ဂျန်ဇက် (NSS) - သြဂုတ် ၂၅

ဖူကူရှီးမားနျူကလီးယားဓါတ်အားပေးစက်ရုံကထွက်ရှိတဲ့ ရေဒီယိုဓါတ်သတ္တိကြွရေဆိုးတွေကို ပစီဖိတ်သမုဒ္ဒရာ အတွင်း စွန့်ပစ်နေခြင်းကို ချက်ချင်းရပ်တန့်ဖို့ ဂျပန်အစိုးရကို မြောက်ကိုရီးယားအစိုးရက တိုက်တွန်းတောင်းဆို လိုက်ကြောင်း သိရပါတယ်။

ဂျပန်အစိုးရရဲ့လုပ်ရပ်တွေဟာ လူသားတွေအပေါ် ခွင့်လွှတ်လို့မရနိုင်တဲ့ ရာဇဝတ်မှုမျိုး ကျူးလွန်ခြင်းဖြစ်ကြောင်း၊ ဂျပန်အစိုးရအနေနဲ့ ရေဆိုးများစွန့်ပစ်ခြင်းအတွက် တာဝန်ယူခြင်း တာဝန်ခံခြင်းများ ရှိရမှာဖြစ်ကြောင်း မြောက်ကိုရီးယားအစိုးရက ပြောပါတယ်။

ဂျပန်ဝန်ကြီးချုပ် ဖူမီအိုကီရှီဒါက ၂ဝ၁၁ ခုနှစ်က နျူကလီးယားဘေးအန္တရာယ်တွေ့ကြုံခဲ့ရတဲ့ ဖူကူရှီးမား နျူကလီးယားဓါတ်အားပေးစက်ရုံက ရေးဆိုးတန်ချိန် ၁ ဒသမ ၃ သန်း မက်ထရစ်တန်ကို ပစိဖိတ်သမုဒ္ဒရာကို စွန့်ပစ်မှာဖြစ်ကြောင်း ပြောဆိုခဲ့ဖူးပါတယ်။ 

ဂျပန်အစိုးရဟာ အဆိုပါရေဆိုးများ စွန့်ပစ်ခြင်းကို နိုင်ငံတကာအဏုမြူစွမ်းအင်အေဂျင်စီအဖွဲ့ရဲ့ခွင့်ပြုချက်နဲ့ လုပ်ဆောင်ခြင်းဖြစ်ပေမယ့် တရုတ်နိုင်ငံကလည်း ပြီးခဲ့တဲ့ရက်ပိုင်းမှာ အပြင်းထန်ကန့်ကွက်ခဲ့ဖူးကြောင်း သိရပါတယ်။ ရေဒီယိုဓါတ်သတ္တကြွမှု ပါဝင်တဲ့ရေဆိုးတွေကို ပစိဖိတ်သမုဒ္ဒရာကို စွန့်ပစ်ခြင်းနဲ့ပတ်သက်ပြီး ဂျပန် နိုင်ငံရဲ့အိမ်နီးချင်းနိုင်ငံများက ဝေဖန်ပြစ်မှုများရှိနေပြီး နိုင်ငံတကာ  အဏုမြူစွမ်းအင်အေဂျင်စီနဲ့ ဂျပန်အစိုးရတို့ ပြောဆိုချက်တွေကို လက်ခံယုံကြည်ခြင်းမရှိကြောင်း သိရပါတယ်။

တရုတ်အစိုးရဟာ ပစိဖိတ်သမုဒ္ဒရာထဲကို ရေဒီယိုဓါတ်သတ္တိကြွမှုပါဝင်နေတဲ့ ရေဆိုးတွေ စွန့်ပစ်ခြင်းကို ကန့်ကွက် ဆန့်ကျင်မှုအဖြစ် ဂျပန်နိုင်ငံက တင်ပို့နေတဲ့ ပင်လယ်စာပစ္စည်းများအားလုံးကို ပိတ်ပင်လိုက်ကြောင်း သိရပါတယ်။ တရုတ်အစိုးရက ဂျပန်အစိုးရဟာ စွန့်ပစ်လိုက်တဲ့ရေဆိုးတွေကြောင့် ဘေးကင်းလုံခြုံမှုတွေ ရှိမယ်ဆိုတဲ့အချက်ကို သက်သေပြနိုင်ခြင်းမရှိကြောင်း ပြောပါတယ်။

တရုတ်အစိုးရကလည်း ဂျပန်နိုင်ငံရဲ့လုပ်ရပ်က အလွန်အတ္တကြီးပြီး တာဝန်မဲ့လွန်းတဲ့လုပ်ရပ်ဖြစ်ကြောင်း ပြောပါ တယ်။ ဒါ့အပြင် ဟောင်ကောင်နဲ့ မာကာအိုတို့ကလည်း ဂျပန်နိုင်ငံက ပင်လယ်စာတင်ပို့နေခြင်းများကို တားမြစ် ပိတ်ပင်ခဲ့ကြောင်း သိရပါတယ်။ ဒါ့အပြင် တောင်ကိုရီးယားနိုင်ငံက သမုဒ္ဒရာကို ရေးဆိုးများစွန့်ပစ်တဲ့ ဂျပန်နိုင်ငံရဲ့ အစီအစဉ်ဟာ ဘေးကင်းမယ်လို့ အာမခံချက်ကိုလက်ခံပေမယ့် တောင်ကိုရီးယားနိုင်ငံအတွင်းကို ဂျပန်နိုင်ငံက ပင်လယ်စာတင်သွင်းနေခြင်း ပိတ်ပင်မှုကိုဖြေလျော့ပေးတာမျိုး မရှိသေးကြောင်း သိရပါတယ်။