မျိုးကြီး (NSS) - သြဂုတ် ၈

မီးသတ်တပ်ဖွဲ့ဝင်များနှင့် မိသားစုဝင် (၁၉)ဦးကို အကြမ်းဖက်အဖွဲ့က ဖမ်းဆီးခေါ်ဆောင်သွားမှု စစ်ကိုင်းတိုင်း၊ ဘုတင်လင်မြို့၌ ဖြစ်ပွားခဲ့ကြောင်း သတင်းရရှိသည်။

အင်အား(၂၀)ဦးခန့်ရှိသော အကြမ်းဖက်အဖွဲ့သည် ယမန်နေ့(သြဂုတ်လ ၇ ရက်)၊ နေ့လည် ၁ နာရီ ၄၅ မိနစ်အချိန်တွင် ဘုတလင်မြို့နယ်မီးသတ်ရုံးသို့ လာရောက်ကာ လက်နက်ကြီးဖြင့် (၃)ချက်ခန့် ပစ်ခတ်ခဲ့ကြောင်း မီးသတ်တပ်ဖွဲ့မှအရာရှိတစ်ဦးက NSS ကို ပြောသည်။

အကြမ်းဖက်အဖွဲ့သည် ယင်းကဲ့သို့ ပစ်ခတ်ခဲ့ပြီးနောက် မီးသတ်ရုံးအတွင်းသို့ ဝင်ရောက်လာကာ ရုံးအတွင်း၌ လက်နက်ကြီး ဘေးအန္တရာယ်ရှောင်ရှားနေသည့် မီးသတ်တပ်ဖွဲ့ဝင် (၁၁)ဦးနှင့် ၎င်းတို့၏ မိသားစုဝင် (၈)ဦး စုစုပေါင်း(၁၉)ဦးကို ဖမ်းဆီးခေါ်ဆောင်သွားခဲ့ကြောင်း သိရသည်။

“အကြမ်းဖက်အင်အား (၂၀)လောက်က မီးသတ်စခန်းနားကို ရောက်လာတယ်။ ပြီးတော့ လက်နက်ကြီးတွေနဲ့ မီးသတ်စခန်းကို (၃)ချက်လောက်ပစ်တယ်။ ပစ်တော့ မီးသတ်တပ်ဖွဲ့ဝင်ရော၊ မိသားစုဝင်တွေရောက စခန်းက နှစ်ထပ်ဆိုတော့ အောက်ထပ်မှာ စုနေကြတာပေါ့။ စုနေတဲ့အချိန်မှာ ဝင်လာပြီးတော့ အကုန်လုံးကို ခေါ်သွားတာပေါ့။ ကားလည်း နှစ်စီးပါသွားတယ်။ မီးသတ်ကားပေါ်တင်ပြီး ခေါ်သွားတာပေါ့။ မိသားစုဝင်က (၈)ယောက်၊ တပ်ဖွဲ့ဝင်က (၁၁)ယောက် စုစုပေါင်း (၁၉)ယောက်ပေါ့။ အဲဒီအထဲမှာ (၃)နှစ်သားကလေးတွေ ပါတယ်။ ကလေးအမေတွေရော ပါသွားတာပေါ့” ဟု မီးသတ်တပ်ဖွဲ့မှ အရာရှိက ပြောသည်။

၎င်းကဲ့သို့ အကြမ်းဖက်အဖွဲ့၏ ဖမ်းဆီးခြင်းခံခဲ့ရသော မီးသတ်တပ်ဖွဲ့ဝင်များအနက် ကံကောင်းစွာဖြင့် ကလေးအား ကျောင်းလိုက်ပို့ပေးနေသည့် မီးသတ်တပ်ဖွဲ့ဝင်တစ်ဦးနှင့် ဈေးဝယ်ထွက်နေသည့် မီးသတ်တပ်ဖွဲ့ဝင်တစ်ဦးမှာ ဖမ်းဆီးခံရခြင်းမှ လွတ်မြောက်ခဲ့သည်။

