ဂျန်ဇက် (NSS) - ဩဂုတ် ၂၂

ထိုင်းဝန်ကြီးချုပ်အသစ်ရွေးချယ်နိုင်ဖို့ လွှတ်တော်နှစ်ရပ် ပူးပေါင်းကျင်းပတဲ့အစည်းအဝေးကို သြဂုတ် ၂၂ ရက်က ကျင်းပခဲ့ရာ ဖြူထိုင်းပါတီက ဝန်ကြီးချုပ်လောင်းအဖြစ် အမည်စာရင်းတင်သွင်းခဲ့တဲ့ ဆာရက်သာ တာဗီဆင်ဟာ ထိုင်းနိုင်ငံရဲ့ ၃ဝ ဦးမြောက် ဝန်ကြီးချုပ်အသစ်အဖြစ် မဲပေးရွေးချယ်ခံလိုက်ရကြောင်း သိရပါတယ်။

သြဂုတ် ၂၂ ရက်က ကျင်းပတဲ့ ထိုင်းဝန်ကြီးချုပ်အသစ်ရွေးချယ်ပွဲမှာ ဆာရက်သာတာဗီဆင်တစ်ဦးတည်းသာ ဝန်ကြီးချုပ်လောင်းအဖြစ် အမည်စာရင်းတင်သွင်းခံထားရကြောင်း ထိုင်းသတင်းတွေကဖော်ပြထားပါတယ်။ 

ထိုင်းဖွဲ့စည်းပုံအခြေခံဥပဒေမှာ ဝန်ကြီးချုပ်အသစ် ခန့်အပ်နိုင်ဖို့ အမည်စာရင်းတင်သွင်းခံရသူဟာ လွှတ်တော်နှစ်ရပ်ပေါင်း ကိုယ်စားလှယ်ဦးရေ ၇၅ဝ ဦးအနက် ထောက်ခံမဲ ၃၇၅ မဲ အနည်းဆုံးရရှိဖို့ လိုအပ်တယ်လို့ သတ်မှတ်ထားပေမယ့် လက်ရှိအချိန်မှာ ထိုင်းလွှတ်တော်နှစ်ရပ်မှာ ကိုယ်စားလှယ်ဦးရေ ၇၄၇ ဦးသာရှိနေရာ ဝန်ကြီးချုပ်ဖြစ်ဖို့ ထောက်ခံမဲအရေ အတွက် ၃၇၄ မဲ ရရှိဖို့လိုအပ်ကြောင်း ထိုင်းအောက်လွှတ်တော်ဥက္ကဋ္ဌ က ပြောပါတယ်။ 

အသက် ၆ဝ အရွယ်ရှိ ဆာရက်သာတာဗီဆင်ဟာ ထိုင်းလွှတ်တော်နှစ်ရပ်ပေါင်းရှိ ကိုယ်စားလှယ်ဦးရေ ၇၄၇ ဦးအနက် ထောက်ခံမဲ ၄၈၂ မဲရရှိခဲ့ကာ ထိုင်းနိုင်ငံရဲ့ ၃ဝ ဦးမြောက် ဝန်ကြီးချုပ်အသစ်ဖြစ်လာခဲ့ကြောင်း သိရပါတယ်။

ဖြူထိုင်းပါတီဟာ ထိုင်းရွေးကောက်ပွဲမှာ မဲအများဆုံးအနိုင်ရခဲ့တဲ့ ရှေ့သို့ချီပါတီ နဲ့ မဟာမိတ်အဖြစ် ယခင်က ပူးပေါင်းခဲ့ပေမယ့် အထက်လွှတ်တော်ကိုယ်စားလှယ်များရဲ့ကန့်ကွက်မှုများတွေ့ကြုံရပြီးနောက် ဖြူထိုင်းပါတီဟာ ရှေ့သို့ချီပါတီဦးဆောင်တဲ့ ၈ ပါတီညွန့်ပေါင်းအဖွဲ့က နှုတ်ထွက်ပြီး အခြားနိုင်ငံရေးပါတီတွေနဲ့ ၁၁ ပါတီတွေနဲ့ ညွန့်ပေါင်းအဖွဲ့ကို ဦးဆောင်ဖွဲ့စည်းခဲ့ကြောင်း သိရပါတယ်။ 

ဖြူထိုင်းပါတီဟာ စစ်တပ်ကျောထောက်နောက်ခံပြုထားတဲ့ပါတီတွေနဲ့ ညွန့်ပေါင်းဖွဲ့စည်းပြီးနောက် အထက်လွှတ်တော်ရဲ့ထောက်ခံမဲများကို ရယူနိုင်ခဲ့ကာ ဝန်ကြီးချုပ်အသစ်ဖြစ်လာခဲ့ခြင်းဖြစ်ပါတယ်။