မျိုးကြီး (NSS) - ဇူလိုင် ၂၉

၂၀၀၆ ခုနှစ် ဧပြီလမတိုင်မီ နိုင်ငံရေးတာဝန်ကြီးများကို ထမ်းဆောင်ခဲ့သော နိုင်ငံတော်သမ္မတ/ဥက္ကဋ္ဌတို့၏ နိုင်ငံရေးလစဉ် ပင်စင်ကို (၁၅)သိန်းအဖြစ် ပြင်ဆင်သတ်မှတ်လိုက်ကြောင်း အစိုးရအဖွဲ့၏ သတင်းအချက်အလက်များအရ သိရသည်။

အစိုးရအဖွဲ့၏ သဘောတူညီချက်အရ ၂၀၀၆ ခုနှစ်၊ ဧပြီလ ၁ ရက်မတိုင်မီအထိ နိုင်ငံရေးတာဝန်ကြီးများကို ထမ်းဆောင်ခဲ့ပြီး အငြိမ်းစားယူခဲ့သည့် ပုဂ္ဂိုလ်ကြီးများနှင့် ကျန်ရစ်သူဇနီး/ခင်ပွန်းတို့၏ နိုင်ငံရေးလစဉ်ပင်စင်ကို ၂၀၂၃ ခုနှစ် ဧပြီလတွင် ပြင်ဆင်သတ်မှတ်လိုက်ခြင်းဖြစ်သည်။

နိုင်ငံတော်ကောင်စီ/ နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့/ နိုင်ငံတော်အေးချမ်းသာယာရေးနှင့်ဖွံ့ဖြိုးရေးကောင်စီလက်ထက်တို့၌ နိုင်ငံရေးတာဝန်ထမ်းဆောင်ခဲ့သော ဥက္ကဋ္ဌ/နိုင်ငံတော်သမ္မတတို့၏ နိုင်ငံရေးပင်စင်လစာကို ၎င်းတို့ ကိုယ်တိုင်ရယူပါက ငွေကျပ် (၁၅)သိန်းနှင့် မိသားစုမှ ရယူပါက (၁၁၂၅၀၀၀)ကျပ်အဖြစ်သို့ ပြင်ဆင်သတ်မှတ်လိုက်သည်။

အလားတူ ဒုတိယဥက္ကဋ္ဌ/ ဒုတိယသမ္မတ တာဝန်များကို ထမ်းဆောင်ခဲ့သူများ၏ နိုင်ငံရေးလစဉ်ပင်စင်ကိုလည်း ကိုယ်တိုင်ရယူပါက (၁၂)သိန်းနှင့် မိသားစုမှ ရယူပါက (၉)သိန်းအဖြစ်သို့ ပြင်ဆင်သတ်မှတ်ခဲ့ပြီး အတွင်းရေးမှူးနှင့် အဖွဲ့ဝင်များကိုလည်း နိုင်ငံရေးလစဉ်ပင်စင် ပေးအပ်ထားသည်။

ထို့ပြင် ၂၀၀၆ ခုနှစ်၊ ဧပြီလ (၁)ရက်မတိုင်မီအထိ အစိုးရအဖွဲ့များတွင် ဝန်ကြီးချုပ် တာဝန်ထမ်းဆောင်ခဲ့သူ၏ နိုင်ငံရေးလစဉ် ပင်စင်ကို ကိုယ်တိုင်ရယူပါက ကျပ်(၁၀)သိန်းနှင့် မိသားစုမှရယူပါက ငွေကျပ် (၇၅၀၀၀၀)အဖြစ်သို့ ပြင်ဆင်သတ်မှတ်လိုက်ကြောင်း သိရသည်။

ယင်းအစိုးရအဖွဲ့များတွင် ဒုတိယဝန်ကြီးချုပ်၊ ဝန်ကြီးနှင့် ဒုတိယဝန်ကြီးများအဖြစ် တာဝန်ထမ်းဆောင်ခဲ့သူများ၏ နိုင်ငံရေး လစဉ်ပင်စင်နှုန်းထားများကိုလည်း အသီးသီးအလိုက် ပြင်ဆင်သတ်မှတ်ထားသည်။

ဆက်လက်ပြီး ပြည်နယ်/တိုင်းအေးချမ်းသာယာရေးနှင့် ဖွံ့ဖြိုးရေးကောင်စီဥက္ကဋ္ဌများ၊ တရားသူကြီးချုပ်၊ ဒုတရားသူကြီးချုပ်/တရားသူကြီးအဖွဲ့ဝင်၊ ရှေ့နေချုပ်၊ ဒုရှေ့နေချုပ်၊ စာရင်း စစ်ချုပ်၊ ဒုစာရင်းစစ်ချုပ်၊ ဝန်ထမ်းရွေးချယ်လေ့ကျင့်ရေးအဖွဲ့ ဥက္ကဋ္ဌနှင့် အဖွဲ့ဝင်၊ ရန်ကုန်မြို့တော်ဝန်နှင့် မန္တလေးမြို့တော်ဝန်တို့အဖြစ် တာဝန်ထမ်းဆောင်ခဲ့သူများ၏ နိုင်ငံရေးလစဉ်ပင်စင်များကိုလည်း ပြင်ဆင်သတ်မှတ်ထားသည်။

အထက်ပါကဲ့သို့ ပြင်ဆင်သတ်မှတ်လိုက်သည့် နိုင်ငံရေးလစဉ်ပင်စင်များကို သက်ဆိုင်သူ၊ မိသားစုဝင်များအား ယခု ၂၀၂၃ ခုနှစ် ဧပြီလမှစတင်ကာ ပေးအပ်လျက်ရှိကြောင်းသိရပြီး ယင်းပင်စင်အပေါ်တွင်လည်း ဝင်ငွေခွန်စည်းကြပ်ခြင်းမှ ကင်းလွတ်ခွင့်ပြုထားကြောင်း သိရသည်။

နိုင်ငံရေးပင်စင်ဥပဒေသည် အမျိုးသားခေါင်းဆောင်ကြီး ဗိုလ်ချုပ်အောင်ဆန်းကိုယ်တိုင် ပါဝင်ဖွဲ့စည်းခဲ့သော အစိုးရအဖွဲ့မှစ၍ နိုင်ငံရေးတာဝန်ကြီးများကို ထမ်းဆောင်းပြီး တာဝန်မှ အနားယူသည့်အချိန်တွင် နိုင်ငံရေးပင်စင်ပေးအပ်ရန်အတွက် ၁၉၈၀ ပြည့်နှစ်တွင် အာဏာတည်ခဲ့သော ဥပဒေတစ်ရပ်လည်း ဖြစ်သည်။

၎င်းဥပဒေ၌ နိုင်ငံရေးလစဉ်ပင်စင် ခံစားခွင့်အား အမြင့်ဆုံး ငွေ(၂၀၀၀)ကျပ်အဖြစ် သတ်မှတ်ထားသည်ကိုတွေ့ရှိရပြီး နောက်အစိုးရအဆက်ဆက်လက်ထက်တွင်လည်း နိုင်ငံရေးပင်စင်ဥပဒေအား ပြင်ဆင်ပြဋ္ဌာန်းမှုများ ပြုလုပ်ခဲ့ကြသည်ကို တွေ့ရှိရသည်။