NSS - သြဂုတ် ၁

၂၀၂၃ ခုနှစ်၊ ဖေဖော်ဝါရီလ(၁)ရက်မှ စတင်၍ (၆)လတာကာလအတွင်း အကြမ်းဖက်များ၏ သတ်ဖြတ်မှုကြောင့် ရဟန်းသံဃာနှင့် သီလရှင်များ အပါအဝင် နိုင်ငံ့ဝန်ထမ်းနှင့် ပြည်သူ စုစုပေါင်း (၈၀၀)ကျော် သေဆုံးထားကြောင်း နစကမှ အသိပေးထားသည်။

နစကဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က ဇူလိုင်လ(၃၁)ရက်တွင် နစက ဥက္ကဋ္ဌရုံးအစည်းအဝေးခန်းမတွင် ကျင်းပခဲ့သည့် အမျိုးသားကာကွယ်ရေးနှင့် လုံခြုံရေးကောင်စီအစည်းအဝေး(၂/၂၀၂၃)တွင် အထက်ပါကဲ့သို့ ပြောကြားခဲ့ခြင်းဖြစ်သည်။

လက်ရှိကာလတွင် CRPH၊ NUG နှင့် PDF အပါအဝင် အချို့သော EAO အဖွဲ့များသည် နိုင်ငံတော်တည်ငြိမ်မှု ပျက်ပြားစေရန် အကြမ်းဖက်တိုက်ခိုက်မှုများကို လုပ်ဆောင်လျက်ရှိကြောင်း သိရသည်။

ထို့ကြောင့် လိုအပ်သည့်စစ်ဆင်ရေးလုပ်ငန်းများဆောင်ရွက်ပြီး အခြားနယ်မြေများတွင်လည်း နယ်မြေတည်ငြိမ်အေးချမ်းပြီး တရားဥပဒေ စိုးမိုးမှုရရှိစေ‌ရေးကို ဥပဒေနှင့်အညီ ဆောင်ရွက်လျက်ရှိကြောင်း နစကဥက္ကဋ္ဌက အသိပေးပြောကြားထားသည်။

အကြမ်းဖက်များ၏ သတ်ဖြတ်မှုကြောင့် ၂၀၂၃ ခုနှစ်၊ ဖေဖော်ဝါရီလ(၁)ရက်မှ ဇူလိုင်လ(၃၀)ရက်အထိ ရဟန်းသံဃာနှင့် သီလရှင်လေးပါး၊ အပြစ်မဲ့ပြည်သူ (၇၇၂)ဦး နှင့် နိုင်ငံ့ဝန်ထမ်း(၂၈)ဦး သေဆုံးခဲ့ကြောင်း သိရသည်။

ထို့ပြင် ကျန်းမာရေးဆိုင်ရာအဆောက်အအုံ တစ်လုံး၊ ဘာသာရေးဆိုင်ရာအဆောက်အအုံ(၁၁)လုံး၊ လူနေအိမ်အဆောက်အအုံ(၇၆)လုံး၊ လမ်းတံတားနှင့် တိုးဂိတ်အဆောက်အအုံ စုစုပေါင်း(၉၄)ခု၊ လျှပ်စစ်နှင့်ဆက်သွယ်ရေးတာဝါတိုင်(၂၆)ခု အပါအဝင် အခြားအဆောက်အအုံများလည်း ပျက်စီးဆုံးရှုံးခဲ့ကြောင်း နစကဥက္ကဋ္ဌမှ ပြောသည်။

အလားတူ ပြည်သူများ၏ လျှို့ဝှက်စွာပူးပေါင်းမှု၊ သတင်းပေးမှုများအရ (၆)လတာကာလအတွင်း လက်နက်မျိုးစုံ (၁၈၇၉၂)လက်၊ ကျည်မျိုးစုံ (၁၄၂၃၂၂၄)တောင့်၊ ခဲယမ်းမျိုးစုံ (၄၅၈၆၅)လုံး သိမ်းဆည်းရမိထားကြောင်း သိရသည်။

နိုင်ငံတော်အား အရေးပေါ်ကာလအဖြစ်(၆)လ ထပ်မံသတ်မှတ်ထားသည် ယမန်နေ့(ဇူလိုင်လ ၃၁ ရက်) တွင် ပြည့်မြောက်ခဲ့ပြီးဖြစ်သော်လည်း လက်ရှိဖြစ်ပေါ်နေသည့် အခြေအနေသည် သာမန်မဟုတ်သည့် အခြေအနေဖြစ်သည့်အတွက် နိုင်ငံတော်အရေးပေါ်ကာလကို ယနေ့ (သြဂုတ်လ ၁ ရက်) မှစ၍ နောက်ထပ် (၆)လ တိုးမြှင့်သတ်မှတ်လိုက်ကြောင်း သိရသည်။