ဂျန်ဇက် (NSS) - ဇူလိုင် ၁၄ 

အာဆီယံနိုင်ငံခြားရေးဝန်ကြီးများအစည်းအဝေးအပြီးမှာ ပူးတွဲကြေညာချက်ထုတ်ပြန်ဖို့ ရုန်းကန်ရမှုများရှိခဲ့ကြောင်း၊ အာဆီယံအဖွဲ့ဝင်နိုင်ငံအချို့က မြန်မာအရေးနဲ့ပတ်သက်ပြီး ထိုင်းနိုင်ငံရဲ့ချဉ်းကပ်ဆောင်ရွက်မှုအပေါ် နှစ်သက်ခြင်းမရှိတဲ့အတွက် ပူးတွဲကြေညာချက်ထုတ်ပြန်ဖို့ နှောင့်နေးခဲ့ရကြောင်း သိရပါတယ်။ 

အင်ဒိုနီးရှားနိုင်ငံမှာ ကျင်းပတဲ့ အာဆီယံနိုင်ငံခြားရေးဝန်ကြီးများအစည်းအဝေးမှာ ထိုင်းနိုင်ငံခြားရေးဝန်ကြီး ဒွန်ပရာဝီနိုင်းက ၎င်းဟာ ဇူလိုင် ၉ ရက်နေ့မှာ မြန်မာနိုင်ငံကိုသွားရောက်ပြီး ဒေါ်အောင်ဆန်းစုကြည်နဲ့ တွေ့ဆုံ ဆွေးနွေးခဲ့ကြောင်း ထုတ်ဖော်ပြောခဲ့ပါတယ်။ 

အာဆီယံ သံတမန်အရင်းမြစ်တွေက ထိုင်းနိုင်ငံဟာ မြန်မာနိုင်ငံကို ထိုင်းနိုင်ငံခြားရေးဝန်ကြီးသွားရောက်ခဲ့တဲ့ ခရီးစဉ်နဲ့ပတ်သက်ပြီး မြန်မာနိုင်ငံရေး အခက်အခဲတွေကိုအဖြေရှာဖို့ အောင်မြင်မှုတစ်ခုအဖြစ် ပူးတွဲကြေညာချက် ထဲမှာ ထုတ်ပြန်စေလိုကြောင်း ပြောပါတယ်။

ဒါပေမယ့် အာဆီယံအလှည့်ကျဥက္ကဋ္ဌ အပြင် မလေးရှား၊ စင်ကာပူနိုင်ငံတို့က မြန်မာအရေးနဲ့ပတ်သက်ပြီး ထိုင်းအစိုးရရဲ့ဆောင်ရွက်ချက်တွေကို ကျေနပ်ခြင်းမရှိကြောင်း၊ ထိုင်းအစိုးရရဲ့ဆောင်ရွက်ချက်တွေက အာဆီယံ မူဘောင်ကို ကျော်လွန်လုပ်ဆောင်နေခြင်းဖြစ်ကြောင်း ဝေဖန်ပြစ်တင်ခဲ့တယ်လို့ သိရပါတယ်။ 

ဇူလိုင် ၁၂ ရက်နေ့က အာဆီယံနိုင်ငံခြားရေးဝန်ကြီးများ အစည်းအဝေးပြီးခဲ့ပေမယ့် ကြေညာချက်ကို ချက်ချင်း ထုတ်ပြန်နိုင်ခြင်းမရှိဘဲ ဇူလိုင် ၁၃ ရက်နေ့မှ အာဆီယံနိုင်ငံခြားရေးဝန်ကြီးများရဲ့ ပူးတွဲကြေညာချက်ကို ထုတ်ပြန်နိုင်ခဲ့ပါတယ်။ 

အဆိုပါ အာဆီယံနိုင်ငံခြားရေးဝန်ကြီးများရဲ့ပူးတွဲကြေညာချက်ထဲမှာ မြန်မာနိုင်ငံရေးပြဿနာကိုဖြေရှင်းနိုင်ဖို့ အာဆီယံသဘောတူညီချက်ငါးချက်ကို ဆက်လက်ကျင့်သုံးမယ်ဆိုတဲ့အချက်နဲ့ မြန်မာနိုင်ငံမှာ အကြမ်းဖက် တိုက်ခိုက်မှုများဖြစ်ပွားနေခြင်းအပေါ် ပြစ်တင်ရှုတ်ချကြောင်း အဓိကထား ဖော်ပြထားပါတယ်။ အာဆီယံအဖွဲ့ဝင် နိုင်ငံများဟာ မြန်မာနိုင်ငံကိုသွားရောက်ပြီး ဒေါ်အောင်ဆန်းစုကြည်နဲ့တွေ့ဆုံတဲ့ ထိုင်းနိုင်ငံခြားရေးဝန်ကြီးရဲ့ ဆောင်ရွက်ချက်ကို အပြုသဘောဆောင်တဲ့တိုးတက်မှုအဖြစ် ရှုမြင်ပေမယ့် အာဆီယံဥက္ကဋ္ဌနဲ့ ပူးပေါင်းဆောင်ရွက် စေလိုကြောင်း ပြောပါတယ်။

အဆိုပါအာဆီယံနိုင်ငံခြားရေးဝန်ကြီးများရဲ့ပူးတွဲကြေညာချက်ဟာ အကြိတ်အနယ်ဆွေးနွေးခဲ့ပေမယ့် မြန်မာနိုင်ငံ ရေးအခြေအနေကို အဖြေရှာနိုင်ဖို့ ခိုင်မာတဲ့တိုးတက်မှုမျိုး မရှိခဲ့ကြောင်း ရူမြင်သုံးသပ်တာတွေလည်း ရှိနေခဲ့ပါတယ်။