မျိုးကြီး (NP News)- သြဂုတ် ၁

ဒေါ်အောင်ဆန်းစုကြည်နှင့် ဦးဝင်းမြင့်တို့အပေါ် ထောင်ဒဏ်လျှော့ပေါ့ပေးမှုနှင့်အတူ အကျဥ်းသား (၇၀၀၀)ကျော်ကို နစကမှ လွတ်ငြိမ်းချမ်းသာခွင့်ပြုခဲ့သည်။

ယနေ့ (သြဂုတ်လ ၁ ရက်)၊ ဒုတိယ ဝါဆိုလပြည့်နေ့တွင် ကျရောက်သည့် ဓမ္မစကြာအခါတော်နေ့အထိမ်းအမှတ်အဖြစ် နစကမှ အထက်ပါကဲ့သို့ လွတ်ငြိမ်းသက်သာခွင့်ပေးခဲ့ခြင်းဖြစ်သည်။

အကျဥ်းထောင်အသီးသီး၌ ပြစ်ဒဏ်ကျခံနေရသည့် အကျဥ်းသား (၇၇၄၉)ကို လွတ်ငြိမ်းချမ်းသာခွင့်ပေးသွားမည်ဖြစ်ကြောင်း နစက ပြောခွင့်ရ ဗိုလ်ချုပ်ဇော်မင်းထွန်းက မီဒီယာများကို ပြောသည်။

ထို့ပြင် နှစ်ရှည်ထောင်ဒဏ်များ ချမှတ်ခြင်းခံထားရသည့် နိုင်ငံတော်၏အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်နှင့် သမ္မတဟောင်း ဦးဝင်းမြင့်တို့အပေါ်တွင်လည်း ထောင်ဒဏ်ပြစ်ဒဏ်များ လျှော့ပေါ့ပေးခဲ့ကြောင်း ၎င်းက ဆက်လက်ပြောသည်။

"NLD ဥက္ကဋ္ဌဟောင်း၊ နိုင်ငံတော်အတိုင်ပင်ခံ ပုဂ္ဂိုလ်ဟောင်းကို ပြစ်ဒဏ်လျှော့ဖို့ရှိပါတယ်။ပြစ်ဒဏ်လျှော့တဲ့နေရာမှာ ကျွန်တော်တို့ တရားစွဲဆိုခဲ့တာက ၅၀၅ နဲ့ တရားစွဲဆိုထားတာရှိတယ်။ နိုင်ငံတော်အကြည်ညိုပျက်စေမှုနဲ့ပေါ့။ ပြီးတော့ သဘာဝဘေးစီမံ ၂၅ နဲ့ တရားစွဲဆိုထားတာရှိတယ်။ ပြီးရင်တော့ ဆက်သွယ်ရေးဥပဒေနဲ့ တရားစွဲဆိုထားတာရှိတယ်။ ပြီးတော့ ပို့ကုန်သွင်းကုန်နဲ့ တရားစွဲဆိုထားတာရှိတယ်။ ၆ နှစ် ပြစ်ဒဏ်လျှော့ဖို့ရှိပါတယ်"ဟု ဗိုလ်ချုပ်ဇော်မင်းထွန်းက ပြောသည်။

ယနေ့ ဓမ္မစကြာအခါတော်နေ့၌ ဒေါ်အောင်ဆန်းစုကြည်အား ထောင်ဒဏ်(၆)နှစ် ပြစ်ဒဏ်လျှော့ပေါ့ပေးခဲ့သည့်အပြင် သမ္မတဟောင်းဦးဝင်းမြင့်အပေါ်တွင်လည်း ထောင်ဒဏ် (၄)နှစ် ပြစ်ဒဏ်လျှော့ပေါ့ပေးခဲ့ကြောင်း သိရသည်။

"သမ္မတဟောင်းဦးဝင်းမြင့်ကိုလည်း ကျွန်တော်တို့ ပြစ်ဒဏ်လျှော့တာ ၄ နှစ်ရှိလိမ့်မယ်။ အခုနပြောတဲ့ သဘာဝဘေးစီမံ (၂) နှစ်ရှိမယ်။ ပြီးရင် ၅၀၅ - ခ နဲ့ က (၂)နှစ် ပြစ်ဒဏ်လေးနှစ် လျှော့ဖို့ရှိပါမယ်"ဟု နစကပြောခွင့်ရက ပြောသည်။