ထိုသို့ ဖမ်းဆီးခံခဲ့ရသော မီးသတ်တပ်ဖွဲ့ဝင်များနှင့် မိသားစုဝင်များ၏ အခြေအနေအား လိုက်လံစုံစမ်းနေသော်လည်း လက်ရှိအချိန်ထိ အဆက်အသွယ်မရသေးကြောင်း သိရသည်။

“ကျွန်တော်တို့ တပ်ဖွဲ့ဝင်တွေဆိုတာ ပြည်သူလူထုကြားမှာ အနီးဆုံးရှိပြီးတော့မှ ပြည်သူလူထုရဲ့ မီးဘေးလုံခြုံရေးကို တာဝန်ထမ်းဆောင်တဲ့သူတွေပါ။ ဘယ်အစိုးရပဲ တက်တက်၊ ဘယ်သူပဲ အုပ်ချုပ်အုပ်ချုပ် အရေးကြီးတာက မြို့ထဲရွာထဲမှာ မီးမလောင်ဖို့။ အခုဆိုရင် သဘာဝဘေးအန္တရာယ်တွေ ကျရောက်တယ်။ သစ်ပင်တွေလဲတယ်၊ ကားတိုက်မှုတွေဖြစ်တယ်ဆိုရင် လူတွေကို ကူညီဖို့ ရှိနေတဲ့အဖွဲ့အစည်းပါ။ ကျွန်တော်တို့က အားကိုးရာမဲ့တာပေါ့ဗျာ။ ဘာလက်နက်မှ မရှိတာ။ ရေနဲ့ ပက်ရုံကလွဲလို့ ဘာမှလုပ်လို့ မရဘူး။ ကျွန်တော်တို့က ကိုယ့်ကိုယ်ကို ကာကွယ်ဖို့ သေနတ်လည်း ရှိတာမဟုတ်ဘူး။ အခုလို ဝင်အလုပ်ခံရတာ တော်တော်စိတ်မကောင်း ဖြစ်တယ်။ မီးသတ်တပ်ဖွဲ့ဝင်တွေဆိုတာ ပြည်သူလူထုကို ဘယ်လိုကူညီရမလဲ စဉ်းစားနေတဲ့သူတွေပါ” ဟု မီးသတ်အရာရှိတစ်ဦးက ပြောသည်။

ကမ္ဘာပေါ်ရှိ စစ်ပွဲများ၌ မီးသတ်တပ်ဖွဲ့ဝင်များကို လက်နက်ကိုင်များက ရန်ရှာတိုက်ခိုက်ခြင်းမရှိသော် လည်း မြန်မာနိုင်ငံ၌ ယခုကဲ့သို့ မီးသတ်တပ်ဖွဲ့ဝင်များ ရန်ပြုခံနေရသည်မှာ မဖြစ်သင့်ကြောင်းလည်း ၎င်းက ထပ်မံပြောသည်။

ထို့ကြောင့် ဘုတလင်မြို့နယ်မီးသတ်ရုံးမှ ဖမ်းဆီးခေါ်ဆောင်သွားသော မီးသတ်တပ်ဖွဲ့ဝင် (၁၁)ဦးနှင့် ကလေးသူငယ်များ အပါအဝင် မိသားစုဝင် (၈)ဦး စုစုပေါင်း (၁၉)ဦးကို ပြန်လည်လွှတ်ပေးစေလိုကြောင်း မီးသတ်အရာရှိက တောင်းဆိုထားသည်။

အဆိုပါ မီးသတ်တပ်ဖွဲ့ဝင်များနှင့် မိသားစုဝင်များကို NUG လက်အောက်ခံ မြို့နယ်ပြည်သူ့ကာကွယ်ရေးတပ်ဖွဲ့(ပကဖ)က ဖမ်းဆီးထိန်းသိမ်းထားခြင်းဖြစ်ကြောင်း သိရသည်။