ရဲပြည့် (NSS) - ဩဂုတ် ၇ 

မြန်မာ့လက်ရွေးစင် ဖူဆယ်အသင်းသည် ထိုင်းနိုင်ငံက အိမ်ရှင်အဖြစ်လက်ခံကျင်းပမည့် Continental Futsal Championship 2023 ပြိုင်ပွဲကို ဝင်ရောက်ယှဉ်ပြိုင်မည်ဖြစ်ကြောင်း MFF Futsal ၏ ထုတ်ပြန်ချက်အရ သိရသည်။

အဆိုပါပြိုင်ပွဲကို ယနေ့ (ဩဂုတ်လ ၇ ရက်)တွင် စတင်ယှဉ်ပြိုင်မည်ဖြစ်ပြီး စုစုပေါင်းအသင်း(၆)သင်းပါဝင်ယှဉ်ပြိုင်မည်ဖြစ်သည်။ 

ပါဝင်ယှဉ်ပြိုင်မည့် အသင်းများအနေဖြင့် ချက်အသင်း (ကမ္ဘာ့အဆင့် ၂၁) ၊ ထိုင်းအသင်း (ကမ္ဘာ့အဆင့် ၂၆) ၊ ဆော်လမွန်ကျွန်းစုနိုင်ငံအသင်း (ကမ္ဘာ့အဆင့် ၅၃) ၊ မိုဇမ်ဘစ်အသင်း (ကမ္ဘာ့အဆင့် ၇၄) ၊ မြန်မာအသင်း (ကမ္ဘာ့အဆင့် ၈၃) ၊ အာဇဂန်နစ္စတန်အသင်း (ကမ္ဘာ့အဆင့် ၉၄) တို့ဖြစ်သည်။ 

မြန်မာ့လက်ရွေးစင် ဖူဆယ်အသင်းနည်းပြ Mr. Bunlert Charoenwong က "ဒီပြိုင်ပွဲက မြန်မာအသင်းအတွက် ကောင်းမွန်ပြီး အာရှခြေစစ်ပွဲအတွက် အကျိုးရှိမယ့် ပြိုင်ပွဲတစ်ခုပါ။ ဒီပြိုင်ပွဲမှာ ကစားသမားအားလုံးကို ကျွန်တော်စမ်းသပ်အသုံးပြုမှာပါ။ ပြိုင်ပွဲရလဒ်နဲ့ပတ်သက်ပြီး စိုးရိမ်ဖို့မလိုပါဘူး။ ဒီပြိုင်ပွဲကနေ အမှားတွေကို ရှာဖွေပြီး အာရှခြေစစ်ပွဲအတွက် ပြင်ဆင်သွားပါမယ်။ ကစားသမားတွေကလည်း ကျွန် တော်သင်ကြားပေးထားတဲ့ နည်းစနစ်တွေကို လိုက်နာနိုင်မယ်လို့ ယုံကြည်ပါတယ်"ဟု ပြောကြားခဲ့သည်။

မြန်မာ့လက်ရွေးစင် ဖူဆယ်အသင်းသည်  ဩဂုတ်လ ၅ ရက်၊ နံနက်ပိုင်းက ထိုင်းနိုင်ငံသို့ ထွက်ခွာသွားခဲ့ခြင်းဖြစ်ပြီး ကစားသမား ၁၈ဦး ၊ အုပ်ချုပ်၊ နည်းပြ အဖွဲ့ဝင် ၁၀ ဦးတို့ပါဝင်ကြောင်း သိရသည်။ 

Continental Futsal Championship 2023 ပြိုင်ပွဲ၏ အုပ်စုပွဲစဉ်များအဖြစ် မြန်မာဖူဆယ်အသင်းသည်  ယနေ့ (ဩဂုတ်လ ၇ ရက်)တွင် ထိုင်းအသင်းနှင့်လည်းကောင်း၊ ဩဂုတ်လ ၈ ရက်တွင် ဆော်လမွန်ကျွန်းစု အသင်းနှင့်လည်းကောင်း ယှဉ်ပြိုင်ရမည်ဖြစ်ကြောင်း သိရသည်။