နိုင်ငံတော်၏အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်သည် အမှုပေါင်း(၁၉)မှုဖြင့် တရားစွဲဆိုခံခဲ့ရကာ စုစုပေါင်း ထောင်ဒဏ်(၃၃)ချမှတ်ခံခဲ့ရပြီး လက်ရှိ၌ နစကမှ ထောင် ဒဏ် (၆)နှစ် ပြစ်ဒဏ်လျှော့ပေါ့ပေးခဲ့သော်လည်း လက်ကျန် ထောင်ဒဏ် (၂၇)နှစ်ကို ဆက် လက်ကျခံရမည်ဖြစ်သည်။

အလားတူ နိုင်ငံတော်သမ္မတဟောင်းဦးဝင်းမြင့်သည်လည်း စုစုပေါင်းထောင်ဒဏ် (၁၂)နှစ် ပြစ်ဒဏ်ချမှတ်ခြင်းခံခဲ့ရပြီး လက်ရှိတွင် နစကမှ ထောင်ဒဏ်(၄)နှစ် လျှော့ပေါ့ပေးခဲ့သည့် အတွက် လက်ကျန်ထောင်ဒဏ် (၈)နှစ်ကို ဆက်လက်ကျခံရမည်ဖြစ်သည်။

ထို့ပြင် နစကသည် ယနေ့တွင်လည်း ဓမ္မစကြာအခါတော်နေ့အထိမ်းအမှတ်၊ တိုင်းရင်းသားစည်းလုံးညီညွတ်ရေးနှင့် ပြည်တွင်းငြိမ်းချမ်းရေးကို ရှေးရှုကာ အကျဉ်းထောင်များ၌ ပြစ်ဒဏ်ကျခံနေသည့် တိုင်းသားလက်နက်ကိုင်အဖွဲ့ဝင်(၂၂)ဦးကို လွတ်ငြိမ်းချမ်းသာခွင့်ပြုခဲ့သည်။

၎င်းကဲ့သို့ လွတ်ငြိမ်းချမ်းသာခွင့်ပြုလိုက်သော လက်နက်ကိုင်အဖွဲ့ဝင်များထဲတွင် တအာင်းလက်နက်ကိုင်အဖွဲ့ TNLA မှ အဖွဲ့ဝင်အများဆုံးဖြစ်ပြီး ကိုးကန့်လက်နက်ကိုင်အဖွဲ့ MNDAA၊ ရှမ်းလက်နက်ကိုင်အဖွဲ့ SSPP နှင့် ရခိုင်လက်နက်ကိုင်အဖွဲ့ AA တို့ အဖွဲ့ဝင်များလည်း ပါဝင်ကြောင်း သိရသည်။

ဆက်လက်ပြီး တရားရုံးအသီးသီး၌ တရားစွဲဆိုထားဆဲဖြစ်သော တိုင်းရင်းသားလက်နက်ကိုင်အဖွဲ့ဝင်များနှင့်ဆက်စပ်သူ (၇၂)ဦးကိုလည်း နစကအနေဖြင့် အမှုများကို ပိတ်သိမ်းကာ ပြန် လည်လွှတ်ပေးခဲ့ကြောင်း သိရသည်။

နိုင်ငံအတွင်းရှိ အကျဉ်းထောင်အသီးသီး၌ ပြစ်ဒဏ်ကျခံနေရသည့် နိုင်ငံခြားသား အကျဉ်း သား/အကျဉ်းသူ (၁၂၅)ဦးကိုလည်း စည်းကမ်းသတ်မှတ်ချက်များဖြင့် နစကမှ လွတ်ငြိမ်းသက်သာခွင့် ပေးလိုက်ကြောင်း ထပ်မံသိရှိရသည်။

ထို့ပြင် ယနေ့တွင်လည်း နစကအနေဖြင့် ထောင်အသီးသီး၌ သေဒဏ်ချမှတ်ခြင်းခံထားရသည့် အကျဉ်းသား/သူများအနက် ပြစ်ဒဏ်လျှော့ပေါ့သင့်သူများကို သေဒဏ်ပြစ်ဒဏ်မှ လွတ်ငြိမ်းခွင့်ပြုကာ ထောင်ဒဏ်တစ်သက်သို့ ပြောင်းလဲကျခံစေရန် လျှော့ပေါ့ပေးခဲ့ကြောင်း သိရသည်။

ပုံစာ - ၂ဝ၂၃ ခုနှစ် ဩဂုတ်လ ၁ ရက်တွင် အင်းစိန်အကျဉ်းထောင်ရှေ့လာရောက်စောင့်ဆိုင်းကြသူများ