ယွန်း (NSS) - သြဂုတ် ၁၄

ကမ္ဘောဇဘဏ်လိမိတက်(KBZ Bank)၏ အမည် အပါအဝင် အမှတ်တံဆိပ်နှင့် စာတမ်းအမှတ်အသားများကို အယောင်ဆောင်သုံးစွဲခြင်းများပြုလုပ်ပါက တည်ဆဲဥပဒေများနှင့်အညီ တရားစွဲဆိုသွားမည်ဖြစ်ကြောင်း သိရသည်။

KBZ ဘဏ်မှ ပြီးခဲ့သည့် ရက်ပိုင်းတွင် နိုင်ငံပိုင်သတင်းစာ၌ အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

လက်ရှိတွင် မသမာသူလူအချို့သည် KBZ ဘဏ်၏ အမှတ်တံဆိပ်၊ အမည်၊ စာတမ်းအမှတ်အသားများကို အသုံးပြုလျက် ဘဏ်၏ဝန်ဆောင်မှုကို ရယူသုံးစွဲနေသူများအား ထင်ယောင်ထင်မှားဖြစ်စေရန် လိမ် လည်လှည့်ဖြားမှုများ ဆောင်ရွက်လျက်ရှိကြောင်း သိရသည်။

၎င်းတို့သည် KBZ ဘဏ်အားတုပ၍ အီလက်ထရောနစ်နည်းပညာနှင့် ဆက်သွယ်ရေးနည်းပညာကို အသုံးပြု၍ လူမှုကွန်ယက်များဖြစ်သော (Facebook/Viber/Telegram/Messenger/Phone Message အစရှိသည်) တို့တွင် Account အတုများပြုလုပ်ပြီး ငွေကြေးလိမ်လည်ခြင်းများ၊ အလွဲသုံးစားပြုခြင်းများ၊ အထင်အမြင်လွဲမှားစေရန် အယောင်ဆောင်ခြင်းများကို လုပ်ဆောင်နေကြောင်း KBZ ဘဏ်မှ အသိပေးထားသည်။

အဆိုပါ လုပ်ဆောင်ချက်များသည် တရားဥပဒေနှင့်ဆန့်ကျင်နေသည့်အပြင် KBZ ဘဏ်၏ ပုံရိပ်ကိုထိခိုက်စေပြီး ဘဏ်နှင့်လုံးဝသက်ဆိုင်ခြင်းမရှိကြောင်း ထုတ်ပြန်ချက်တွင် အသိပေးထားသည်။

ထို့ပြင် ဘဏ်၏ အမည်၊ အမှတ်တံဆိပ်နှင့် စာတမ်းအမှတ်အသားများကို သွယ်ဝိုက်၍ဖြစ်စေ၊ ဆင်တူ ရိုးမှားပြုလုပ်၍ဖြစ်စေ၊ တုပခြင်း၊ ဖော်ပြခြင်း၊ အယောင်ဆောင်သုံးစွဲခြင်းများ မပြုလုပ်ရန် KBZ ဘဏ်မှ အသိပေးထားသည်။

၎င်းတို့၏ အသိပေးချက်အား လိုက်နာခြင်းမရှိပါက ကြေညာထားသည့်နေ့မှစ၍ တည်ဆဲဥပဒေများနှင့်အညီ တရားစွဲဆိုအရေးယူခြင်းများ ဆောင်ရွက်သွားမည်ဖြစ်ကြောင်း ထုတ်ပြန်ထားသည်။

ထို့ပြင် KBZ ဘဏ်၏ ထိခိုက်နစ်နာဆုံးရှုံးမှုများအပေါ် တရားစွဲဆိုခြင်း၊ နစ်နာကြေး၊ လျော်ကြေးများ ဆောင်းဆိုခြင်းများ ပြုလုပ်သွားမည်ဖြစ်ကြောင်း ထုတ်ပြန်ချက်အရ သိရသည်။