ဂျန်ဇက် (NSS) - ဇူလိုင် ၂ဝ

ရုရှားသမ္မတပူတင်ဟာ တောင်အာဖရိကနိုင်ငံက အိမ်ရှင်အဖြစ် လက်ခံကျင်းပမယ့် BRICS ထိပ်သီးအစည်းအဝေး ကို လူကိုယ်တိုင်တက်ရောက်မှာမဟုတ်ဘဲ အွန်လိုင်းကသာ တက်ရောက်ဖွယ်ရှိနေကြောင်း၊ ရုရှားအစိုးရအဖွဲ့ ပြောရေးဆိုခွင့်ရှိသူ ဒီမီထရီပက်ကောဗ့်က ပြောပါတယ်။ 

တောင်အာဖရိကနိုင်ငံက ရုရှားသမ္မတပူတင်ဟာ BRICS အဖွဲ့ဝင်နိုင်ငံတွေရဲ့ခေါင်းဆောင်တွေ လူချင်းတွေ့ဆုံ ဆွေးနွေးမယ့်အစည်းအဝေးကို ကိုယ်တိုင်တက်ရောက်နိုင်မှာမဟုတ်ကြောင်း အစောပိုင်းက ကြေညာခဲ့ဖူးပါတယ်။ 

ရုရှားသမ္မတပူတင်ဟာ နိုင်ငံတကာရာဇဝတ်တရားရုံး(ICC)ရဲ့ ဖမ်းဝရမ်းအထုတ်ခံထားရသူဖြစ်ရာ (ICC)အဖွဲ့ဝင် နိုင်ငံဖြစ်တဲ့ တောင်အာဖရိကနိုင်ငံဟာ ရုရှားသမ္မတပူတင် လာရောက်ချိန်မှာ ဖမ်းဆီးဖို့တာဝန်ရှိနေကြောင်း သိရပါတယ်။ 

တောင်အာဖရိကအစိုးရကလည်း ရုရှားသမ္မတပူတင်ကို ဖမ်းဆီးလိုခြင်းမရှိတဲ့အတွက် အားလုံးအတွက် အဆင်ပြေ နိုင်အောင် အွန်လိုင်းက အစည်းအဝေးတက်ရောက်မယ့်အစီအစဉ်ကို ရွေးချယ်ခဲ့ခြင်းဖြစ်ဖွယ်ရှိတယ်လို့ သုံးသပ်မှု တွေ ရှိနေပါတယ်။ တောင်အာဖရိကသမ္မတရုံးက ရုရှားအစိုးရ နဲ့ တောင်အာဖရိကအစိုးရတို့ဟာ  BRICS  ထိပ်သီး အစည်းအဝေးကို သမ္မတပူတင် မတက်ရောက်ဘဲ ၎င်းကိုယ်စားလှယ်အဖြစ် နိုင်ငံခြားရေးဝန်ကြီး ဆာဂေးလာရောဗ့် တက်ရောက်ဖို့ သဘောတူညီခဲ့ကြောင်း သိရပါတယ်။ 

ရုရှားနိုင်ငံခြားရေးဝန်ကြီးဟာ လာမယ့်လမှာကျင်းပမယ့်  BRICS ထိပ်သီးအစည်းအဝေးကို ရုရှားကိုယ်စားလှယ် အဖွဲ့ကို ဦးဆောင်ပြီးတက်ရောက်မှာဖြစ်ကြောင်း သိရပါတယ်။ တောင်အာဖရိကနိုင်ငံမှာ ကျင်းပမယ့် BRICS ထိပ်သီးအစည်းအဝေးမှာ အဖွဲ့ဝင်နိုင်ငံတွေရဲ့ခေါင်းဆောင်တွေရဲ့လူချင်းတွေ့ဆုံဆွေးနွေးမယ့် အစီအစဉ်ရှိနေ ကြောင်း သိရပါတယ်။

ကိုရိုနာဗိုင်းရပ်စ် ကပ်ရောဂါကြောင့် BRICS အဖွဲ့ဝင်နိုင်ငံတွေရဲ့ခေါင်းဆောင်တွေဟာ ပြီးခဲ့တဲ့နှစ်တွေက ကျင်းပတဲ့ ထိပ်သီးအစည်းအဝေးတွေမှာ လူချင်းတွေ့ဆုံဆွေးနွေးနိုင်ခြင်းမရှိဘဲ အွန်လိုင်းကသာ တွေ့ဆုံဆွေးနွေးနိုင်ခဲ့ ကြောင်း သိရပါတယ်။ BRICS အဖွဲ့မှာ ရုရှား၊ တရုတ်၊ အိန္ဒိယ၊ ဘရာဇီး၊ တောင်အာဖရိကနိုင်ငံတို့ ပါဝင်လျက် ရှိနေပြီး ယူကရိန်းနဲ့ ရုရှားတို့စစ်ပွဲဖြစ်ပွားချိန်မှာ အမေရိကန်ဦးဆောင်တဲ့ အနောက်အုပ်စုနိုင်ငံတွေက ရုရှားအပေါ် ဝေဖန်ပြစ်တင်မှုများ၊ ပိတ်ဆို့မှုများလုပ်ဆောင်ခဲ့ပေမယ့် BRICS အဖွဲ့ဝင်နိုင်ငံတွေဟာ ရုရှားအပေါ် ပြစ်တင်ရှုတ်ချ ခြင်း မလုပ်ဆောင်ခဲ့ကြောင်း သိရပါတယ်။