Pika (NSS) - ဩဂုတ် ၁ဝ

အသက်(၃၁)နှစ်အရွယ် နေမာသည် ကမ္ဘာကျော်တိုက်စစ်မှူးမက်ဆီပြောင်းရွှေ့ခဲ့သော အမေရိကန်မေဂျာလိဂ်သို့ လက်ရှိနွေရာသီတွင် ပြောင်းရွှေ့နိုင်ဖွယ်ရှိနေကြောင်း သတင်းများထွက်ပေါ်နေသည်။

ထို့အပြင်   LAFC အသင်းသည် နေမာအတွက် စိတ်လှုပ်ရှားစရာ အပြောင်းအရွှေ့တစ်ခုကို ပြင်ဆင်နေကြောင်း သိရသည်။ နေမာ သည် ဘာစီလိုနာအသင်းသို့ပြန်သွားရန် ဆန္ဒရှိနေသောကြောင့် လက်ရှိနွေရာသီတွင် အသင်းမှ ထွက်ခွာလိုကြောင်း ပီအက်စ်ဂျီအသင်းတာဝန်ရှိသူများကို ပြောကြားခဲ့သည်။

ပီအက်စ်ဂျီအသင်းမှထွက်ခွာရန် ဆန္ဒရှိကြောင်း ထုတ်ဖော်ပြောခဲ့ပြီးနောက်  အမေရိကန်မေဂျာလိဂ်မှ အသင်းများ သည် နေမာကိုခေါ်ယူရန်အတွက် အာရုံစိုက်လာခဲ့ခြင်းဖြစ်ကြောင်း သိရသည်။ ဘောလုံးသတင်းထောက် ဖာဘရီဇီရိုရိုမာနို၏ အဆိုအရ အမေရိကန်မေဂျာလိဂ်မှ ကလပ်အများအပြားသည် နေမာကိုခေါ်ယူရန် စိတ်ဝင်စား နေပြီး  LAFC အသင်းသည် နေမာကိုခေါ်ယူရန်အတွက် ကမ်းလှမ်းမှုများကိုပင် ပြင်ဆင်နေပြီဖြစ်ကြောင်း သိရသည်။

အမေရိကန်မေဂျာလိဂ်မှ ကလပ်အများအပြားက စိတ်ဝင်စားမှုများရှိနေသော်လည်း နေမာ၏ အဓိကဦးစားပေးက ဘာစီလိုနာအသင်းသို့ ပြန်သွားရန်သာဖြစ်ကြောင်း ဖာဘရီဇီရိုရိုမာနို က ပြောကြားခဲ့သည်။ 

ထို့အပြင် ပီအက်စ်ဂျီအသင်းသည် နေမာကို ယူရိုသန်း(၁၅၀)ခန့်ဖြင့် ရောင်းချရန် ဆန္ဒရှိနေကြောင်း သိရသည်။ နေမာ သည် LAFC အသင်း၊ ဘာစီလိုနာအသင်းတို့အပြင် ဆော်ဒီအာရေးဗျကလပ်များနှင့်ပါ ချိတ်ဆက်မှုများ ရှိနေ သော်လည်း မည်သည့်အသင်းသို့ ပြောင်းရွှေ့သွားမည်ဆိုသည့်အချက်ကို လက်ရှိအချိန်အထိ မသိရသေးကြောင်း သတင်းများအရ သိရသည်။