစားနေသည့် ကစားသမားများ စုံစုံလင်လင်ပြန်လည်ရောက်ရှိလာမှုနှင့်အတူ မြန်မာအသင်းကို ကမ္ဘာ့အဆင့်သတ်မှတ်ချက် ပြန်မြင့်လာအောင် ကြိုးစားသွားမည်ဖြစ်ကြောင်း အသင်းခေါင်ဆောင် မောင်မောင်လွင်က ပြောသည်။

မြန်မာလက်ရွေးစင် အသင်းခေါင်းဆောင် မောင်မောင်လွင်က မြန်မာအသင်းနှင့် နီပေါအသင်းတို့ ကစားမည့် ပွဲစဉ်မတိုင်မီ ယနေ့ (စက်တင်ဘာလ ၇ ရက်)တွင် ပြုလုပ်ခဲ့သည့် သတင်းစာရှင်းလင်းပွဲ၌ အထက်ပါကဲ့သို့ ပြောကြားခဲ့ခြင်းဖြစ်သည်။

"ကမ္ဘာ့အဆင့် ပြန်မြင့်လာအောင် ကျွန်တော်တို့ကြားထဲမှာ အခက်အခဲတွေ အများကြီး ရင်ဆိုင်ရတယ်။ ပွဲတိုင်းနီးပါးကို ရှုံးတဲ့အခါကြတော့ ကမ္ဘာ့အဆင့်သတ်မှတ်ချက်တွေကျလာတာပေါ့၊ အခုဆိုရင် ပြည်ပ ကစားသမားတွေလည်း စုံစုံလင်လင်ပြန်လည်ရောက်ရှိလာပြီ။ အနိုင်ရအောင်လည်းပြန်ပြီးတော့ ကြိုးစားမယ်။ ကမ္ဘာ့အဆင့်ပြန်ပြီးတက်လာအောင်လုပ်ပါမယ်"ဟု မြန်မာလက်ရွေးစင် အသင်းခေါင်းဆောင် မောင်မောင်လွင်ကပြောသည်။ 

အာဆီယံတွင်လည်း ထိုင်း၊ ဗီယက်နမ်၊ အင်ဒိုနီးရှားတို့ကို ကျော်တက်ရန်အတွက် အဓိကလိုအပ်ချက်များ ကို အသင်းခေါင်းဆောင် မောင်မောင်လွင်က ထောက်ပြပြောကြားခဲ့သည်။ 

" ကျွန်တော်တို့ ပြည်ပထွက်ကစားတဲ့ ကစားသမားတွေ အကုန်သိပါတယ်။ ဘယ်လောက်အထိကွာ တယ်ဆိုတာကိုပါ။ ထိုင်းမှာဆိုရင် လိဂ်(၁၊၂၊၃)ရှိတယ်။ သူထက်နိမ့်တဲ့အသင်းပွဲစဉ်တွေလည်းရှိတယ်။ အဲဒီမှာဆိုရင် အနိမ့်ဆုံးအသင်းလေးတွေကတောင် အိမ်ကွင်း၊ အဝေးကွင်းရှိပါတယ်။ ဘောလုံးသမားတွေဆိုရင် အဲဒီမှာမရှားဘူး။ ကျွန်တော်တို့ဆီမှာဆိုရင် ဘောလုံးသမားတွေရှားတယ်၊ သူတို့ဆီမှာမရှားဘူး။ သူတို့အဖွဲ့တစ်ခုချင်းစီကလည်း လူတွေကအများကြီးထွက်နေတာ၊ ပြီးတော့ သူတို့ရဲ့ ထောက်ပံ့ပေးတာ‌တွေ အများကြီးကွာတာပေါ့"ဟု ၎င်းကပြောသည်။

ဆက်လက်ပြီး အသင်းခေါင်းဆောင်မောင်မောင်လွင်က ထိုင်းတွင် အပျော်တမ်းကစားနေသည့် ကစားသမားတစ်ယောက်၏ လစာသည်  မြန်မာနေရှင်နယ်လိဂ်မှ ကစားသမားတစ်ယောက်၏ လစာထက် ပိုကြောင်းနှင့် အခြားနိုင်ငံများက ဘောလုံးသမားတစ်ယောက်အပေါ် ထောက်ပံ့ပေးခြင်းသည် မြန်မာနှင့် ကွာဟသည့်အတွက် မြန်မာအသင်းသည် အာဆီယံတွင် နိမ့်ကျနေခြင်းဖြစ်ကြောင်း ပြောသည်။

"မြန်မာအသင်းရဲ့ လက်ရှိဖီဖာကမ္ဘာ့အဆင့် ၁၆ဝ က အသင်းရဲ့  အဆင့်အစစ်အမှန် မဟုတ်ပါဘူး။ ဒါပေမယ့်လည်း ဒါကအမှန်တရားဖြစ်နေတယ်။ မြန်မာအသင်းဟာ ပြီးခဲ့တဲ့ (၃)နှစ်အတွင်းမှာ (၂)ပွဲပဲနိုင်ခဲ့တာကိုတွေ့ရတယ်။ အဲဒီတော့ မြန်မာအသင်းအနေနဲ့ နိုင်ပွဲရလိုတဲ့ စိတ်ဓာတ်တွေ ပြန်ရဖို့လိုတယ်။ ပြီးတော့ အသင်းတိုးတက်လာဖို့ အသင်းရဲ့ ဝါရင့် ကစားသမားတွေနဲ့ လူငယ်ခြေတက်ကစားသမားတွေနဲ့ပေါင်းစပ်ပြီးတော့ ကစားစေပြီး နိုင်ပွဲ‌တွေပြန်ရခဲ့ရင် နိုင်လိုစိတ်တွေ ပြန်လည်ရရှိမှာပါ။ ကျွန်တော်ကိုင်တွယ်တဲ့ ခြောက်လအတွင်းမှာ မြန်မာအသင်းဟာ တိုးတက်လာပြီးတော့ ပိုကောင်းအောင်ကြိုးစားပါမယ်။ ကမ္ဘာ့အဆင့်သတ်မှတ်ချက်တွေပါ ပြန်တက် လာအောင် ကြိုးစားပေးပါမယ်”ဟု မြန်မာလက်ရွေးစင်အသင်းနည်းပြချုပ် မိုက်ကယ် ဖစ်ခ်စတန်ဗီနာက ပြောသည်။

မြန်မာလက်ရွေးစင်အသင်းသည် လက်ရှိ၌ ဖီဖာကမ္ဘာ့အဆင့် ၁၆၀ အထိ ကျ‌ဆင်းသွားခဲ့ပြီဖြစ်ပြီး အဆင့်ပြန်လည်မြင့်တက်လာရန်အတွက် ပြိုင်ပွဲတိုင်းကို ရလဒ်ကောင်းအောင် ကစားသွားမှသာ ဖြစ်နိုင် ကြောင်း သိရသည်။

မြန်မာလက်ရွေးစင်အသင်းနှင့် နီပေါလက်ရွေးစင်အသင်းတို့၏ FIFA International "A" Friendly Matchs ပွဲစဉ်များကို လာမည့် စက်တင်ဘာလ ၈ရက်နှင့် ၁၁ရက်တို့တွင် ရန်ကုန်မြို့ သုဝဏ္ဏကွင်း၌ ယှဉ်ပြိင်ကစားကြမည်ဖြစ်ကြောင်း သိရသည်။